ដោយសារភាពស្មោះត្រង់... ចោលអាំងប៉ាវ ១០០ដុល្លារ យក ១០ដុល្លារ
- 2016-02-08 15:29:15
- ចំនួនមតិ 0 | ចំនួនចែករំលែក 0
ដោយសារភាពស្មោះត្រង់... ចោលអាំងប៉ាវ ១០០ដុល្លារ យក ១០ដុល្លារ
ចន្លោះមិនឃើញ
បុណ្យចូលឆ្នាំចិនមកដល់ហើយ ក្មេងៗដូចខ្ញុំចាំតែយកអាំងប៉ាវពីចាស់ៗ ហើយវាធ្វើឱ្យខ្ញុំនឹកឃើញកាលពីឆ្នាំមុន ខ្ញុំបានលះបង់អាំងប៉ាវ ១០០ ដុល្លារយកអាំងប៉ាវ ១០ ដុល្លារវិញ។
ការពិតទៅខ្ញុំមិនមែនជាកូនកាត់ចិនអីទេ តែចូលចិត្តរាប់អានគ្រួសារកាត់ចិន។ នៅថ្ងៃនោះដែរ មានអ៊ំស្រីម្នាក់ដែលជាអ្នកស្គាល់គ្នាជាមួយម៉ាក់ខ្ញុំ បានមកលេងផ្ទះខ្ញុំ។ អ៊ំស្រីកាត់ចិននោះ គាត់ចិត្តល្អណាស់ហើយតែងតែឱ្យអាំងប៉ាវខ្ញុំរាល់ឆ្នាំ។
ឆ្នាំនេះគាត់ក៏ឱ្យអាំងប៉ាវខ្ញុំនិងបងស្រីខ្ញុំដែរ បន្ទាប់ពីអរគុណគាត់ហើយ ខ្ញុំបានទៅបើកអ៊ុតមើល នៅក្នុងបន្ទប់ម្នាក់ឯងស្រាប់តែខ្ញុំ ឃើញលុយ ១១០ ដុល្លារក្នុងនោះ។ ខ្ញុំពិតជាភ្ញាក់ផ្អើលហើយសប្បាយចិត្ត ដោយគិតថាឆ្នាំនេះរាសីឡើងមែន បានអាំងប៉ាវធំ។
តែបន្តិចក្រោយមកខ្ញុំចាប់ផ្ដើមឆ្ងល់! រាល់ដងមិនថា ឱ្យលុយចាយ ឬ តិអៀទេ គាត់ឱ្យតែត្រឹម ២០ ដុល្លារចុះប៉ុណ្ណោះ មិនដែលឱ្យលើសហ្នឹងទេ។ មិនអស់ចិត្តខ្ញុំក៏ហៅបងស្រីខ្ញុំមកសួរ គាត់ថាគាត់បានតែ ២០ ដុល្លារទេ ចុះម៉េចក៏ខ្ញុំបានដល់ ១១០ ដុល្លារ។ មិនប្រាប់ក៏ដឹងថា អ៊ំប្រាកដជាច្រឡំមិនខាន។
(រូបតំណាង)
ខ្ញុំក៏ចុះទៅក្រោមជួបអ៊ំស្រីវិញ ព្រោះគាត់កំពុងតែជជែកលេងជាមួយម៉ាក់ខ្ញុំ។ ខ្ញុំប្រាប់គាត់ថា «អ៊ំ! ឱ្យអាំងប៉ាវខ្ញុំច្រឡំហើយ»។ គាត់សួរ «ច្រឡំម៉េច?»។ ខ្ញុំបង្ហាញអាំងប៉ាវឱ្យគាត់ឃើញថាលុយមាន ១១០ ដុល្លារហើយហុចឱ្យគាត់។ គាត់ទទួលយកហើយអរគុណខ្ញុំ ដោយគាត់ដក ១០០ ដុល្លារទុកវិញហើយឱ្យអាំងប៉ាវ ១០ ដុល្លារមកខ្ញុំ ព្រោះគាត់អស់លុយរាយហើយ។
គាត់ប្រាប់ថាគាត់ចង់តិអៀឱ្យខ្ញុំ ២០ ដុល្លារ គាត់មើលមិនច្បាស់ស្មានតែក្រដាស ១០ ដុល្លារពីរសន្លឹកទើបដាក់ចូលឱ្យខ្ញុំ។ ឯលុយ ១០០ ដុល្លារដែលគាត់ច្រឡំនោះគឺជាលុយដែល ក្មួយៗគាត់តិអៀជូនគាត់ទេ។
គាត់ប្រាប់ទៀតថា នេះជាមូលហេតុមួយក្នុងចំណោមមូលហេតុផ្សេងទៀតដែលគាត់រាប់អានគ្រួសារខ្ញុំ ព្រោះអ្នកផ្ទះពួកយើងសុទ្ធតែជាមនុស្សស្មោះត្រង់។ កាលនោះបើនិយាយពីអារម្មណ៍ខ្ញុំផ្ទាល់ស្ដាយដែរ ប៉ុន្តែខ្ញុំមិនចង់បានលុយដែលម្ចាស់គេមិនចង់ឱ្យទេ ទើបទទួលយកអាំងប៉ាវ ១០ ដុល្លារនោះទោះជាវាតិច តែខ្ញុំសប្បាយចិត្ត អ៊ំស្រីអ្នកតិអៀក៏សប្បាយចិត្ត ម៉ាក់ខ្ញុំនិងបងស្រីខ្ញុំក៏សប្បាយចិត្តព្រោះខ្ញុំជាមនុស្សស្មោះត្រង់។
ដោយឡែកឆ្នាំនេះសង្ឃឹមថា នឹងបានអាំងប៉ាវច្រើនៗ មិនច្រឡំដូចលើកមុនចុះ! រីករាយឆ្នាំថ្មី បង Sabay និង អ្នកអាន Sabay៕
ចុចអាន៖ ស្រឡាញ់បែបណាទើបត្រូវចិត្តអូន?
អានអត្ថបទច្រើនទៀត សូមចុចត្រង់នេះ
អត្ថបទ៖ ម៉ន សុនិត្តា
មានអត្ថបទ ចង់ចែករំលែកសូមផ្ញើមកកាន់ e-mail: kong.chanvanneng@sabay.com
ព័ត៌មានបន្ថែមសូមទូរសព្ទ ទៅកាន់លេខ ០១០ ៧០០ ៧២៧