បន្លែខាត់ណាជួយបន្ថយហានិភ័យខ្លាញ់រុំថ្លើមឬជំងឺមហារីកថ្លើម

2016-04-04 21:40:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រូខូលី (ខាត់ណាអាមេរិកំាង) ជាបន្លែពេញនិយមមួយរបស់ប្រជាជនជាច្រើនលើពិភពលោកបន្ទាប់ពីអ្នកវិទ្យាសាស្ត្របានបង្ហាញថា ការបរិភោគប្រូខូលីបីទៅប្រាំដងក្នុងមួយសប្ដាហ៍ជួយបន្ថយហានិភ័យជំងឺមហារីកសុដន់ ក្រពេញប្រូស្តាត និងពោះវៀនធំ ហើយនាពេលថ្មីៗនេះអ្នកវិទ្យាសាស្ត្របង្ហាញទៀតថា ប្រូខូលីជួយប្រឆាំងនឹងជំងឺមហារីកថ្លើមផងដែរ។

តាមសារព័ត៌មាន Daily Mail អ្នកស្រី Elizabeth Jeffery សាស្ត្រាចារ្យនៅសកលវិទ្យាល័យIllinois សហរដ្ឋអាមេរិកនិងក្រុមស្រាវជ្រាវបានឲ្យដឹងថា របបអាហារមានជាតិខ្លាញ់ និងជាតិស្ករខ្ពស់ដែលបណ្ដាលឲ្យមានភាពធាត់និងទាក់ទងនិងការវិវឌ្ឍជំងឺមហារីកថ្លើម។ តាមការសិក្សាពីមុនៗបានបង្ហាញថាប្រូខូលី ឬពពួកផ្កាខាត់ណា ផ្ទុកសមាសធាតុSulforaphane ដែលជួយកម្ចាត់ការប្រមូលផ្ដុំជាតិខ្លាញ់រុំថ្លើមនិងប្រឆាំងការវិវឌ្ឍរោគមហារីកថ្លើមផងដែរ។

ដោយផ្អែកតាមការសិក្សាពីមុន ក្រុមស្រាវជ្រាវដឹកនាំដោយអ្នកស្រីសាស្ត្រាចារ្យ Jeffery បានពិសោធលើសត្វកណ្ដុរតាមរយៈការបញ្ចូលផ្កាខាត់ណាក្នុងរបបអាហាររបស់កណ្ដុរពិសោធន៍។ លទ្ធផលបានបង្ហាញថាកណ្ដុរដែលបានស៊ីរបបអាហារជាតិខ្លាញ់ច្រើនដូចជាម្ហូបប្រទេសលោកខាងលិចគឺមានដុំពកៗមហារីក(ថ្លើមសុខភាពមិនល្អ)ច្រើន ចំណែកកណ្ដុរដែលមានស៊ីផ្កាស្ពៃខាត់ណាមានដុំពកៗតិចជាង។

អ្នកស្រីសាស្ត្រាចារ្យ Jefferyបានបន្ថែមទៀតថា ជាតិខ្លាញ់រុំថ្លើមមិនត្រឹមតែបណ្ដាលមកពីការបរិភោគអាហារសំបូរជាតិខ្លាញ់ធាត់ប៉ុណ្ណោះទេប៉ុន្តែការសេពគ្រឿងស្រវឹងច្រើនពេកក៏បណ្ដាលឲ្យកើតអាការៈបែបនោះផងដែរ។ ចំណែកបន្លែផ្កាស្ពៃប្រូខូលីជួយកាត់ទប់ស្កាត់សារធាតុខ្លាញ់មិនល្អទៅក្នុងថ្លើម។