ប្រធានក្រុមហ៊ុនប្រេងឥន្ធនៈតូតាល់ ស្លាប់ក្នុងគ្រោះថ្នាក់យន្តហោះយប់មិញ
- 2014-10-21 15:30:52
- ចំនួនមតិ 0 | ចំនួនចែករំលែក 0
ប្រធានក្រុមហ៊ុនប្រេងឥន្ធនៈតូតាល់ ស្លាប់ក្នុងគ្រោះថ្នាក់យន្តហោះយប់មិញ
ចន្លោះមិនឃើញ
លោក Christophe de Margerie ដែលជាប្រធានក្រុមហ៊ុនប្រេងឥន្ធនៈតូតាល់របស់ប្រទេសបារាំង បានបាត់បង់ជីវិតនៅក្នុងហេតុការណ៍គ្រោះថ្នាក់យន្តហោះកាលពីយប់មិញនេះ។
លោក Christophe de Margerie
យន្តហោះឯកជនដែលប្រធានក្រុមហ៊ុនជិះម៉ាក Falcon-50 បានជួបគ្រោះថ្នាក់នៅម៉ោងប្រហែល១២ ពាក់កណ្ដាលអធ្រាត្រ (ម៉ោង ៣ ទៀបភ្លឺនៅកម្ពុជា) នៅព្រលានយន្តហោះ Vnukovo រដ្ឋធានីមូស្គូ។
អ្នកនាំពាក្យព្រលានយន្តហោះលោកស្រី Elena Krylova បាននិយាយថា យប់មិញនេះ យន្តហោះមួយបានបុកជាមួយម៉ាស៊ីនសំអាតព្រិល។ ក្រុមការងារលើយន្តហោះ ៣នាក់ និងអ្នកដំណើរម្នាក់បានស្លាប់។ លោកស្រីបានបន្តទៀតថា អ្នកដំណើរនោះគឺជាប្រធានក្រុមហ៊ុនប្រេងតូតាល់។
លោក Christophe de Margerie បានក្លាយជាប្រធានក្រុមហ៊ុនប្រេងឥន្ធនៈតូតាល់ ដែលជាក្រុមហ៊ុនធំជាងគេលំដាប់ទី៣ នៅអឺរ៉ុប តាំងពីឆ្នាំ២០០៧មក។ បុរសវ័យ ៦៣ឆ្នាំរូបនេះ បានចូលរួមជាមួយក្រុមហ៊ុនតូតាល់ បន្ទាប់ពីបញ្ចប់ការសិក្សានៅសាកលវិទ្យាល័យពាណិជ្ជកម្ម Ecole Superieure de Commerce នាទីក្រុងប៉ារីសក្នុងឆ្នាំ១៩៧៤៕
ព័ត៌មានលម្អិត Sabay នឹងធ្វើការផ្សាយជូនជាបន្តរបន្ទាប់។
ប្រែសម្រួល៖ គង់ វិសាល
ប្រភព៖ BBC