ខន សូវៀត៖ បើចេះ៥ចំណុចនេះ ការងារទីផ្សារនឹងជោគជ័យខ្ពស់

2016-01-12 13:22:18
ចំនួនមតិ 0 | ចំនួនចែករំលែក 0

ចន្លោះមិនឃើញ

មានបទពិសោធន៍យូរឆ្នាំផ្នែកទីផ្សារ និងជាម្ចាស់អាជីវកម្មធ្វើស្លាកយីហោ Marido Services លោក ខន សូវៀត បានប្រាប់ Sabay ថា ដើម្បីឱ្យការងារទីផ្សារទទួលបានជោគជ័យខ្ពស់ អ្នកធ្វើការផ្នែកនេះគួរយល់ដឹង និងអនុវត្តតាម ៥ ចំណុចនេះ។

អតីតប្រធានទីផ្សារនៃទស្សនាវដ្ដីរថយន្តរូបនេះបន្តថា

ចំណុចទី១ រៀបចំផែនការច្បាស់លាស់ ៖ ការរៀបចំផែនការគេរៀបយ៉ាងម៉េច អាស្រ័យទៅតាមការងារនោះ ដោយចែកជាផ្នែកងាយស្រួល ក្នុងការបំពេញការងារ និងស្គាល់ពីទីផ្សារពិតប្រាកដ។ កាលណាយើងស្គាល់ទីផ្សារច្បាស់ហើយ ការងារមានអត្រាជោគជ័យច្រើន។

ចំណុចទី២ ការទាក់ទង ៖ វាមានភាពលំបាកបន្តិចតែយ៉ាងណាយើងត្រូវតែបត់បែនទៅតាមកាលៈទេសៈ ព្រោះអតិថិជនមានចិត្តមិនដូចគ្នាទេ ជាពិសេសយើងត្រូវតែបង្កើនភាពស្និទ្ធស្នាល ដើម្បីចងអតិថិជនឱ្យជាប់ក្នុងដៃ។

ចំណុចទី៣ ស្មោះត្រង់ ៖ មានសារៈសំខាន់ណាស់! អ្នកណាក៏ត្រូវការភាពស្មោះត្រង់ដែរ កាលណាយើងមិនមានភាពស្មោះត្រង់នឹងអតិថិជន វាជាការលំបាកណាស់សម្រាប់ការទាក់ទងគ្នា យើងត្រូវប្រកាន់ភ្ជាប់នូវភាពស្មោះត្រង់ជានិច្ច មិនអាចថ្ងៃនេះនិយាយអញ្ចេះ ថ្ងៃស្អែកនិយាយផ្សេងបានឡើយ បើទោះបីជាមានការខាតបង់បន្តិចបន្តួចក្ដី។

ចំណុចទី៤ ទំនុកចិត្តនិងការជឿជាក់ ៖ កាលណាយើងធ្វើឱ្យអតិថិជនមានទំនុកទុកចិត្ត និងជឿជាក់លើយើងហើយ ការងារនឹងមានភាពរលូន ព្រោះគេជឿលើយើង ថាការងារដែលគេប្រគល់ឱ្យយើងធ្វើនឹងសម្រេចដូចការគ្រោងទុករបស់គេ ហើយអតិថិជនគ្មានក្ដីបារម្ភថា វានឹងបរាជ័យឡើយ ព្រោះគេជឿលើសមត្ថភាពរបស់យើង។ ចំណែកយើងក៏ត្រូវខិតខំធ្វើឱ្យអស់ពីសមត្ថភាពដែរ។

ចំណុចទី៥ សេវាកម្ម និងគុណភាព ៖ ចំណុចនេះយើងចង់និយាយថា រាល់ផលិតផលសម្រេចដែលបញ្ជូនទៅភ្ញៀវ គឺទាមទារគុណភាពជាចម្បង មិនមែនធ្វើឱ្យរួចតែពីដៃនោះទេ អ៊ីចឹងយើងត្រូវតែពង្រីងផលិតកម្មរបស់យើងឱ្យមានគុណភាពខ្ពស់ជានិច្ច និងរហ័សទៅតាមកាលបរិច្ឆេទដែលបានព្រមព្រៀងគ្នា។

លោក ខន សូវៀត ដែលបើកអាជីវកម្ម Marido Service បានជាង ៣ ឆ្នាំរូបនេះ បានបញ្ជាក់យ៉ាងដូច្នេះថា ៥ ចំណុចខាងលើ ជាអ្វីដែលលោកបានដឹង ឆ្លងកាត់ក្នុងការងារ និងមើលឃើញថា វាធ្វើឱ្យលោកមានភាគរយជោគជ័យខ្ពស់៕

ចុចអាន៖ ថៅកែត្រី សាលម៉ុន ដែលមានចំណូល១លានកន្លះក្នុង១ឆ្នាំថា បុគ្គលិកល្អជួយអាជីវកម្មថ្កើង

អត្ថបទ៖ អ៊ុំ សុភក្តិ