សុំមិត្តស្រីរៀបការឡើងគគ្រឹកគគ្រេងតែបរាជ័យ ព្រោះចិញ្ចៀនពេជ្រតូចពេក

2015-12-22 17:37:32
ចំនួនមតិ 0 | ចំនួនចែករំលែក 0

ចន្លោះមិនឃើញ

សំណើសុំរៀបការរបស់បុរសចិនម្នាក់ទៅមិត្តស្រីរបស់ខ្លួនបានបរាជ័យ បន្ទាប់ពីមិត្តស្រីរបស់បុរសនោះថា ចិញ្ចៀនសុំរៀបការនោះដាំពេជ្រទំហំតូចពេក។

តាមប្រភព Mirror សំណើសុំរៀបការគូស្នេហ៍មួយគូខាងលើនោះ បានធ្វើឡើងនៅតាមផ្លូវនៃក្រុង ឆេងឌូ ខេត្តស៊ីឈួន ប្រទេសចិន។ ទិដ្ឋភាពសុំរៀបការត្រូវគេឃើញថា មានការសម្ដែងរាំពីមុខមិត្តស្រីរបស់បុរសដែលស្នើសុំរៀបការ។ ស្របពេលនោះនារីជាមិត្តស្រីក៏បានយំដែរ ក្រោយពេលបុរសជាមិត្តប្រុស ដើរសំដៅទៅរកនាង និងបានយកប្រអប់មួយមក រួចលុតជង្គង់ បើកប្រអប់ចិញ្ចៀនដែលបញ្ជាក់ន័យថាជាសំណើសុំរៀបការទៅមិត្តស្រី។

យ៉ាងណាក្ដី សំណើសុំរៀបការរបស់បុរសនោះត្រូវមិត្តស្រីរបស់ខ្លួនបដិសេធ។ សាក្សីម្នាក់ដែលបានឃើញទិដ្ឋភាពនោះ បានប្រាប់ទៅសារព័ត៌មានទូរទស្សន៍ក្នុងស្រុកមួយថា៖ "ពេលបុរសសុំរៀបការនោះបើកប្រអប់ចិញ្ចៀន នាងបើកភ្នែកធំៗ ដៃខ្ទប់មាត់ តែពេលនោះនាងក៏ដើរចេញ មិននិយាយអ្វីមួយម៉ាត់"។

ក្រោយមក សារតាមបណ្ដាញសង្គមចិន WeChat មួយ ត្រូវគេបង្ហោះឡើង អំពីកិច្ចសន្ទនារវាងមិត្តស្រីបុរសខាងលើជាមួយមិត្តភក្តិរបស់នាង។ ក្នុងអត្ថន័យសារនោះបានបង្ហាញថា៖ " ប៉ុន្តែគាត់(មិត្តប្រុស) បានសន្យាជាមួយខ្ញុំថានឹងទិញចិញ្ចៀនពេជ្រទំហំ ១ ការ៉ាត់សម្រាប់ខ្ញុំ។ ហេតុអ្វីចិញ្ចៀនដាំពេជ្រនោះតូចម្ល៉េះ។ តើគាត់មិនគោរពសន្យា ឬមិនចង់ខ្វល់ពីខ្ញុំ" ។ នេះជាអត្ថន័យដែលមិត្តស្រីបុរសនោះបានឆ្លើយតបនឹងមិត្តភ័ក្ដិរបស់នាង៕