ឡូរ៉ា ម៉ម បង្កើតកម្មវិធីលើកស្ទួយការតែងនិពន្ធបទចម្រៀង

2016-03-16 13:00:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីចូលរួមចំណែកលើកស្ទួយការតែងនិពន្ធបទចម្រៀងនៅកម្ពុជា ឡូរ៉ា ម៉ម បានសម្រេចបង្កើតការប្រកួតប្រជែងមួយ ស្វែងរកអ្នកមានទេពកោសល្យក្នុងវិស័យនេះ។

កញ្ញា វ៉ាន់ ស្រីនុច ជំនួយការតារាចម្រៀងខាងលើ និងជាអ្នកសម្របសម្រួលកម្មវិធីបាននិយាយថា ការប្រកួតចាប់ផ្ដើមពីពេលនេះតទៅ ខណៈការប្រកាសលទ្ធផលធ្វើឡើងនៅចុងមីនាខាងមុខ។ បេក្ខជនទាំងអស់ ត្រូវសរសេរបទចម្រៀង ១ បទទាក់ទងទៅនឹងការលង់ស្នេហ៍នៅក្នុងទីក្រុងភ្នំពេញតាមលំនាំបទចម្រៀងភាសាអង់គ្លេសរបស់ ឡូរ៉ា ម៉ម មានចំណងជើងថា" We Could Fall in Love” ។

ជំនួយការដដែលបន្តថា បេក្ខជនគ្រាន់តែនិពន្ធទំនុកច្រៀងប៉ុណ្ណោះ ដោយប្រើសាច់ភ្លេងបទចម្រៀងនេះ។ ចំពោះការផ្ដល់ពិន្ទុត្រូវបានបែងចែកជាពីរផ្នែករួមមានការដាក់ឱ្យបោះឆ្នោតលើ Facebook និងការដាក់ពិន្ទុដោយផ្ទាល់ពីតារាចម្រៀងសញ្ជាតិអាមេរិកខាងលើតែម្ដង។

ចំពោះម្ចាស់ជយលាភីទទួលបានទឹកប្រាក់ ៥០០ ដុល្លារ និងការទទួលទានអាហារពេលល្ងាចជាមួយគ្នាមួយពេលនៅភ្នំពេញ។ សម្រាប់បេក្ខជនរស់នៅតាមបណ្ដាខេត្ត ក៏មានការចំណាយលើការធ្វើដំណើរ និងស្នាក់នៅផងដែរ។ ក្រៅពីនេះបេក្ខជនក៏អាចមានឱកាសក្លាយជាអ្នកនិពន្ធបទចម្រៀងសម្រាប់ ឡូរ៉ា ម៉ម ផ្ទាល់តែម្ដង។ ព័ត៌មានបន្ថែមសូមទាក់ទងទៅកាន់លេខ ០៦៩ ២២៩ ៩៩៩៕