ខ្សែ​ភាពយន្ត​ដ៏​ល្បីល្បាញ​របស់​ហូលីវូដ "Rogue One: A Star Wars Story” ទើប​តែ​ចេញ​ trailer វគ្គ​ថ្មី​មួយ​ទៀត ដែល​ក្នុង​នោះ​ក៏​មាន​​វត្តមាន​តារា​សម្ដែង​ចិន Donnie Yen (កុំកុំ) និង Jiang Wen ដែរ។

​វីដេអូ​ trailer នេះ​បាន​ធ្វើ​ឲ្យ​ទស្សនិកជន​មើល​ឃើញ​រូបភាព​ដំបូង​ខ្លះ​ៗ​ពី​វគ្គ​​ថ្មី​របស់​ស៊េរី​ភាពយន្ត "Star Wars” ហើយ​នេះ​ជា​លើក​ដំបូង​ហើយ​ដែល​តួ​រឿង​ "Ip Man” Donnie Yen និង​តារា​ចិន Jiang Wn ចូលរួម​សម្ដែង​ក្នុង​រឿង​នេះ ហើយ​គឺ​ជា​តួ​អង្គ​សំខាន់​ៗ​ទៀត​ផង។

ដើម្បី​ផ្គាប់​ចិត្ត​ទស្សនិកជន​នៅ​ចិន​និង​បង្កើន​ទំនាក់ទំនង​ផង ផលិតករ​ភាពយន្ត​លោក Kathleen Kennedy បាន​បង្ហើប​ក្នុង​ឱកាស​ពិធី​បញ្ចាំង​សម្ពោធ​ភាពយន្ត​វគ្គ​មុន "Star Wars: The Force Awakens” នៅ​ទីក្រុង​សៀងហៃ កាល​ពី​ខែ​ធ្នូ ឆ្នាំ​២០១៥​ថា តារា​ទាំង​ពីរ​រូប​នេះ​នឹង​សម្ដែង​ជា​តួ​អង្គ​ខ្លាំង​ៗ ហើយ​ក្នុង​វគ្គ​នេះ​នឹង​មាន​បង្កប់​សាច់​រឿង​​បុរាណ​ជា​ច្រើន​​ពី​ក្នុង​អក្សរសាស្ត្រ​ចិន។

តួ​អង្គ​សំខាន់​ៗ​ដទៃ​ក្នុង​ភាពយន្ត​នេះ​រួម​មាន Felicity Jones, Diego Luna, Ben Mendelsohn, Forest Whitaker, Mads Mikkelsen និង Riz Ahmed។

"Rogue One: A Star Wars Story" ដែល​ដឹកនាំ​ដោយ Gareth Edwards នឹង​បរិយាយ​ពី​សាច់​រឿង​ដែល​កើត​ឡើង​មុន​​សាច់​រឿង "Star Wars” កាល​ពី​ឆ្នាំ​១៩៧៧ និង​និយាយ​ពី​ក្រុម​បះបោរ​មួយ​ក្រុម​ដែល​ព្យាយាម​លួច​គម្រោង​ផ្សេង​ៗ​សម្រាប់ Death Star។

ភាពយន្ត​នេះ​នឹង​ចាក់​បញ្ចាំង​នៅ​ថ្ងៃ​ទី​១៦ ខែ​ធ្នូ ឆ្នាំ​២០១៦។ ទស្សនា​វីដេអូ trailer ខាង​ក្រោម​នេះ​តែ​ម្ដង៖

ចុចអាន៖ទី​បំផុត កុំកុំ បាន​ដើរ​តួ​​ក្នុង​រឿង​ល្បី​​​ហូលីវូដ ឯ​តម្លៃ​ខ្លួន​​វិញ​គឺ​ …

ប្រែ​សម្រួល៖ វ៉ាន់ថន ប្រភព៖ china.org