គ្រុយវណ្ណាធ្លាប់អ៊ុតទូរសព្ទនិងដុតនំ មុនក្លាយជាអ្នកផលិតកម្មវិធីស្មាតហ្វូនលេចធ្លោ

2016-01-15 14:30:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថាបនិកក្តារចុចខ្មែរឆ្លាតវៃ (Khmer Smart Keyboard) លោក គ្រុយ វណ្ណា ធ្លាប់ឆ្លងកាត់ជីវិតជាអ្នកអ៊ុតទូរសព្ទ និងអ្នកដុតនំ ទម្រាំអាចក្លាយជាអ្នកជំនាញបង្កើតកម្មវិធីទូរសព្ទនិងជាម្ចាស់ក្រុមហ៊ុន AliEN DEV។

បច្ចុប្បន្នលោកជាម្ចាស់ក្រុមហ៊ុន ALiEN DEV ដែលមានកេរ្តិ៍ឈ្មោះលេចធ្លោក្នុងប្រទេសកម្ពុជា។

ប្រវត្តិការសិក្សានិងគ្រួសារ

លោកគ្រុយ វណ្ណា កើតនៅឃុំសន្លុង ស្រុកខ្សាច់កណ្ដាល ខេត្តកណ្ដាល និងមានបងប្អូន ៥នាក់ ស្រី ៣ ប្រុស២ ហើយលោកជាកូនទី៣។ កាលលោករៀននៅថ្នាក់ទី ១និងទី ២ នៅទសវត្សរ៍ឆ្នាំ៩០ ឪពុកលោកធ្វើជាជាងផ្កាយរណបទូរទស្សន៍ ហើយម្ដាយជាអ្នកលក់មាន់។ ក្រោយមកគ្រួសារវណ្ណាបានផ្លាស់ទីលំនៅមកភ្នំពេញម្តុំទួលទំពូង ហើយវណ្ណាក៏បន្តរៀនពីថ្នាក់ទី៣រហូតដល់ចប់វិទ្យាល័យ។

កាលរៀននៅវិទ្យាល័យស្ថាបនិកវ័យ ៣១ឆ្នាំ រូបនេះត្រូវជិះកង់ទៅរៀនដោយចំណាយពេលប្រហែល ២០នាទីទើបដល់សាលា។ សម្រាប់មុខវិជ្ជាលោកស្រឡាញ់ជាងគេកាលនៅវិទ្យាល័យគឺរូបវិទ្យា ដែលតែងតែចូលចិត្តស្រាវជ្រាវនិងពិសោធម្នាក់ឯងនៅផ្ទះ។

នៅពេលចូលដល់ឆ្នាំ ២០០៣ វណ្ណា ក៏បានរៀនចប់បាក់ឌុបហើយក៏បានបន្តការសិក្សានៅសាកលវិទ្យាល័យភូមិន្ទភ្នំពេញជំនាញ Programing និង Network ពេលព្រឹក និងសិក្សាថ្នាក់អាហារូបករណ៍ជំនាញអក្សរសាស្ត្រអង់គ្លេសនៅវិទ្យាស្ថានភាសាបរទេស ពេលរសៀល។

ពេលទំនេរពីការសិក្សា ១ម៉ោងឬ ២ម៉ោងនិងថ្ងៃសៅ អាទិត្យ វណ្ណាតែងតែឆ្លៀតទៅបញ្ចូលភ្លេងទូរសព្ទនិងអ៊ុតទូរសព្ទដើម្បីបានកម្រៃបន្ថែមជួយផ្គត់ផ្គង់គ្រួសារដែលមានឪពុកជាអ្នកទទួលបន្ទុកធំ។

វណ្ណាថា កាលឆ្នាំនោះពុំសូវមានអ្នកប្រកបអាជីពបញ្ចូលបទចម្រៀងទូរសព្ទនិងអ៊ុតទូរសព្ទនេះទេ ដូច្នេះលោកអាចរកចំណូលបានគួរសម។ ប្រាក់ចំណូលដែលសល់ពីថ្លៃជួលកន្លែងចំនួន៤០០ដុល្លារក្នុងមួយខែ វណ្ណាឱ្យទៅឪពុកលោកទាំងអស់សម្រាប់ផ្គត់ផ្គង់គ្រួសារ។

ក្រោយរៀនចប់មហាវិទ្យាល័យជាស្ថាពរនៅឆ្នាំ ២០០៧ វណ្ណានិងមិត្តភ័ក្ដិជិតស្និទ្ធប៉ុន្មាននាក់ទៀតបានធ្វើការឱ្យក្រុមហ៊ុនមួយដែលជួលពួកគេឱ្យបង្កើត System គ្រប់គ្រងការលក់ឥវ៉ាន់ក្នុងម៉ាត តែដោយសារក្រុមហ៊ុននោះទើបបើកថ្មី ក៏ត្រូវក្ស័យធនទៅវិញមិនយូរប៉ុន្មាន។

ជាប់អាហារូបករណ៍ទៅជប៉ុន ខណៈពុំទាន់មានការងារធ្វើ

នៅឆ្នាំដដែល (២០០៧) ក្រោយពេលក្រុមហ៊ុនដែលជួលលោកនិងមិត្តភ័ក្ដិទៅធ្វើការក្ស័យធន លោកក៏នៅជួយកិច្ចការឪពុកនៅហាងលក់ទូរសព្ទនៅផ្ទះ ហើយក៏ប្រឹងរៀនត្រៀមប្រឡងអាហារូបករណ៍ទៅជប៉ុន។

ទីបំផុត វណ្ណាបានជាប់អាហារូបករណ៍ទៅរៀនថ្នាក់អនុបណ្ឌិតរយៈពេល៣ឆ្នាំ នៅជប៉ុន ឃ្លាតឆ្ងាយពីគ្រួសារ។

វណ្ណាថា កាលនោះមានបេក្ខជនប្រឡងដល់ទៅ ៤០០នាក់ តែសាលាជ្រើសរើសយកតែ១០នាក់ប៉ុណ្ណោះត្រូវទៅបន្តការសិក្សាថ្នាក់អនុបណ្ឌិតនៅជប៉ុន ហើយវណ្ណាដែលជាអតីតនិស្សិតឆ្នើមផ្នែក IT នៅសាលាភូមិន្ទភ្នំពេញក៏ស្ថិតក្នុងចំណោមបេក្ខជន ១០នាក់នោះដែរ។

ជំនាញដែលវណ្ណាត្រូវសិក្សាថ្នាក់អនុបណ្ឌិតនៅជប៉ុននោះគឺ Khmer OCR ដែលផ្ដោតទៅលើបច្ចេកទេសស្កេនឯកសារលើក្រដាសហើយបញ្ចូលទៅក្នុង Microsoft Word ដែលអាចកែបាន។ ការសិក្សាថា្នក់អនុបណ្ឌិតនៅជប៉ុនមានរយៈពេល៣ឆ្នាំ ដោយរួមបញ្ចូលទាំងការសិក្សាបំប៉នភាសាជប៉ុនរយៈពេល១ឆ្នាំផងដែរ។

នៅពេលចាប់ផ្តើមរៀនពេញលេញនៅឆ្នាំទីពីរ វណ្ណាឆ្លៀតទៅធ្វើការជាអ្នកធ្វើនំនៅហាង McDonald's ពីម៉ោង ៥ដល់៩ព្រឹក ដែលក្នុងមួយម៉ោងបាន ១០ដុល្លារ ហើយក្នុងមួយថ្ងៃលោកអាចរកប្រាក់បានខ្ទង់ ៤០ដុល្លារ តែធ្វើការប៉ុន្មានថ្ងៃប៉ុណ្ណោះក្នុងមួយសប្ដាហ៍។

ចំពោះការលំបាកពេលធ្វើការជាអ្នកដុតនំ វណ្ណាថា លំបាកដែរព្រោះត្រូវក្រោកពីព្រឹកជិះកង់ដែលសិស្សច្បងឱ្យហ្នឹងទៅធ្វើការ ហើយរដូវរងាវិញត្រជាក់ខ្លាំង ស្ពឹកដៃ។

យ៉ាងណាមិញ វណ្ណាថាលោកធ្វើនៅ McDonald's បានតែកន្លះឆ្នាំ ក៏មកធ្វើការឱ្យក្រុមហ៊ុន Asial ប្រទេសជប៉ុន ក្នុងតំណែងជាអ្នកបង្កើតកម្មវិធីទូរសព្ទ រហូតដល់ក្លាយជាបុគ្គលិកពេញសិទ្ធធ្វើការពេញម៉ោង បានប្រាក់ ៣០០០ដុល្លារ/ខែ។

ត្រឡប់មកបើកក្រុមហ៊ុនខ្លួនឯងនៅខ្មែរ ព្រោះតែភាពឯកា ចង់បានសេរីភាពហើយនឹករលឹកគ្រួសារខ្លាំង

ក្រោយធ្វើការឱ្យក្រុមហ៊ុន Asial បាន៣ ឆ្នាំ វណ្ណាក៏មានអារម្មណ៍ថាឯកោ នឹកគ្រួសារ ហើយចង់បានសេរីភាពច្រើន ក៏សម្រេចចិត្តបោះបង់ចោលប្រាក់ខែ ៣០០០ដុល្លារនៅជប៉ុន មកធ្វើការនៅស្រុកខ្មែរវិញ។

“ធ្វើការនៅនោះ (ជប៉ុន) យូរទៅមានអារម្មណ៍ថានៅតែឯង ហើយណាមួយនឹកផ្ទះខ្លាំងមែនទែន"។ វណ្ណាបន្ថែម "ម្នាក់ៗវក់នឹងការងារស្ទើរស្លាប់ស្ទើររស់ ដូចមិនសូវមានសេរីភាពច្រើនដូចនៅខ្មែរទេ។ អ្នកខ្លះព្រោះតែបរាជ័យនឹងការងារ រហូតដល់សម្លាប់ខ្លួនក៏មានដែរ។

នៅឆ្នាំ ២០១៤ វណ្ណាបានបង្កើតក្រុមបង្កើតកម្មវិធីទូរសព្ទមួយឈ្មោះ ALiEN DEV ដោយមានគ្នា៤នាក់ ហើយពាក់កណ្ដាលឆ្នាំ ២០១៤ ក៏បានបង្កើតក្តារចុចសម្រាប់ iOS ដោយមានឈ្មោះថា Khmer Smart Keyboard។

**ក្តារចុចខ្មែរឆ្លាតវៃ (Khmer Smart Keyboard)ធ្វើឱ្យ ALiEN DEV កាន់តែលេចធ្លោ

ដោយសារ Khmer Smart Keyboard ទទួលបានការគាំទ្រខ្លាំង ទើប Developer វ័យក្មេងរូបនេះសម្រេចចិត្តបង្កើតជាក្រុមហ៊ុនតូច ALiEN DEV ដោយបានចូលហ៊ុនជាមួយមិត្តភ័ក្ដិម្នាក់ទៀត សរុបទុន ១ម៉ឺនដុល្លារ។

វណ្ណាថា រយៈពេលប្រហែលជាងមួយឆ្នាំដែលក្តារចុចខ្មែរឆ្លាតវៃដាក់ឱ្យប្រើលើ iOS និង Android ឃើញថាមានការពេញនិយមខ្លាំង និងមានការជួយជ្រោមជ្រែងឧបត្ថម្ភពីពលរដ្ឋខ្មែរនិងបណ្ដាស្ថាប័ននានា ហើយក្រុមលោកបានព្យាយាមរិះរកមុខងារថ្មីៗដើម្បីបន្ថែមលើកម្មវិធីក្តារចុចនេះឱ្យកាន់តែទំនើប។

វណ្ណាថា មកទល់ពេលនេះ Khmer Smart Keyboard មានអ្នកទាញយកប្រមាណ ៣៨ម៉ឺននាក់មកហើយ ដែលនេះជាសញ្ញាវិជ្ជមានមួយសម្រាប់ ALiEN DEV។

ចំពោះសមិទ្ធផលលេចធ្លោរដែល ALiEN DEV មានលោក វណ្ណាជាអ្នកដឹកនាំ មានដូចជា Khmer Smart Keyboard និងកម្មវិធី ឆ្លាត Drive (បច្ចុប្បន្នកំពុងស្ថិតក្នុង Beta Version)។

គោលបំណងពេលអនាគត

ស្ថាបនិកវ័យក្មេងគ្រុយ វណ្ណា ថាពេលអនាគត ក្រុមលោកនឹងរិះរកបង្កើតកម្មវិធីថ្មីៗនិងមានប្រយោជន៍ដល់ពលរដ្ឋខ្មែរ និងបន្ថែមមុខងារថ្មីកែអក្ខរាវិរុទ្ធភាសាខ្មែរសម្រាប់ Khmer Smart Keyboard ដើម្បីសម្រួលដល់ការសរសេរភាសាខ្មែរតាមទូរសព្ទកុំឱ្យមានកំហុស។

យ៉ាងណាក៏ដោយវណ្ណាថា ដើម្បីអាចបង្កើតមុខងារថ្មីនេះឱ្យបានជោគជ័យ ក្រុមលោកត្រូវប្រើពេលប្រហែល ៣ទៅ ៤ខែ ក្នុងការស្រង់ទិន្នន័យអក្សរខ្មែរសម្រាប់មុខងារថ្មីលើ Khmer Smart Keyboard។

លើសពីនេះស្ថាបនិកវ័យ ៣១ឆ្នាំរូបនេះក៏បានអំពាវនាវដល់យុវជនជំនាន់ក្រោយរៀនជំនាញ IT ថា "ខ្ញុំចង់ឃើញយុវជនជំនាន់ IT ក្រោយៗ ចេះស្រាវជ្រាវ និងខិតខំបង្កើតអ្វីដែលខ្លួនចូលចិត្ត ដើម្បីដើរអោយទាន់ប្រទេសដទៃ"៕

អាន៖ យុវតីវ័យក្មេងជម្នះរៀនខ្លួនឯងនៅផ្ទះ៣ឆ្នាំ រហូតក្លាយជាអ្នក Design ហ្គេមលេចធ្លោក្នុងស្រុក

អត្ថបទ៖ ប៉ែត ផាន់និត