ធ្វើការជាមួយអ្នកសុំ យើងជាអ្នកក្រ ធ្វើការជាមួយអ្នកឱ្យ យើងជាអ្នកមាន

2016-01-26 21:55:39
ចំនួនមតិ 0 | ចំនួនចែករំលែក 0

ចន្លោះមិនឃើញ

“ធ្វើការជាមួយអ្នកសុំយើងជាអ្នកក្រ ធ្វើការជាមួយអ្នកឱ្យយើងជាអ្នកមាន" នេះជាទស្សនៈមួយដែល លោក សោម សម្បត្តិ ថ្លែងទៅកាន់អ្នកចូលរួម ក្នុងសិក្ខាសាលាមួយស្ដីពី "សិល្បៈនៃការដឹកនាំ" កាលពីពេលថ្មីៗនេះ។

នាយកប្រតិបត្តិនៃសហគ្រាសផលិតថ្នាំពណ៌ជាតិ Cam-Paint រូបនេះ បានប្រាប់ពីអតីតកាលរបស់ខ្លួនថា កាលពីអាយុមិនដល់២០ឆ្នាំ លោកបានចេញពីផ្ទះ ដើម្បីស្គាល់ពិភពខាងក្រៅ។ ក្រោយមកលោកបានធ្វើជាទាហានម្នាក់ ប៉ុន្តែដោយយល់ពីទ្រឹស្ដីមួយឃ្លាថា "ស្រុកសង្គ្រាមត្រូវការអ្នកក្លាហាន ស្រុកថ្កើងថ្កានត្រូវការអ្នកចេះដឹង" យុវជន សោម សម្បត្តិ បានសុំការអនុញ្ញាតពីថ្នាក់ដឹកនាំរបស់ខ្លួនទៅជំរំមួយរយៈ ដើម្បីរៀនសូត្រភាសាខ្មែរ អង់គ្លេស និងថៃ ដោយរំពឹងថានឹងបានប្រាក់ខែ ៣០០ ដុល្លារក្នុងមួយខែ។

លោកមិនដែលរំពឹងថា បានប្រាក់ខែពាន់ដុល្លារទេ៖ “ខ្ញុំប្រាប់មេខ្ញុំថា នែ៎បង ខ្ញុំសុំទៅជំរំមួយរយៈ ដើម្បីរៀនភាសាក្រែងបានក្លាយជាអ្នកបកប្រែ យ៉ាងហោចណាស់បានប្រាក់ខែ ៣០០ ដុល្លារ គ្រាន់ចិញ្ចឹមប្រពន្ធកូនដែរ"។

ក្រោយរៀនភាសាបាន ៨ ខែគត់ លោកបានទៅសម្ភាសន៍ធ្វើជាអ្នកបកប្រែសម័យ UNTAC ហើយពេលនោះលោកក៏ធ្វើបានសម្រេចដូចក្ដីប្រាថ្នា។

លោកបានបញ្ជាក់ ក្នុងអគារសហប្រតិបត្តិការកម្ពុជា-ជប៉ុនថា៖ "ក្រោយសម័យ UNTAC ក្នុងចំណោមអ្នកបកប្រែសឹងទាំងអស់ សុទ្ធតែទៅ NGO ហើយគ្មាននរណាម្នាក់ក្លាហានចេញពី NGO ទៅក្រុមហ៊ុនឯកជនដូចខ្ញុំទេ។ ទៅ NGO ប្រាក់ខែទាបបំផុត ១ ៧០ ដុល្លារ ធ្វើការច័ន្ទ-សុក្រ ខ្ញុំធ្វើការឱ្យឯកជនបានតែ ៨០ដុល្លារធ្វើការ ៦ ថ្ងៃ។ គេថាខ្ញុំឆ្កួត! ហេតុអីមិនធ្វើឱ្យអង្គការក្រៅរដ្ឋាភិបាលបានប្រាក់ខែច្រើន ហើយធ្វើការតិច។ ខ្ញុំឆ្លើយថា មកពីខ្ញុំចង់មាន! អង្គការជាអ្នកសុំលុយគេ ចំណែកក្រុមហ៊ុនជាអ្នកឱ្យលុយគេ។ អ៊ីចឹងធ្វើការជាមួយអ្នកសុំ យើងជាអ្នកក្រ ធ្វើការជាមួយអ្នកឱ្យ យើងជាអ្នកមាន"។

លោក សោម សម្បត្តិ ជាមនុស្សម្នាក់ដែលស្រែកឃ្លានចំណេះដឹង ហើយចូលចិត្តអ្វីថ្មីនិងប្លែក។ មុនបើកក្រុមហ៊ុនផ្ទាល់ខ្លួនដូចសព្វថ្ងៃ លោកបានធ្វើឱ្យអង្គការ និងក្រុមហ៊ុនឯកជនសរុបចំនួន ១១ ហើយ។ ចំណែកជីវប្រវត្តិវិញ លោក សោម សម្បត្តិ ជាកូនច្បងក្នុងគ្រួសារជីវភាពលំបាក ហើយលោកមានកម្រិតវប្បធម៌ត្រឹមថ្នាក់ទី ៦ ប៉ុណ្ណោះ៕

ចុចអាន៖ ទ្រឹស្ដីដឹកនាំពីលោក សោម សម្បត្តិ ក្មេងកំព្រារៀនថ្នាក់ទី៦រហូតមានក្រុមហ៊ុនផ្ទាល់ខ្លួន

ចុចអាន៖ លោកស្រី ជុន សុថានី ៖ ក្រុមហ៊ុនមួយនឹងក្ស័យធន បើគ្មានការគ្រប់គ្រងសាច់ប្រាក់

អត្ថបទ៖ អ៊ុំ សុភក្តិ