“Fury”បង្ហាញការប្រយុទ្ធរវាងរថក្រោះអាមេរិក និងអាល្លឺម៉ង់ដ៏សាហាវ

2014-10-25 16:50:05
ចំនួនមតិ 0 | ចំនួនចែករំលែក 0

ចន្លោះមិនឃើញ

បើត្រឡប់ទៅកាន់ខែមិថុនា ឆ្នាំ១៩៤៤ ក្នុងអំឡុងសង្គ្រាមលោកលើកទី២ កងទ័ពអាមេរិកបានព្យាយាមឡើងគោកនៃទឹកដីទ្វីបអឺរ៉ុប ដែលស្ទើរតែគ្រប់គ្រងទាំងស្រុងដោយកងទ័ពណាស៊ីហ៊ីត្លែអាល្លឺម៉ង់។ D-Day ជាថ្ងៃសោកនាដកម្មដ៏ធំមួយ។ ទាហានអាមេរិក និងកងសម្ព័ន្ធមិត្តប្រមាណជា១៥០ ០០០នាក់បានព្យាយាមកាន់កាប់ឆ្នេរសំខាន់ៗរបស់ប្រទេសបារាំង ប៉ុន្តែត្រូវបានស្វាគមន៍ដោយគ្រាប់មីន កាំភ្លើងប្លោង និងកាំភ្លើងយន្តរបស់អាល្លឺម៉ង់ បណ្ដាលឲ្យទាហានប្រមាណជា៩០០០នាក់ស្លាប់ និងត្រូវរបួស។

ក្រោយពីឡើងមកដល់លើគោលនៃប្រទេសបារាំងហើយ អាមេរិកត្រូវបានពុះពារឧបសគ្គដ៏ច្រើនសន្ធឹកសន្ធាប់ទៀត។ គេត្រូវបោសសម្អាតកងទ័ពអាល្លឺម៉ង់ពីភូមិមួយទៅភូមិមួយជាបន្តបន្ទាប់។ អ្វីដែលជាឧបសគ្គធ្វើឲ្យទាហានជើងចាស់អាមេរិកចងចាំមិនភ្លេច គឺរថក្រោះមិនធ្លាប់មានវិស្វករខ្លួនណាស្ថាបនាពីមុនមក កំពុងត្រូវបានប្រើប្រាស់ដោយកងទ័ពអាល្លឺម៉ង់។

“Tiger” ឬ "ខ្លា" ជាឈ្មោះដែលគេស្គាល់ជាទូទៅថាជារថក្រោះមានទម្ងន់ធ្ងន់ កម្រាស់ក្រាស កម្លាំងខ្លាំង និងបានកម្ទេចរថក្រោះសូវៀត T-34 ស្ទើរជាច្រើនពាន់គ្រឿងមកហើយ។ ងាកមកអាមេរិកវិញ រថក្រោះ ដែលខ្លួនកំពុងមាន “M4 Sherman” មានទម្ងន់ស្រាលជាង កម្រាស់ដែកស្ដើងជាង និងបំពាក់អាវុធធុនតូចជាង។ ទាហានជើងចាស់អាមេរិកតែងលើកឡើងអំពីភាពអស្ចារ្យរបស់ Tiger របស់អាល្លឺម៉ង់ ដែលពួកគេមិនចង់ជួបពេលកំពុងប្រយុទ្ធនោះទេ។ គេមិនអាចបាញ់កម្ទេចរថក្រោះរបស់ទាហានណាស៊ីអាល្លឺម៉ង់មួយនេះក្នុងចម្ងាយឆ្ងាយបានឡើង លុះត្រាតែចូលកៀក។

រឿងដែលទាហានជើងចាស់អាមេរិកតែងលើកយកមកនិយាយ ត្រូវបានភាពយន្តហូលីវូដ “Fury” យកមកបកស្រាយ។ ក្នុងភាពយន្តនេះ គេក៏បានបង្ហាញឈុតប្រយុទ្ធគ្នារវាងរថក្រោះទំនើបចុងអាមេរិក Sherman បួនគ្រឿង ជាមួយនឹងរថក្រោះអាល្លឺម៉ង់តែមួយគ្រឿងប៉ុណ្ណោះ។ ដើម្បីអាចកម្ទេចរថក្រោះដែលមានទម្ងន់ធ្ងន់ កម្រាស់ក្រាស់ និងមិនសូវហ៊ានចុះភក់ជ្រៅមួយនេះ អាមេរិកត្រូវបូជារថក្រោះ Sherman ខ្លួនចំនួន៣គ្រឿង និងអ្នកបើកជាច្រើននាក់នៅក្នុងនោះ។

ទស្សនាវីដេអូខ្លីៗ៖

http://youtu.be/mV7TRLpCM48

បើចង់ឃើញបច្ចេកវិទ្យាដ៏កំណាច ដែលអាចធ្វើឲ្យណាស៊ីហ៊ីត្លែស្ទើរតែគ្រប់គ្រងទ្វីបអឺរ៉ុបបានដោយរបៀបណា រឿង “Fury” ដែលសម្ដែងដោយតារាភាពយន្តហូលីវូដ Brad Pitt, Shia LaBeouf, Michael Peña, និងតារាល្បីៗជាច្រើនទៀត កំពុងបង្ហាញជូននៅរោងភាពយន្ត Platinum Cineplex ផ្សារទំនើបសូរិយាជាន់ទី៥៕

-មើលអត្ថបទ៖ “Fury” រឿងថ្មីរបស់ Brad Pitt ដែលជាប់លេខ១នៅអាមេរិកមកដល់កម្ពុជាហើយ

ប្រភព៖Army, ddaymuseum, imdb