អាហារ៤យ៉ាងមិនគ្រាន់តែសម្រាប់ញ៉ាំ ប៉ុន្តែជាវត្ថុធាតុសម្អាតប្រដាប់ប្រដាប្រើប្រាស់ក្នុងផ្ទះបានល្អ

2016-03-30 19:30:25
ចំនួនមតិ 0 | ចំនួនចែករំលែក 0

ចន្លោះមិនឃើញ

អាហារពីធម្មជាតិសម្រាប់បរិភោគរាល់ថ្ងៃ មិនត្រឹមតែមានសារជាតិល្អៗទ្រទ្រង់រាងកាយប៉ុណ្ណោះទេ ប៉ុន្តែថែមទាំងអាចយកទៅប្រើប្រាស់ជាប្រយោជន៍ផ្សេងៗទៀតក្នុងជីវភាពរស់នៅប្រចាំថ្ងៃផងដែរ។ តាមរយៈគេហទំព័រ Tiphero បានណែនាំពីអាហារមួយចំនួនដែលយើងអាចរកបានក្នុងផ្ទះបាយ គឺជាធាតុផ្សំសម្រាប់សម្អាតក្នុងផ្ទះ និងសម្អាតប្រដាប់ប្រដាប្រើប្រាស់បានយ៉ាងល្អ៖

១. អង្ករ ៖ អង្ករដាំជាបាយដែលមនុស្សរស់នៅទ្វីបអាស៊ីបរិភោគរៀងរាល់ថ្ងៃ ក៏មានប្រយោជន៍សម្រាប់ការសម្អាតផងដែរ។ ចំពោះស្នាមប្រឡាក់ ស្នឹមជាប់បាតថូ ឬកែវ( កន្លែងពិបាកសម្អាត) អ្នកអាចយកអង្ករបន្តិចលាយជាមួយទឹកក្ដៅឧណ្ហៗនិងសាប៊ូលាងចាន រួចចាក់ក្រឡុកលាងសម្អាតថូ ឬកែវនោះជាតិស្នឹមប្រឡាក់នឹងជ្រះអស់។

២. ទឹកប៉េងប៉ោះ៖ គ្រាន់តែលាយទឹកប៉េងប៉ោះជាមួយអំបិល អ្នកអាចយកវាទៅប្រើសម្រាប់សម្អាតច្រែះស្នឹមលើសម្ភារៈប្រើប្រាស់ក្នុងផ្ទះបាយ ដូចជាខ្ទះឆា កាំបិតហាន់សាច់ ចានស្រាក់ ស្លាបព្រា ឆ្នាំងច្រែះស៊ី ជាដើម។

៣. ក្រូចឆ្មា៖ ជារបស់មានប្រយោជន៍ច្រើនដែលអ្នកតែងមាននៅក្នុងផ្ទះបាយ អ្នកអាចលាយក្រូចឆ្មាជាមួយម្សៅសូដា (អាចរកទិញបាននៅផ្សារទំនើប) ប្រើសម្រាប់ការកម្ចាត់ស្នាមប្រឡាក់ជាប់ស្អិតនិងធ្វើឲ្យមានក្លិនក្រអូបទៀតផង។

៤. សំបកក្រូច៖ ដាក់សំបកក្រូចត្រាំក្នុងទឹកខ្មេះ រួចអ្នកនឹងទទួលវត្ថុធាតុសម្រាប់សម្អាតនិងជម្រះក្លិនមិនល្អផ្សេងៗនៅក្នុងផ្ទះបាយបានយ៉ាងល្អ និងធ្វើឲ្យមានក្លិនក្រអូបក្រូចឆ្មាផងដែរ៕