កូរ៉េខាងជើង បញ្ជាឲ្យសាកក្បាលគ្រាប់នុយក្លេអ៊ែរឆាប់ៗ

2016-03-15 16:30:59
ចំនួនមតិ 0 | ចំនួនចែករំលែក 0

ចន្លោះមិនឃើញ

មេដឹកនាំកូរ៉េខាងជើង លោកគីម ជុងអ៊ុន បានបញ្ជាឲ្យសាកក្បាលគ្រាប់នុយក្លេអ៊ែរមួយ និងមីស៊ីលឆ្លងទ្វីបជាច្រើនប្រភេទទៀត អាចសណ្ដោងក្បាលគ្រាប់ ដែលធ្វើក្នុងរយៈពេលខ្លីដើម្បីពង្រឹងសមត្ថភាពវាយប្រហារនុយក្លេអ៊ែរ។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង។

សេចក្ដីប្រកាស ត្រូវបានចេញផ្សាយដោយភ្នាក់ងារសារព័ត៌មានរដ្ឋ KCNA នៅថ្ងៃអង្គារនេះ ដែលកើតមានចំពេលភាពតានតឹងនៅឧបទ្វីបកូរ៉េកំពុងឡើងកម្ដៅ។

កូរ៉េខាងជើងទើបបាញ់មីស៊ីលចម្ងាយខ្លីចំនួនពីរគ្រាប់ចូលសមុទ្រកាលពីថ្ងៃព្រហស្បតិ៍សប្ដាហ៍មុន ហើយកាលពីថ្ងៃសៅរ៍ អាមេរិក និងកូរ៉េខាងត្បូងរួមគ្នា ចាប់ផ្ដើមធ្វើសមយុទ្ធទ្រង់ទ្រាយធំមិនធ្លាប់មាន។ សប្ដាហ៍មុន កូរ៉េខាងជើងនិយាយថា ខ្លួននឹងត្រៀមវាយប្រហារជាមុន ចំពោះការបាញ់គ្រាប់បំពានចូលដែនដីកូរ៉េខាងជើងទៅកាន់សត្រូវណាក៏ដោយ។

ប្រភព KCNA បានរាយការណ៍ថា ការសាកក្បាលគ្រាប់នៅពេលខាងមុខឆាប់ៗនេះ គឺជាសេចក្ដីថ្លែងការណ៍បែបសង្គ្រាម និងសារព្រមានចុងក្រោយពីរបបកូរ៉េខាងជើងក្នុងរយៈពេលប៉ុន្មានសប្ដាហ៍ថ្មីៗនេះ។

កូរ៉េខាងជើងធ្លាប់តេស្ដនុយក្លេអ៊ែរក្នុងខែមករា និងខែកុម្ភៈបានបាញ់រ៉ុកកែត និងផ្កាយរណបចូលទៅក្នុងអាកាស ដែលធ្វើឲ្យអង្គការសហប្រជាជាតិដាក់ទណ្ឌកម្មយ៉ាងធ្ងន់ធ្ងរបន្ថែមទៀត។ ឯនៅដើមខែនេះ KCNA ផ្សាយថាកូរ៉េខាងជើង បានផលិតក្បាលគ្រាប់សមជាមួយនឹងមីស៊ីលឆ្លងទ្វីបផងដែរ៕