ជា​តារា​​សម្ដែង​​ល្បី​ឈ្មោះ ទ្រព្យ​សម្បត្តិ​ហូរហៀរ និង​មាន​ស្នេហា​ផ្អែម​ដូច​ទឹក​ឃ្មុំ​ជាមួយ​តារា​ស្រី Liu Shi Shi តែ​គ្មាន​អ្នក​ណា​ដឹង​ទេ​ថា​តារា​តៃវ៉ាន់ Nicky Wu ធ្លាប់​ឆ្លង​កាត់​កុមារភាព​ដ៏​ពិបាក​វេទនា។

រើស​សំរាម លីសែង​ទំនិញ​ដើម្បី​ជីវភាព

Nicky Wu ចាប់​កំណើត​នៅ​ថ្ងៃ​ទី៣១ ខែ​តុលា​ឆ្នាំ ១៩៧០ នៅ​តៃវ៉ាន់​ក្នុង​គ្រួសារ​កូន​ច្រើន​​និង​ក្រីក្រ​មួយ​។ ដោយ​សារ​តែ​មិន​ចង់​ឲ្យ​ឪពុក​ម្ដាយ​បារម្ភ​ពី​ខ្លួន Nicky Wu ធ្វើ​ខ្លួន​​​ជា​មនុស្ស​ឯករាជ្យ មិន​ពឹង​ផ្អែក​លើ​អ្នក​ផ្ទះ។

អាជីវកម្ម​​របស់​ឪពុក​ដួល​រលំ រុញ​គ្រួសារ​របស់ Nicky Wu ​ឲ្យ​ចូល​ស្ថានភាព​ទាល់ក្រ​បំផុត។ ឪពុក​របស់ Nicky Wu មិន​ចង់​ប្រកាស​ក្ស័យធន​​បណ្ដាល​ឲ្យ​សមាជិក​ទាំង​អស់​ក្នុង​គ្រួសារ​មិន​ថា​ចាស់​ក្មេង​ត្រូវ​ជួយ​រក​លុយ​ដើម្បី​ទប់​សេដ្ឋកិច្ច​គ្រួសារ។ Nicky Wu ត្រូវ​ក្រោក​ពី​ម៉ោង ៥​ភ្លឺ ទៅ​​លី​សែង​ឥវ៉ាន់​ឲ្យ​ឈ្មួញ​ក្នុង​ផ្សារ ស៊ី​ឈ្នួល​លាង​ម៉ូតូ​ឲ្យ​គេ និង​មាន​ពេល​ខ្លះ​ត្រូវ​រើស​សំរាម​ទៀត​ផង​ដើម្បី​ជួយ​រំលែក​បន្ទុក​​ឪពុកម្ដាយ។

ភ័ព្វ​សំណាង​បាន​មក​ដល់​ Nicky នៅ​ពេល​លោក​ត្រូវ​បាន​តារា​ចម្រៀង Angus Tung រក​ឃើញ​ទេពកោសល្យ​និង​ផ្ដល់​ឱកាស​ឲ្យ​ចូល​រួម​ក្នុង​ក្រុម​ចម្រៀង Little Tiger Team ជាមួយ​នឹង Alec Su និង Julien Chen។ កំឡុង​ពេល​នោះ Nicky Wu ​ប្រឹង​ធ្វើ​ការ​ដូច​មនុស្ស​យន្ត។ លោក​ឆក់​យក​គ្រប់​ឱកាស​ទាំង​អស់​ដែល​មក​ដល់​ខ្លួន ហើយ​ឆ្លៀត​ពេល​ទៅ​ធ្វើ​ការ​ក្រៅ​ម៉ោង​នៅ​សាលា​​​ទៀត​ផង។ ធ្វើ​ការ​ដូច​នេះ ក្នុង​រយៈពេល ១០​ឆ្នាំ Nicky បាន​សង​បំណុល​ទាំង​អស់​ជួស​ឪពុក​ខ្លួន។ ទោះ​បី​ជា​ត្រូវ​ហត់​នឿយ​ខ្លាំង តែ Nicky មិន​ដែល​បន្ទោស​អ្នក​មាន​គុណ​សូម្បី​តែ​ម្ដង។ ផ្ទុយ​មក​វិញ លោក​ថែម​ទាំង​ដឹង​គុណ​ដល់​កំឡុង​ពេល​នេះ​ទៀត​ផង​ដែល​បាន​ហ្វឹកហាត់​ខ្លួន​ឲ្យ​ក្លាយ​ជា​មនុស្ស​មាំមួន​ម្នាក់​ ចេះ​ជម្នះ​គ្រប់​ឧបសគ្គ​មិន​ទន់​ខ្សោយ។

មនុស្ស​ស្លាប់​រស់​នឹង​ការងារ

ខែ​ធ្នូ​ឆ្នាំ ១៩៩១ ក្រុម​ចម្រៀង​យុវវ័យ​ Little Tiger Team ត្រូវ​រំសាយ​​ធ្វើ​ឲ្យ​អ្នក​គាំទ្រ​ជា​ច្រើន​សោកស្ដាយ ដោយ​សារ​តែ Julien Chen ចូល​បម្រើ​កង​ទ័ព និង Alec Su ត្រូវ​បន្ត​ការ​សិក្សា​នៅ​បរទេស។ នៅ​ពេល​នេះ Nicky Wu ចាប់​ផ្ដើម​អាជីព​ចម្រៀង​ទោល​របស់​ខ្លួន។ លោក​ចាប់​ផ្ដើម​រៀន​ភាសា​ចិន​កុកងឺ​និង​ធ្វើ​ដំណើរ​ទៅ​កាន់​ទីក្រុង​ហុងកុង​ដើម្បី​ចាប់​ផ្ដើម​អាជីព​ថ្មី។ ជាមួយ​នឹង​ទឹក​ចិត្ត​​មោះមុត​ដូច​​មុន មិន​យូរ​ប៉ុន្មាន​កេរ្តិ៍ឈ្មោះ​របស់ Nicky Wu ចាប់​ផ្ដើម​មាន​អ្នក​ស្គាល់។

គិត​មក​ទល់​ពេល​នេះ Nicky Wu បាន​ប្រឡូក​ក្នុង​សិល្បៈ​បាន​រយៈពេល ២៥​ឆ្នាំ​ហើយ។ តារា​សម្ដែង​ប្រុស​នេះ​ធ្លាប់​ចែក​រំលែក​ថា លោក​បោះ​ជើង​ចូល​វិថី​មួយ​នេះ​ជាមួយ​នឹង​ក្ដី​បំណង​តែ​មួយ​គត់​គឺ​ជួយ​​ចែក​រំលែក​បន្ទុក​របស់​គ្រួសារ ​តែ​នៅ​ពេល​ចូល​ហើយ​ទើប​ដឹង​ថា​ខ្លួន​ឯង​មាន​មហិច្ឆតា​ខ្ពស់។ ពី​តារា​ចម្រៀង​ម្នាក់ លោក​ចាប់​ផ្ដើម​មាន​អ្នក​ស្គាល់​ច្រើន​ក្នុង​តួនាទី​ជា​តារា​សម្ដែង ក្រោយ​មក​ក្លាយ​ជា​ផលិតករ ថែម​ទាំង​បាន​​សាក​ល្បង​ខាង​ជំនួញ​ទៀត​ផង។ លោក​មិន​អនុញ្ញាត​ឲ្យ​ខ្លួន​ឯង​សម្រាក​សូម្បី​តែ​មួយ​ថ្ងៃ។

​រក​ឃើញ​ចំណត​ស្នេហា​​ពិត​ប្រាកដ​ក្រោយ​ភាព​ល្វីង​ជូរចត់​ទាំង​ឡាយ​ក្នុង​ជីវិត

អាជីព​ការងារ​អាច​យក​ការ​ព្យាយាម​មក​ដោះ​ដូរ​បាន​តែ​ចំពោះ​ស្នេហា លះបង់​គ្រប់យ៉ាង​ក៏​មិន​ប្រាកដ​ថា​គ្រប់​គ្រាន់​ដែរ។ ដូច​ជា​ករណី​របស់ Nicky Wu ជា​ដើម បុរស​ម្នាក់​ដែល​ខំប្រឹង​អស់​ពី​សមត្ថភាព​ដើម្បី​គ្រួសារ​បែរ​ជា​ជួប​​រឿង​រដិបរដុប​រាប់​ភ្លេច​ក្នុង​វិថី​ស្នេហា​ទៅ​វិញ។

Nicky Wu និង Ma Yashu កាល​នៅ​ផ្អែម​ល្ហែម

ឆ្លង​កាត់​ស្នេហា​ជា​ច្រើន​ដែល​គ្មាន​លទ្ធផល​​ជាមួយ​តារា​សម្ដែង​ស្រី​ដូច​ជា Vivian Hsu និង Ada Choi តារា​ល្បី Nicky Wu បាន​រៀប​មង្គល​ការ​ជាមួយ​តារា​សម្ដែង​ស្រី Ma Yashu។ អ្នក​ទាំង​២​ចាប់​ផ្ដើម​មាន​មនោសញ្ចេតនា​ជាមួយ​គ្នា​នៅ​ពេល​សហការ​ក្នុង​រឿង​ភាគ "The Eleventh Son”។ នឹក​ស្មាន​ថា នៅ​ទី​បញ្ចប់ តារា​សម្ដែង​ត្រកូល Wu បាន​រក​ឃើញ​សុភមង្គល​របស់​ខ្លួន​ហើយ តែ​ទេវតា​ហាក់​ដូច​ជា​ចង់​លលេង​ជាមួយ​មនុស្ស​។ អាពាហ៍ពិពាហ៍​ទី​១​របស់ Nicky Wu បាន​ឈាន​ដល់​ទី​បញ្ចប់​ក្រោយ​រស់​នៅ​ជាមួយ​គ្នា​​បាន​រយៈពេល​​៣​ឆ្នាំ។ ប្រភព​ជា​ច្រើន​បាន​ឲ្យ​ដឹង​ថា Nicky Wu ត្រូវ​អតីត​ភរិយា​បោក​ប្រាស់​ព្រោះ​បែក​គ្នា​មិន​បាន​ប៉ុន្មាន​ផង​នាង​ក៏​រៀបការ​ម្ដង​ទៀត។ ក្នុង​នាម​ជា​សុភាព​បុរស​ Nicky Wu សម្រេច​​ចិត្ត​រក្សា​ភាព​ស្ងៀមស្ងាត់។ មិន​ត្រឹម​តែ​ប៉ុណ្ណោះ លោក​បាន​ទុក​ទ្រព្យ​សម្បត្តិ​សឹង​តែ​ទាំង​អស់​ឲ្យ​អតីត​ភរិយា​ទាំង​គ្មាន​ការ​ស្ដី​បន្ទោស​កន្លះ​ម៉ាត់​។

ក្រោយ​ពេល​មង្គល​ការ​បែក​បាក់​ទៅ Nicky Wu បាន​បង្រួម​ខ្លួន​ឯង​ឲ្យ​តូច បិទ​ច្រក​បេះដូង​មិន​ទទួល​យក​អ្នក​ណា​ទាំង​អស់។ យ៉ាងណាមិញ ក្នុង​ឆ្នាំ ២០១១ Nicky Wu បាន​ធ្លាក់​ក្នុង​អន្លង់​ស្នេហ៍​ជាមួយ​មិត្ត​រួម​ការងារ Liu Shishi ​ជា​ថ្មី​ម្ដង​ទៀត​។ មិន​ប្រាកដ​ខ្លួន​ឯង​ថា​​ថា​នេះ​គឺ​ជា​ស្នេហា​ឬ​គ្រាន់​តែ​ការ​ស្រលាញ់​មួយ​ឆាវ អ្នក​ទាំង​២​បាន​ឃ្លាត​គ្នា​២​ឆ្នាំ​ដើម្បី​ឲ្យ​ពេល​វេលា​ជា​អ្នក​សម្រេច។ ក្រោយ​នោះ​គ្រប់​២​ឆ្នាំ នៅ​ថ្ងៃ​ទី​១៣ ខែ​វិច្ឆិកា ឆ្នាំ២០១៣ Liu Shishi និង Nicky Wu ចាប់​ផ្ដើម​ស្រលាញ់​គ្នា​ជា​ផ្លូវការ​។ ព័ត៌មាន​​អ្នក​ទាំង​២​ស្រលាញ់​គ្នា​បាន​ធ្វើ​ឲ្យ​អ្នក​គាំទ្រ​របស់​ភាពយន្ត​ភាគ "Scarlet Heart” ត្រេក​ត្រអាល​ជា​ទី​បំផុត។

ខែ​វិច្ឆិកា ឆ្នាំ ២០១៥ Nicky Wu ចែក​រំលែក​សំបុត្រ​អាពាហ៍ពិពាហ៍​ក៏​ដូច​ជា​ចិញ្ចៀន​មង្គល​ការ​របស់​ខ្លួន​នៅ​លើ​បណ្ដាញ​សង្គម។ ភ្លាម​ៗ​ក្រោយ​នោះ Liu Shishi បាន​ផ្ដាំ​ផ្ញើ​ទៅ​កាន់​អ្នក​គាំទ្រ​ថា៖ "ពួក​ខ្ញុំ​ពិត​ជា​មាន​សុភមង្គល​មែន​"។

ថ្ងៃ​ទី​២០ ខែ​មីនា​ឆ្នាំ ២០១៦ Liu Shishi និង Nicky Wu បាន​ដឹក​ដៃ​គ្នា​ចូល​រោង​ការ​ជាមួយ​នឹង​ពាក្យ​ជូនពរ​ដ៏​ប្រពៃ​​​របស់​មិត្តភ័ក្ដិ​និង​ក្រុម​គ្រួសារ​នៅ​ដែន​កោះ​បាលី​ដ៏​ស្រស់​ស្អាត។ ​ពេល​ធ្វើ​ពិធី​ស្បថ​ស្បែ​ចំពោះ​គូ​អនាគត Nicky Wu បាន​ធ្វើ​ឲ្យ Liu Shishi ក្លាយ​ជា​នារី​មាន​សុភមង្គល​បំផុត​ក្នុង​លោក​នៅ​ពេល​សច្ចា​ថា៖ "បង​ធ្លាប់​ខឹង​ទេវតា​មិន​តិច​ជាង​មួយ​ដង​នោះ​ឡើយ។ កាល​ពី​មុន​ បង​គិត​ថា​ទ្រង់​គ្មាន​​ភាព​យុត្តិធម៌​ចំពោះ​បង តម្រូវ​ឲ្យ​បង​ឆ្លង​កាត់​រឿង​គ្រោតគ្រាត​រាប់​មិន​អស់។ តែ​ពេល​នេះ បង​យល់​ហើយ​ថា​ហេតុ​អី​ទ្រង់​ធ្វើ​ដូច​នេះ​ហើយ ព្រោះ​ទ្រង់​បាន​រក្សា​ស្នេហា​ដែល​អស្ចារ្យ​បំផុត​ឲ្យ​បង​នៅ​វគ្គ​ចុង​ក្រោយ។ ចាប់​ពី​ពេល​នេះ​ទៅ បង​នឹង​ស្ដាប់​តាម​អូន​ជា​និច្ច"៕

ចុចអាន៖ជីវិត​ស្ដុកស្ដម្ភ​តែ​គ្មាន​ប្រពន្ធ​កូន​របស់​ចាន់ចាវ​ក្នុង​វ័យ ៥៦​ឆ្នាំ

ប្រែ​សម្រួល៖ សុវណ្ណផៃ ប្រភព៖zing