ត្រចៀកកាំមិនគិតថា Fan BingBing ស្រស់ស្អាតទេ

2016-03-14 17:53:17
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលចូលរួមក្នុងកម្មវិធីទូរទស្សន៍មួយនាពេលថ្មីនេះតារាសម្ដែងល្បីឈ្មោះ Zhao Wei បានវាយតម្លៃត្រង់ៗទៅលើរូបសម្រស់របស់មិត្តរួមការងាររបស់ខ្លួន។

តាមWest Capital News ថ្មីៗនេះ តារាសម្ដែងចិន Zhao Wei បានមានវត្តមានក្នុងកម្មវិធីជជែកកម្សាន្តមួយជាមួយពិធីករល្បីឈ្មោះ Kevin Tsai។ ពេលជជែកគ្នា តារាសម្ដែងស្រីនេះបានបកស្រាយពីរឿងចចាមអារ៉ាមមិនល្អពីខ្លួននៅលើអ៊ីនធឺណិត។ តារាអាយុ ៤០ឆ្នាំបដិសេធនឹងព័ត៌មាននាងញៀនលេងល្បែងនិងវាយតម្លៃពីសម្រស់របស់ Fan BingBing។

ស្រីស្អាតត្រកូល Fan និង Zhao Wei ធ្លាប់សម្ដែងរួមគ្នាក្នុងកំពូលរឿងភាគ "ព្រះនាងយេយេ" ក្នុងឆ្នាំ ១៩៩៧។ ក្រោយរយៈពេលជិត ២០ឆ្នាំ ដោយសារតែអ្នកទាំង២សុទ្ធតែមានភាពជោគជ័យដូចគ្នា ដូចនេះគេតែងតែយកអ្នកទាំង២មកប្រៀបធៀបជានិច្ច។ នៅជ្រុងក្នុងកម្មវិធី ពិធីករKevin Tsai បានដាក់សំនួរទៅកាន់ Zhao Wei ថា៖ "តើនាងមានគិតថា Fan BingBing ស្រស់ស្អាតឬអត់?”។ នៅពេលឮសំនួរនេះ Zhao Wei គ្រាន់តែសើច៖ "នេះគឺជាវេទិការបស់ខ្ញុំ ដូចនេះខ្ញុំសុំនិយាយថា Fan BingBing មិនស្អាតទេ"។ ចម្លើយលេងសើចលាយឡំនឹងពិតប្រាកដរបស់ម្ដាយកូន១រូបនេះបានធ្វើឲ្យទស្សនិកជនអស់សំណើច។

West Capital News បានឲ្យដឹងថា Zhao Wei និង Fan BingBing ធ្លាប់ជួបរឿងអាស្រូវមិនត្រូវគ្នាមិនតិចដងនោះទេក្រោយជោគជ័យរបស់ "ព្រះនាងយេយេ"។ ជាថ្មីម្ដងទៀត Zhao Wei បានអះអាងថានេះគ្រាន់តែជារឿងប្រឌិតតែប៉ុណ្ណោះ។ "ចាប់ពីពេល 'ព្រះនាងយេយេ' ចប់ទៅ ពួកខ្ញុំគ្មានឱកាសបានសហការគ្នាសារជាថ្មីឡើយ។ យ៉ាងណាក៏ដោយ យើងនៅតែរក្សាទំនាក់ទំនង។ ខ្ញុំនិង Bing Bing បានធំឡើងជាមួយគ្នា ខ្ញុំតែងតែសង្ឃឹមថានាងជួបប្រទះតែរឿងល្អបំផុត"។ តារាកើតឆ្នាំ ១៩៧៦បកស្រាយក្នុងកម្មវិធី។

តាមបណ្ដាញព័ត៌មានចិន ព័ត៌មានរកាំរកូសរបស់របស់អ្នកទាំង២គឺជារឿងប្រឌិតពិតមែនដោយកាលពីថ្ងៃទី ១២ ខែមីនាមុននេះ ដែលជាថ្ងៃខួបកំណើតលើកទី៤០ របស់ Zhao Wei នោះ Fan BingBing បានបង្ហាញពីទឹកចិត្តរបស់ខ្លួនទៅកាន់រៀមច្បង។ នៅលើបណ្ដាញសង្គមផ្ទាល់ខ្លួន តួរឿង "មហិច្ឆតាអ៊ូម៉ីនាង" បានបង្ហោះរូបខ្លួននិង Zhao Wei នៅទីក្រុងប៉ារីសកាលពីឆ្នាំមុនព្រមទាំងភ្ជាប់ជាមួយពាក្យជូនពរថា៖ "សង្ឃឹមថាពន្លឺព្រះអាទិត្យក៏ដូចជាស្នាមញញឹមនឹងនៅក្បែរបងជារៀងរហូត"៕