កូនស្រីមើលលែងស្គាល់ម្ដាយក្រោយវះកាត់កែសម្ផស្ស

2016-02-23 20:48:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កូនស្រីដែលមានអាយុ ១ខួប ៣ខែ មើលអ្នកមានគុណខ្លួនលែងស្គាល់បន្ទាប់ពីអ្នកម្ដាយរូបនេះចូលរួមក្នុងកម្មវិធីកែសម្ផស្សដ៏ល្បីឈ្មោះរបស់កូរ៉េខាងត្បូង "Let Me In”។

អ្នកម្ដាយកូនពីរ Jin Young មកពីប្រទេសកូរ៉េខាងត្បូងបានសម្រកទម្ងន់អស់ ៤៥គីឡូបន្ទាប់ពីចូលរួមក្នុងកម្មវិធី "Let Me In”។ នារីមានកម្ពស់ ១,៧៨ម រូបនេះបានឡើងគីឡូគួរឲ្យកត់សម្គាល់បន្ទាប់ពីនាងឈប់ធ្វើការងារផ្ទះ និងចាប់ផ្ដើមមានចំណង់ចង់ញ៉ាំច្រើនជាងមុនបន្ទាប់ពីសម្រាលកូនរួច។ Jin Young ថែមទាំងបានបញ្ចុកមីកញ្ចប់ទៅឲ្យកូនស្រីអាយុ ១៥ ខែរបស់ខ្លួនញ៉ាំទៀតផង។ "ខ្ញុំបញ្ចុកកូនឲ្យញ៉ាំមីកញ្ចប់ដើម្បីខ្ញុំអាចញ៉ាំវាដែរ"។

វេជ្ជបណ្ឌិតនៅមន្ទីរពេទ្យ ID hospital Korea plastic Surgery ដែលជាអ្នករ៉ាប់រងធ្វើការវះកាត់ឲ្យអ្នកម្ដាយរូបនេះបានឲ្យដឹងថា ចំណង់អាហារហួសហេតុរបស់នាងគឺជាមូលហេតុចម្បងដែលធ្វើឲ្យនាងឡើងគីឡូច្រើនដល់ថ្នាក់នេះ តែអ្នកម្ដាយកូនពីរនេះមិនបានព្យាយាមដើម្បីសម្រកគីឡូនោះទេ។ ចូលរួមក្នុងកម្មវិធីនេះ Jin Young ត្រូវបានអ្នកត្រួតពិនិត្យតម្រូវឲ្យតមអាហារយ៉ាងតឹងតែង។ បន្ទាប់ពីស្រកគីឡូបានសម្រេច ពេទ្យក៏បានជាសាច់ដែលយារធ្លាក់សល់ពីការសម្រកទម្ងន់ចោលផងដែរ។

ទន្ទឹមនឹងការសម្រកគីឡូ Jin Young ក៏ត្រូវបានគេកែមុខ ឲ្យមើលទៅមានទម្រង់ V Line និងបណ្ដឹងស្បែកកុំឲ្យជ្រីវជ្រួញផងដែរ។ បន្ទាប់ពីឃ្លាតឆ្ងាយពីគ្រួសារអស់រយៈពេល ៩២ ថ្ងៃ Jin Young ពិតជារំភើបខ្លាំងណាស់នៅពេលអាចជួបជុំនឹងស្វាមីក៏ដូចជាកូនៗរបស់ខ្លួនវិញ។ យ៉ាងណាមិញ អ្នកម្ដាយរូបនេះបែរជាត្រូវជួបទុក្ខថ្មីមួយទៀតនៅពេលកូនស្រីអាយុ ១៥ ខែរបស់នាងមើលមិនស្គាល់នាង ហើយតោងឪពុកឡើងជាប់មិនហ៊ានមកក្បែរម្ដាយ។ នៅពេលឃើញទិដ្ឋភាពដូចនេះ Jin Young ធ្វើអ្វីមិនចេញបានត្រឹមឈរស្រក់ទឹកភ្នែក។

សំណាងល្អ មានតែកូនស្រីពៅម្នាក់ប៉ុណ្ណោះដែលមើលមិនស្គាល់ម្ដាយ ដោយកូនស្រីច្បងនៅតែចំណាំបានម្ដាយរបស់ខ្លួនហើយក៏បានសរសើរអ្នកមានគុណថាស្អាតជាងមុន។ Jin Young ដែលទទួលបានការវះកាត់កែសម្ផស្សបានសម្រេចនេះ បានសន្យាថា ចាប់ពីពេលនេះទៅនាងនឹងបញ្ចុកតែអាហារណាដែលមានជីវជាតិប៉ុណ្ណោះសម្រាប់កូនៗ៕