ទីផ្សារឡើងកម្តៅ Toyota បង្កើនការនាំរថយន្តថ្មីប្រជែងលើទីផ្សារ

2015-12-18 17:24:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថានភាពប្រកួតប្រជែងចេះតែឡើងកម្ដៅធ្វើឲ្យក្រុមហ៊ុន Toyota Cambodia បានបង្កើនការនាំចូលរថយន្តថ្មីៗបម្រើទីផ្សារអ្នកប្រើប្រាស់។ គិតមកទល់ពេលនេះ Toyota បាននាំរថយន្តចំនួន ១០ ម៉ូដែលសម្រាប់លក់លើទីផ្សារកម្ពុជា ហើយស៊េរីថ្មីចុងក្រោយគឺ Avanza និង VIOS។

លោក លី ប៊ុនហៃ នាយកចាត់ការទូទៅរបស់ក្រុមហ៊ុន Toyota Cambodia បានឲ្យដឹងថា ការនាំរថយន្តថ្មីជាយុទ្ធសាស្ត្រមួយដែលក្រុមហ៊ុនមើលឃើញនឹងជួយបង្កើនការគាំទ្រពីអតិថិជននិងរក្សាការនាំមុខលើគូប្រកួតប្រជែង។

Toyota ជាយីហោរថយន្តដ៏ពេញនិយមមួយសម្រាប់ពលរដ្ឋកម្ពុជា។ ប៉ុន្តែប៉ុន្មានឆ្នាំចុងក្រោយនេះមានយីហោរថយន្តថ្មីៗកំពុងប្រជ្រៀតចូលទីផ្សារប្រជែងម៉ាករថយន្តដ៏ល្បីរបស់របស់ជប៉ុននេះដូចជាក្រុមហ៊ុន Mazda, MG ជាដើមដែលធ្វើឲ្យអតិថិជនមួយចំនួនអាចងាកទៅស្វែងរកម៉ាករថយន្តថ្មី។

លោកលី ប៊ុនហៃទទួលស្គាល់ថា នៅពេលទីផ្សារជោរជន់ដោយម៉ាករថយន្តថ្មីៗ តិចឬច្រើននឹងប៉ះពាល់ដល់ទីផ្សារលក់របស់ក្រុមហ៊ុន។ ដោយមើលឃើញស្ថានភាពបែបនេះ ការនាំរថយន្តថ្មីៗបន្ថែមនឹងផ្តល់ជម្រើសដល់អតិថិជនដែលគាំទ្ររថយន្ត Toyota អាចជ្រើសរើសរថយន្តដែលល្អសមស្របតាមលទ្ធភាពនិងតម្រូវការប្រើប្រាស់របស់ពួកគេ។

ទោះបីមានការប្រកួតប្រជែងខ្លាំង ប៉ុន្តែការលក់រថយន្ត Toyota នៅតែមានការកើនឡើង។ លោកលី ប៊ុនហៃ បញ្ជាក់ថា ការលក់រថយន្ត Toyota មិនមានការធ្លាក់ចុះនោះទេ។ យ៉ាងណាលោកមិនបានបញ្ជាក់បរិមាណរថយន្ត Toyota ដែលបានលក់ចេញនៅទីផ្សារកម្ពុជានោះទេ៕

ចុចអាន៖ យុទ្ធសាស្រ្តទីផ្សារថ្មី តូយ៉ូតាអនុញ្ញាតិអតិថិជនទិញរថយន្តបង់រំលស់

ចុចអាន៖ Audi Q7 ស៊េរី ០១៦ តម្លៃ ១៤ ម៉ឺនដុល្លារប្រើសាំងលក់ប្រជែងហាងនាំចូល

អត្ថបទ៖ ប៊ុណ្ណារ៉ា