ឈិន ឡុងល្វីងមុខនឹងសារព័ត៌មានចុះថាស្លាប់ជាបន្តបន្ទាប់

2016-03-10 18:54:10
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងល្បីឈ្មោះហុងកុងបានឲ្យដឹងថា មួយរយៈក្រោយនេះ លោកមិនហ៊ានអានព័ត៌មានច្រើនដោយសារតែមានរឿងប្រឌិតច្រើនពេក។

បណ្ដាញព័ត៌មាន West Capital News បានឲ្យដឹងថា កំឡុងពេលថតភាពយន្ត "the Foreigner” នៅទីក្រុងឡុងដុង ប្រទេសអង់គ្លេស តារាសម្ដែងចិន Jackie Chan ត្រូវមិត្តភ័ក្ដិទូរស័ព្ទរំខានជាញឹកញាប់។ មូលហេតុនៃរឿងនេះនោះគឺ ពួកគេស្លុតអារម្មណ៍ដោយសារព័ត៌មានក្នុងស្រុកចេះតែចុះផ្សាយថាតារាប្រុសនេះបានទទួលមរណភាពបាត់ហើយ។

ថ្ងៃ ២ខែមីនា នៅលើអ៊ីនធឺណិត គេបានបង្ហោះថា តារាសម្ដែងរៀមច្បងនេះបានស្លាប់នៅ Queensland ប្រទេសអូស្ត្រាលីដោយគ្រោះថ្នាក់ចរាចរណ៍។ ក្រោយនោះបន្តិច សារព័ត៌មាននានាបានបញ្ជាក់ពីទីកន្លែងកើតហេតុទៀតផង។ ប៉ុន្មានថ្ងៃក្រោយមក ប្រភពមួយពីកាសែតឥណ្ឌាបានទម្លាយថា Jackie Chan បានលាចាកលោកហើយដោយសារគាំងបេះដូង។

ប្រឈមមុខនឹងពាក្យចចាមអារ៉ាមមិនពិតទាំងនេះ តំណាងរបស់ ឈិន ឡុងបានឲ្យដឹងថា ក្នុង១សប្ដាហ៍ចុងក្រោយនេះ ក្រុមហ៊ុនរបស់ពួកគេបានទទួលព័ត៌មានថា Jackie Chan ទទួលមរណភាព៣ដងហើយ។ "បង ឈិន ឡុងបានប្រាប់ពួកខ្ញុំថាគាត់ហត់នឿយខ្លាំងណាស់។ ព័ត៌មានដដែលៗបន្តលេចឡើងជារៀងរាលថ្ងៃ ហើយក៏មិនដឹងថាត្រូវដោះស្រាយយ៉ាងណា។ បើគិតមកដល់ពេលនេះគាត់ប្រហែលជាត្រូវស្លាប់រាប់រយដងហើយ"។

“ប៉ុន្មានឆ្នាំមកនេះ ខ្ញុំតែងតែត្រូវគេថាស្លាប់បាត់ហើយ។ រឿងនេះបានធ្វើឲ្យមិត្តភ័ក្ដិនិងអ្នកគាំទ្រខ្ញុំព្រួយបារម្ភ។ ខ្ញុំក៏បានបកស្រាយច្រើនដងហើយថាខ្លួននៅមានជីវិត" ឈិន ឡុងនិយាយទាំងហត់នឿយ។តារាវ័យ ៦២ ឆ្នាំក៏បានលលេងដែរថា៖ "បើសិនជាពេលណាខ្ញុំស្លាប់មែន ខ្ញុំនឹងរាយការណ៍ប្រាប់អ្នកទាំងអស់គ្នា។ ដូចនេះហើយ អ្នកដែលបង្ហោះរឿងប្រឌិតពីខ្ញុំទាំងឡាយ សូមបញ្ឈប់សកម្មភាពនេះជាបន្ទាន់"៕

ចុចអាន៖មនុស្សភ្លូកទឹកភ្លូកដីផ្អើលនាំគ្នាទៅមើល Fan Bing Bing

ប្រែសម្រួល៖ សុវណ្ណផៃ ប្រភព៖zing