លី លានជា ដកខ្លួនពីហូលីវូដបណ្ដោះអាសន្ន ព្រោះសុខភាពកាន់តែខ្សោយ

2016-03-03 17:42:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ជួបកំពូលតារាសម្ដែងក្បាច់គុន Jet Li ក្នុងពេលកំពុងបង្រៀនក្បាច់គុនតៃជីដល់កូនសិស្សរបស់ខ្លួន គេមើលឃើញថាលោកខ្សោយជាងមុនឆ្ងាយ។ តារាសម្ដែងប្រុសនេះក៏ទើបតែសុំដកឈ្មោះចេញពីរឿងហូលីវូដមួយដើម្បីគិតគូរដល់សុខភាព។

តាមបណ្ដាញព័ត៌មាន Xinhua នៅក្នុងវ័យ ៥៣ ឆ្នាំ កំពូលតារាសម្ដែងចិន Jet Li នៅតែព្យាយាមបង្រៀនក្បាច់គុនតៃជីនៅមជ្ឈមណ្ឌលដែលលោកទើបតែបើករួមគ្នាជាមួយមហាសេដ្ឋី Jack Ma។ "ខ្ញុំចង់ផ្សព្វផ្សាយក្បាច់គុនមួយនេះដើម្បីលើកកម្ពស់សុខភាពរបស់ប្រជាជននៅក្នុងសង្គម។ នេះគឺជាមូលហេតុដែលធ្វើឲ្យខ្ញុំនិង Jack Ma បើកក្រុមហ៊ុន "អភិវឌ្ឍន៍វប្បធម៌អន្តរជាតិតៃជី" នេះឡើងដែរ"។ លី លានជា ប្រាប់ទៅកាន់អ្នកកាសែតដោយរួសរាយ។

តារាសម្ដែងវ័យ ៥៣ ឆ្នាំបានឲ្យដឹងថាខ្លួនទើបតែសុំដកខ្លួនចេញពីរឿង "xXx: The Return of Xander Cage” ដែលមានការចូលរួមរបស់ Vin Diesel ក៏ដោយសារមិនធានាពីស្ថានភាពសុខភាពរបស់ខ្លួនផងដែរ។ តួអង្គរបស់លោកក្រោយមកត្រូវបានផ្ទេរទៅឲ្យ Donnie Yen ដើរជំនួសវិញ។

លី លានជាចែករំលែកថាប៉ុន្មានឆ្នាំកន្លងទៅនេះ លោកតែងតែព្យាយាមហាត់តៃជីដើម្បីហ្វឹកហាត់ខ្លួនប្រាណ។ នៅពេលដឹងថាខ្លួនថាមានជំងឺភ្នែកទើបលោកកាន់តែយល់ច្បាស់នូវតម្លៃរបស់សុខភាព។សព្វថ្ងៃតួរឿង "Hero” ត្រូវបន្តទទួលទានថ្នាំជារៀងរាល់ថ្ងៃបើពុំនោះទេអាចបណ្ដាលឲ្យងងឹតភ្នែកជារៀងរហូតក៏ដូចជាប៉ះពាល់ដល់បេះដូងផងដែរ។ នេះក៏ជាមូលហេតុដែលលោកបដិសេធទទួលរឿងថ្មីក្នុង៣ឆ្នាំនេះដែរ។

“រាល់ពេលជួបមិត្តភ័ក្ដិម្ដងៗ អ្នកគ្រប់គ្នាតែងប្រាប់ខ្ញុំថាខ្ញុំកាន់តែចាស់ជាងមុន។ កាលពីព្រឹកនេះ មានមនុស្សម្នាក់ស្មានថាខ្ញុំអាយុ៦០ប្លាយទៀតផង" Jet Li បូរបាច់។ និយាយពីមូលហេតុដែលមិនទាន់វិលត្រលប់ចូលវិស័យភាពយន្តវិញ លី លានជាក្រៀមក្រំ៖" ខ្ញុំមិនទាន់គិតដល់នោះទេ សុំដកខ្លួនមួយរយៈសិន"៕

ចុចអាន៖Shu Qi ព្រួយបារម្ភខ្លាំងព្រោះមុខប្រតិកម្មជាង១ខែមិនទាន់បាត់

ប្រែសម្រួល៖ សុវណ្ណផៃ ប្រភព៖zing