ម៉ា ច័ន្ទបញ្ញា តារាចម្រៀងវ័យក្មេងកម្ពុជាជាប់បេក្ខភាព ៥នាក់ចុងក្រោយ Fashion Asia Award នៅចិន
- 2014-10-23 15:58:37
- ចំនួនមតិ 0 | ចំនួនចែករំលែក 0
ម៉ា ច័ន្ទបញ្ញា តារាចម្រៀងវ័យក្មេងកម្ពុជាជាប់បេក្ខភាព ៥នាក់ចុងក្រោយ Fashion Asia Award នៅចិន
ចន្លោះមិនឃើញ
យុវជនវ័យក្មេងកម្ពុជា ម៉ា ច័ន្ទបញ្ញា បានក្លាយជាបេក្ខភាពតារាចម្រៀង ៥នាក់ចុងក្រោយក្នុងកម្មវិធី Fashion Asia Award 2014 នៅប្រទេសចិន។
តារាចម្រៀងវ័យក្មេងរូបនេះនឹងត្រូវប្រកួតប្រជែងសមត្ថភាពជាមួយយុវជន មកពី៥ប្រទេសផ្សេងទៀតនៅទូទាំងទ្វីបអាស៊ីនាថ្ងៃទី២ ដល់ថ្ងៃទី១០ ខែវិច្ឆិកា ខាងមុខនៅ ចិន ដើម្បីដណ្ដើមជយលាភីជា Asia Top Fashionable Singer Of The Year។
យុវជន ម៉ា ច័ន្ទបញ្ញា ក្នុងកម្មវិធី Hear My Song កន្លងទៅ
មុនមកដល់វគ្គ ៥នាក់ចុងក្រោយយុវជនពោរពេញដោយសមត្ថភាពរបស់ កម្ពុជា ខាងលើត្រូវបានកម្មវិធីវាយតម្លៃយ៉ាងលម្អិតជាមួយយុវជនជាច្រើនក្នុងទ្វីបអាស៊ី។
តារាចម្រៀងវ័យក្មេង ម៉ា ច័ន្ទបញ្ញា និយាយថា៖"ខ្ញុំសប្បាយចិត្ត ហើយស្ទើរតែមិនជឿពេលគេ Callមកថាខ្ញុំជាប់ ៥នាក់ចុងក្រោយ។ ជាប់ឬធ្លាក់មិនសំខាន់ទេ តែនេះជាមោទនភាពបំផុតសម្រាប់ខ្ញុំក្នុងនាមតំណាងឱ្យកម្ពុជាក្នុងកម្មវិធី Fashion Asia Award”។
យុវជនវ័យ ២២ឆ្នាំដែលចេះតែងនិពន្ធទាំងទំនុកភ្លេង និងទំនុកច្រៀងរូបនេះ នឹងត្រូវប្រកួតប្រជែងជាមួយយុវជន ពីបណ្ដាប្រទេសផ្សេងទៀតមានដូចជា ម៉ាឡេស៊ី ម៉ុងហ្គោលី តៃវ៉ាន់ និង ក្រុងម៉ាកាវ។
លោក ម៉ា ច័ន្ទបញ្ហា បន្តថាកត្តានាំឱ្យលោកក្លាយជាបេក្ខភាព ៥នាក់ចុងក្រោយនាកម្មវិធី Fashion Asia Award នាពេលនេះ ដោយមានការណែនាំពីមិត្តភ័ក្ដិម្នាក់នៅក្នុងស្រុក ហើយកម្មវិធីតម្រូវឱ្យបំពេញលក្ខខណ្ឌមួយចំនួនតាមការចង់បានរបស់គេ។
បើទោះជាលទ្ធផលចេញមកបែបណាក៏ដោយ យុវជនដែលមានបទពិសោធន៍ក្នុងការតែងនិពន្ធខាងលើ អះអាងថានឹងប្រឹងប្រែងឱ្យអស់ពីសមត្ថភាព ក្នុងការបង្ហាញពីប្រពៃណី វប្បធម៌រួមនឹងសមត្ថភាពពិតរបស់យុវជនកម្ពុជានៅលើឆាកអន្តជាតិ។
ក្រោយពីត្រឡប់មកពីប្រកួតប្រជែងនៅប្រទេស ចិនវិញ ម៉ា ច័ន្ទបញ្ញា នឹងទៅទទួលពានជាអ្នកនិពន្ធវ័យក្មេងពីព្រះមហាក្សត្រីនៅប្រទេស ថៃ។ ក៏ប៉ុន្តែលោកមិនទាន់ច្បាស់ពីកាលបរិច្ឆេទជាក់លាក់នៅឡើយទេ ដោយកម្មវិធីមិនទាន់ផ្ដល់ដំណឹងមក។
លោក ម៉ា ច័ន្ទបញ្ហា ជាតារាចម្រៀង អ្នកនិពន្ធបទភ្លេង និងទំនុកច្រៀងល្បីឈ្មោះក្នុងបណ្ដាញសង្គម Facebook និង youtube ។ មកទល់នឹងពេលនេះលោកមានវ័យ ២២ឆ្នាំ ហើយផលិតបទចម្រៀងជាស្នាដៃនិពន្ធផ្ទាល់ខ្លួនបានជាង ៤០បទ។
http://youtu.be/QjTnu1cw88s
បទចម្រៀងជាការនិពន្ធផ្ទាល់ដៃរបស់លោកដែលទទួលការចាប់អារម្មណ៍បានការគាំទ្រខ្លាំងពីមហាជនមានដូចជា បទ"មនុស្សស្មោះ មិនអស់សង្ឃឹម" និងបទ "តំណក់ភ្លៀងសាយណ្ហ"។
មុននឹងមានមុខលើឆាកអន្តជាតិបែបនេះ ម៉ា ច័ន្ទបញ្ញា ធ្លាប់តាំងចិត្ត និងយាយប្រាប់ទស្សនិកជនថា៖"ខ្ញុំតាំងចិត្តពីតូចមកម្ល៉េះថាថ្ងៃណាមួយ ខ្ញុំនឹងនាំសិល្បៈខ្មែរទៅឆាកអន្តជាតិ ទោះជាលំបាកបែបណាក៏ដោយ"៕
អានអត្ថបទបន្ត៖ផលិតករភាពយន្តដ៏ល្បីតំណាងឲ្យខ្មែរមួយរូបជាប់ពានរង្វាន់ពហុ
អានអត្ថបទបន្ត៖រឿង១ឈុតៗសាហាវណាស់ តែធាតុពិតអីចឹងសោះ!
អត្ថបទ៖ អ៊ីង សុឡា