Ronaldo ថាអនាគតអត់ចង់ធ្វើគ្រូបង្វឹកទេ ចង់រស់នៅដូចស្ដេចវិញ

2016-01-04 20:20:25
ចំនួនមតិ 0 | ចំនួនចែករំលែក 0

ចន្លោះមិនឃើញ

Cristiano Ronaldo តារាឆ្នើមក្រុម Real Madrid បានបង្ហើបប្រាប់ឲ្យដឹងថា នឹងមិនធ្វើជាគ្រូបង្វឹក ឬអ្នកចាត់ការក្រុមឡើយ ពេលបញ្ចប់អាជីពជាកីឡាករបាល់ទាត់ តែផ្ទុយទៅវិញ កីឡាករវ័យ៣០ឆ្នាំរូបនេះ ចង់មានជីវិតរស់នៅដូចស្ដេច។

ម្ចាស់ពានរង្វាន់ Ballon d'Or ៣សម័យកាល CR7 បានប្រាប់ Sky Sports កាលពីថ្ងៃអាទិត្យថា៖ "បើអ្នកសួរខ្ញុំថា តើខ្ញុំចង់ធ្វើជាគ្រូបង្វឹកទេថ្ងៃអនាគត? ខ្ញុំអាចប្រាប់បានថា...ទេ, ទោះតំណែងប្រធានផ្នែកកីឡា ឬប្រធានក្លិប ក៏អត់ធ្វើដែរ។ តាំងពីខ្ញុំវ័យ២៧ឆ្នាំមក ខ្ញុំមានជំនួញសំលៀកបំពាក់ផ្ទាល់ខ្លួនរបស់ខ្ញុំ ហើយខ្ញុំចង់ធ្វើឲ្យយីហោ (CR7) របស់ខ្ញុំរីកចម្រើនទៅមុខជានិច្ច ព្រោះបាល់ទាត់ អាចនឹងបញ្ចប់ត្រឹមតែរយៈពេល៥, ៦, ៧ ឬ១០ឆ្នាំប៉ុណ្ណោះ”។

“ពេលនេះ ខ្ញុំមានជីវិតដ៏ល្អបំផុតមួយ ប៉ុន្តែខ្ញុំគិតថា ខ្ញុំនឹងរីករាយជាងនេះ ពេលខ្ញុំចូលនិវត្តន៍ ដែលខ្ញុំអាចមានពេលធ្វើអ្វីៗ ដែលខ្ញុំចូលចិត្ត។ តែពេលនេះខ្ញុំមិនអាចទេ ព្រោះខ្ញុំគ្មានពេល។ ប៉ុន្តែបន្ទាប់ពីនេះ ខ្ញុំចង់មានជីវិតមួយ រស់នៅដូចស្ដេច”។ ប្រធានក្រុមជម្រើសជាតិព័រទុយហ្គាល់ បញ្ជាក់បន្ថែម។

Ronaldo គឺជាកីឡាករដែលមានចំណូលច្រើនជាងគេបំផុតទី៣លើលោក។ បើយោងតាមទស្សនាវដ្ដីជំនួញអាមេរិក Forbes ដែលមានប្រាក់ចំណូលប្រចាំឆ្នាំ៨០លានដុល្លារ ហើយ Super Star រូបនេះ ក៏កំពុងតែមានគម្រោងធ្វើជំនួញធំៗដូចជា លក់សំលៀកបំពាក់យីហោ CR7 និងបើកសណ្ឋាគារ CR7 ៤កន្លែងផងដែរ៕

-ចុចអាន៖ Ronaldo បើកសណ្ឋាគារយីហោ “CR7” នៅ៤ទីក្រុងធំៗផ្សេងគ្នា

ប្រែសម្រួល៖ វិន ជីវ័ន្ត ប្រភព៖ skysports