Ford នឹងបំពាក់ប្រព័ន្ធចាប់ហ្វ្រាំងស្វ័យប្រវត្តិពេលមានអ្នកថ្មើរជើងឆ្លងកាត់

2014-10-24 16:16:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតរថយន្ត Ford ទើបប្រកាសបង្ហាញពីប្រព័ន្ធសុវត្ថិភាពថ្មីឈ្មោះថា "Pre-collision assist” ដែលប្រើទិន្នន័យដែលទទួលបានពីរ៉ាដា និងកាមេរ៉ារថយន្តកំណត់ថា មានអ្នកថ្មើរជើងឆ្លងកាត់ឬអត់ ហើយបើមានវានឹងចាប់ហ្វ្រាំងដោយស្វ័យប្រវត្តិដើម្បីបង្ការគ្រោះថ្នាក់ជាយថាហេតុ។

កាមេរ៉ាបង្កប់ និងរ៉ាដារថយន្តនឹងធ្វើការស្កេនផ្លូវធ្វើដំណើរ ហើយវានឹងព្រមានដល់អ្នកបើកបរប្រសិនបើមានឧបសគ្គណាមួយត្រូវចាប់បាន។ បើអ្នកបើកបរមិនអាចដោះស្រាយស្ថានការណ៍បានភ្លាមៗ ប្រព័ន្ធនេះនឹងចាប់ហ្វ្រាំងដោយស្វ័យប្រវត្តិដើម្បីបង្ការគ្រោះថ្នាក់ធ្ងន់ធ្ងរ។

ប្រព័ន្ធពាក់កណ្ដាលស្វ័យប្រវត្តិថ្មីៗត្រូវបានក្រុមហ៊ុនរថយន្ត មួយចំនួនអភិវឌ្ឍឡើងមួយរយៈចុងក្រោយនេះដូចជា Volvo និងក្រុមហ៊ុន Tesla ដែលទើបបញ្ចេញមុខងារ Autopilot សម្រាប់ជួយដល់អ្នកបើកបរបន្ថែមទៀតផង។ បើទោះជាការបង្កើតឡើងនេះគឺមានគោលបំណងផ្តល់ជំនួយដល់អ្នកបើកបរ និងបង្ការគ្រោះថ្នាក់ មតិមួយចំនួនលើកឡើងថា បច្ចេកវិទ្យានេះធ្វើឲ្យអ្នកបើកបរបង្កើតទម្លាប់មិនល្អពឹងផ្អែក លើវាច្រើន។

ទោះជាយ៉ាងណា Ford ក៏បានសង្កត់ធ្ងន់ដែរថា ប្រព័ន្ធសុវត្ថិភាពថ្មីរបស់ខ្លួនមិនមែនដើម្បីជំនួសអ្នកបើកបរទេ ហើយវាក៏មានដែនកំណត់ដែរដូចជា នៅពេលយប់ ពេលមានពន្លឺតិច អាកាសធាតុមិនអំណោយផល និងរថយន្តដែលបើកបរបញ្ច្រាសទិសគ្នា។ ក្រុមវិស្វកររបស់ Ford បានធ្វើការសាកល្បងច្រើនលើកច្រើនសារហើយទៅលើម៉ាឡាកាំង តែការបើកបរនៅស្ថានភាពពិតនៅតែជារឿងសំខាន់។