ចប់និយាយ! មិត្តខ្ញុំ ថ្ងៃម៉ាក់ប៉ាវាផ្សំដំណេកវាទៅគេងប្រឡោះកណ្ដាល...

2016-02-29 18:06:36
ចំនួនមតិ 0 | ចំនួនចែករំលែក 0

ចន្លោះមិនឃើញ

នឹកឃើញរឿងនេះខ្ញុំហួសចិត្តចង់បោកក្បាល! ខ្ញុំមានមិត្តភ័ក្ដិម្នាក់ នាងឈ្មោះ អង្គា។ កាលនោះខ្ញុំអាយុ ១១ ឆ្នាំ ហើយនាងអាយុ ១០ ឆ្នាំ ពួកយើងនៅផ្ទះជិតគ្នាហើយតែងតែលេងបាយឡុកបាយឡជាមួយរាល់ថ្ងៃ។

ម្ដាយឪពុកនាងបានលែងលះគ្នា នាងរស់នៅជាមួយម្ដាយនាង ប៉ុន្តែដោយម្ដាយរបស់នាង ត្រូវធ្វើការរោងចក្រឆ្ងាយ នាងក៏ត្រូវរស់នៅជាមួយតាយាយរបស់នាង ហើយផ្ទះពួកគាត់នៅជាប់ផ្ទះខ្ញុំ។

បើគិតទៅ អង្គា ក៏គួរឱ្យអាណិតដែរ នាងមិនបានរៀនដិតដល់ទេ ព្រោះខ្វះអ្នកយកចិត្តទុកដាក់។ យាយរបស់នាងផឹករាល់ថ្ងៃ ដល់ថ្នាក់អ្នកភូមិហៅគាត់ថា «យាយឡូឡា» គាត់តែងតែរករឿងនាង ជេរច្រាសគ្មានលោះថ្ងៃឡើយ ដោយហេតុថាម្ដាយរបស់នាងមិនមែនជាកូនបង្កើតរបស់គាត់គឺជាកូនប្រពន្ធចុង ។

ម្ដាយរបស់នាងក៏រៀបការជាមួយ ប្ដីមួយទៀត ហើយយប់ផ្សំដំណេកនាងបានចូលទៅដេកជិតម៉ាក់របស់នាងធ្វើមិនដឹង។ រហូតដល់យាយរបស់នាងអូសដៃចេញឱ្យទៅដេកជាមួយគាត់វិញ ព្រមទាំងបន្ទោសថា «យប់គេផ្សំដំណេកឯងទៅដេកប្រឡោះកណ្ដាល!»។

ឱ្យតែនឹកឃើញរឿងនេះ ខ្ញុំសើចមិនឈប់ឡើយ តែមើលទៅ អង្គា ដូចជាមិនខ្វាយខ្វល់នឹងរឿងនេះសោះ។ ក្រោយពិធីរៀបការ អង្គា មករស់នៅជាមួយតាយាយរបស់នាងវិញ ហើយនាងបានប្រាប់ខ្ញុំថា នាងមិនចង់ឱ្យម៉ាក់របស់នាងរៀបការទេ នាងចង់ឱ្យគាត់ចិញ្ចឹមតែនាងម្នាក់បានហើយ។

(រូបតំណាង)

យូរៗ អង្គាទៅលេងម៉ាក់របស់នាងម្ដង ពេលត្រឡប់មកវិញនាងប្រាប់ខ្ញុំថា «ខ្ញុំអត់សប្បាយចិត្តទេ»។ ខ្ញុំសួរថារឿងអី? នាងថា «បើគាត់ចង់ថើបគ្នា គាត់មិនគួរថើបគ្នាមុខខ្ញុំទេ! ខ្ញុំខឹង»។ អង្គាមិនដែលពេញចិត្ត ប៉ាចុងរបស់នាងទេ។ មានរឿងអីក៏នាងប្រាប់ខ្ញុំដែរ ឱ្យតែនាងពិបាកចិត្ត។ ហើយអ្វីដែលខ្ញុំចាំមិនភ្លេច ជារៀងរាល់ល្ងាច តែងតែឮសំឡេងយាយឡូឡាជេរអង្គា ហើយគាត់ចូលចិត្តវ៉ៃក្បាលអង្គាណាស់។ ខ្ញុំខ្លាចតែថ្ងៃណាមួយ នាងទៅជាឡប់សតិទេ។

យូរៗទៅ យាយឡូឡាក៏នឹកឃើញឱ្យចៅចូលរៀន ប៉ាខ្ញុំក៏ជួយចុះឈ្មោះឱ្យនាងរៀនថ្នាក់ទីមួយឡើងវិញ ព្រោះសូម្បីតែ ក ខ គ ក៏នាងមិនទាន់ចេះដែរ។ រៀនបានប្រហែលពីរខែ នាងក៏ឈប់រៀនដោយប្រាប់ថារៀនមិនទាន់ ហើយនាងមិនចង់រៀនថ្នាក់ទីមួយព្រោះនាងធំហើយ។ យាយតារបស់នាងក៏មិនបានជំរុញចៅឱ្យខិតខំរៀនដែរ ចៅចង់ឈប់គាត់ឱ្យឈប់នៅផ្ទះដាំបាយឱ្យគាត់ហូប។

អង្គា នៅបន្តមកលេងបាយឡុកបាយឡជាមួយខ្ញុំដូចធម្មតា។ យើងនិយាយត្រូវរ៉ូវគ្នា ហើយលេងមិនដែលឈ្លោះគ្នាឡើយ លុះដល់ខ្ញុំរៀនបានថ្នាក់ទី ៨ មិត្តភាពយើងក៏ចាប់ផ្ដើមបញ្ចប់ព្រោះតែថ្ងៃនោះ... ខ្ញុំបានបាត់លុយ ២ ម៉ឺនរៀល វាជាលុយដែលខ្ញុំសន្សំ។

យប់នោះនាង លេងជាមួយខ្ញុំដល់ម៉ោង ៨ យប់ហើយអត់ទាន់ទៅផ្ទះទៀត។ នាងក៏ដឹងដែរថាលុយខ្ញុំតែងតែដាក់ក្នុងថតតុ នៅមុខបន្ទប់។ ចៃដន្យបងស្រីហៅខ្ញុំចូលក្នុងបន្ទប់ ខ្ញុំក៏ចូលទៅលុះមកវិញ អត់ឃើញនាងឡើយ។ ស្អែកឡើងទើបដឹងថាបាត់លុយ ខ្ញុំក៏សួរបងៗរបស់ខ្ញុំ គាត់ថាគ្រាន់តែឃើញអង្គាធ្វើដូចផ្អើលៗ ពេលគាត់ដើរចូលក្នុងផ្ទះ។ ខ្ញុំដឹងភ្លាមថា អង្គាជាអ្នកលួចលុយខ្ញុំ តែអ្នកផ្ទះខ្ញុំមិនបានរករឿងនាងទេ គ្រាន់តែប្រាប់ថាឈប់ឱ្យខ្ញុំលេងជាមួយនាងទៀត។

ថ្ងៃបន្ទាប់ ខ្ញុំដើរទៅរៀនក៏ជួបនាង កំពុងជិះកង់មកពីដូរកំប៉ុងហ្គាស ខ្ញុំមិនទាន់និយាយអីផង នាងគេចមុខធ្វើមិនឃើញខ្ញុំតែម្ដង នេះគេហៅថា ស៊ីលៀសរអៀសខ្លួន។

ទោះយ៉ាងណាខ្ញុំមិនបាន ខឹង ឬ ស្អប់នាងឡើយខ្ញុំខឹងគ្រួសារនាងច្រើនជាង ព្រោះយាយនាងគិតតែដកមេ តានាងគិតតែរឿងផឹកកាហ្វេព្រោកប្រាជ្ញ ឯម្ដាយនាងមានប្ដីក្រោយហើយដូចមានអ្វីៗទាំងអស់! មិនសូវខ្វល់ពីនាងឡើយ ពូមីងរបស់នាង គឺដឹងតែប្រើ ត្រូវជេរក៏ជេរភ្លាម។ ក្រោយមកទៀតនាង ក៏ឈប់នៅជាមួយយាយតា ហើយទៅធ្វើការរោងចក្រជាមួយម្ដាយនាង។ ខ្ញុំគិតថាខ្ញុំបានព្យាយាមអូសទាញនាងឱ្យរៀនសូត្រហើយ តែសាមីខ្លួននិងអ្នកផ្ទះ ដូចជាមិនសូវខ្វល់ទេ ដូច្នេះមានតែបណ្ដោយទៅតាមការជ្រើសរើសរបស់នាងចុះ៕

អត្ថបទ៖ ឡឹក ស្រីទីន

ចុចអាន៖ សង្ស័យថា ពូស្រឡាញ់ម្ដាយខ្លួន ចុងក្រោយទើបដឹង…!

អានអត្ថបទមនុស្សដែលខ្ញុំចងចាំទាំងអស់

មានរឿងរ៉ាវចង់ចែករំលែក សូមផ្ញើទៅកាន់ e-mail: kong.chanvanneng@sabay.com

ព័ត៌មានបន្ថែមសូមទូរសព្ទទៅកាន់លេខ ០១០ ៧០០ ៧២៧