ជម្រុះ Tiger Street Football Festival 2016 ចុងសប្ដាហ៍នេះនៅខេត្តព្រះសីហនុឆ្ពោះទៅប្រាក់រង្វាន់១ម៉ឺនដុល្លារ

2016-02-08 17:08:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ខេត្តដែលត្រូវជម្រុះដំបូងសម្រាប់កម្មវិធី Tiger Street Football Festival 2016 ឆ្ពោះទៅទឹកប្រាក់ ១ ម៉ឺនដុល្លារអាមេរិកនៅវគ្គផ្ដាច់ព្រ័ត្រ គឺ ខេត្តព្រះសីហនុ។ វគ្គជម្រុះធ្វើឡើងទៅថ្ងៃទី ១៣ & ១៤ កុម្ភៈ ចុងសប្ដាហ៍នេះ នាឆ្នេរអូឈើទាល។

ជំហានបន្ទាប់នៃវគ្គជម្រុះតាមតំបន់ដូចគ្នានឹងធ្វើដំណើរទៅខេត្តកំពង់ចាមនៅថ្ងៃទី ២០&២១ កុម្ភៈនៅមុខសាលាគរុកោសល្យខេត្ត។ ចំណែកថ្ងៃទី ២៧ & ២៨ កុម្ភៈ ជម្រុះនៅខេត្តសៀមរាប និង បន្តទៅ ថ្ងៃទី ៥ & ៦ មីនា លើទឹកដីខេត្តបាត់ដំបង មុនចាប់ផ្ដើមនៅភ្នំពេញពីថ្ងៃទី ១១ ដល់ ១២ មីនា នៅមុខសាលមហោស្រពមជ្ឈមណ្ឌលសន្និបាត និង ពិព័រណ៍ កោះពេជ្រ រាជធានីភ្នំពេញ។

ចក្ខុវិស័យរបស់ក្រុមហ៊ុនស្រាបៀរថៃហ័្គរ ដែលនាំមកជូននូវព្រឹត្តិការណ៍បាល់ទាត់ Tiger Street Football Festival នេះ ក្នុងគោលដៅជំរុញឱ្យយុវជននៅកម្ពុជា បានចូលរួមចំណែកយ៉ាងសកម្ម ដើម្បីបញ្ចេញទេពកោសល្យ និងជំនាញផ្ទាល់ខ្លួនដើម្បីរួមគ្នាពន្លឿនវិស័យបាល់ទាត់នៅកម្ពុជា។ ឆ្នាំនេះអ្នករៀបចំកម្មវិធីរំពឹងថាមានក្រុមប្រមាណ ៣២០ ក្រុមចូលរួមក្នុងយុទ្ធនាការជម្រុះតាមខេត្តខាងលើរហូតដល់ជុំផ្ដាច់ព្រ័ត្រដែលត្រូវបានចម្រាញ់យក ៣២ ក្រុម។

នេះជាឆ្នាំទី៤ហើយដែលក្រុមហ៊ុនស្រាបៀរថៃហ្គ័ររៀបចំកម្មវិធី Tiger Street Football Festival ដែលមានប្រាក់រង្វាន់រហូតដល់ ១ម៉ឺនដុល្លារអាមេរិក៕

ជើងឯកទូទាំងប្រទេសឆ្នាំមុនរបស់ Tiger Street Football Festival 2015 បានទៅលើ VICTORY FC A ទទួលបានទឹកប្រាក់ ១ ម៉ឺនដុល្លារ ជើងឯករង OV MAL TRUE BRANDS ទទួលបានទឹកប្រាក់ ៥ ពាន់ដុល្លារ និង លេខ៣ សម្ព័ន្ធ គ.ស.ន.ប.ក ទទួលបានទឹកប្រាក់ ២៥០០ ដុល្លារ៕

អត្ថបទ៖ ស្រណោះ