កុំមើលកញ្ចក់ពេលយប់... ប្រយ័ត្ន...!

2014-10-27 15:36:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃមួយ ខ្ញុំ បងប្អូន និងឪពុកម្ដាយបានចេញពីស្រុកទៅលេងសមុទ្រ ដែលជាកន្លែងពេញនិយមមួយ។ ពេលដល់គោលដៅ ពួកយើងបានជួលបន្ទប់ផ្ទះសំណាក់ស្នាក់នៅ។

រូបតំណាង

បន្ទប់នោះមានគ្រែពីរ។ គ្រែមួយក្បែរបង្អួចនិងទ្វារ ចំណែកគ្រែខ្ញុំនៅទល់មុខបន្ទប់ទឹក។ ក្រោយញ៉ាំអាហារសមុទ្រ និងដើរលេង មុជទឹកយ៉ាងសប្បាយ ពួកយើងក៏នាំគ្នាលាងខ្លួន មកសម្រាកនៅផ្ទះសំណាក់វិញ។ យប់នោះដោយសារអស់កម្លាំងពេក ឪពុកម្ដាយ និងប្អូនរបស់ខ្ញុំគេងលក់អស់ ចំណែកខ្ញុំនៅយប់ជាងគេ។

ម៉ោងប្រហែល១២ ជិត១ ខ្ញុំបានបិទកុំព្យូទ័រ និងបិទភ្លើង ហើយខ្ញុំមានអារម្មណ៍ថា ដូចមានមនុស្សកំពុងសម្លឹងខ្ញុំ។ គ្មានខ្យល់ វាំងននបង្អួចអត់បើក រីឯឪពុកម្ដាយ និងប្អូនគេងលក់អស់ តែយ៉ាងណាខ្ញុំធ្វើធម្មតាដូចគ្មានរឿងអ្វីកើតឡើង រួចដើរចូលបន្ទប់ទឹកលាងជូតខ្លួនបន្តិច។

ពេលលុបមុខ ហើយមើលកញ្ចក់ ស្រាប់ចេញស្រីសក់វែងគ្របមុខ ស្លៀកសឈរក្រោយខ្នង។ អស់ហើយព្រលឹងក្នុងខ្លួន ខ្ញុំសម្រុកចេញទាំងកម្រោលទៅកាន់គ្រែ។

ភ្លើងចេញពីម៉ាស៊ីនត្រជាក់ បំភ្លឺគ្រប់គ្រាន់អាចមើលឃើញគ្រែរបស់ខ្ញុំ និងបន្ទប់ទឹក។ ខ្ញុំបានលួចក្រលៀសភ្នែកមើលបន្ទប់ទឹក ហើយក៏នៅតែឃើញស្រីម្នាក់នៅក្នុងកញ្ចក់។ ខ្ញុំព្យាយាមបិទភ្នែកដេក តែភ្នែកខ្ញុំនៅតែចង់មើលថាមានអ្វីកើតឡើងទៀត។

ខ្ញុំប្រឹងសម្ងំបិទភ្នែក ហើយបង្ហើបភួយតិចៗ ស្រាប់តែកញ្ចក់ចេះតែខ្ពស់ឡើងៗ បេះដូងខ្ញុំលោតញាប់ ឌុកឌាក់ៗ ព្រឺរោមច្រាង ឈឺនោមបន្តិច ឈឺជុះបន្តិច។ ខ្ញុំក៏បានរត់ទៅដេកជិតប្អូនប្រុសពៅខ្ញុំ ហើយគ្របភួយជិតឈឹង លែងហ៊ានមើល។

ព្រឹកឡើងទ្វារបន្ទប់ទឹកបិទ ខណៈខ្ញុំនៅតែមានអារម្មណ៍ភ័យខ្លាចថានឹងមានអ្នកណា មើលខ្ញុំទៀត។ ដោយឡែកម្ដាយរបស់ខ្ញុំ បានថតរូបជុំវិញបន្ទប់ ហើយគាត់និយាយថា៖" វ៉ោវ! បន្ទប់របស់យើងមានខ្មោចលង។ មើលរូបនែ៎ក!”។

ក្នុងរូបថតមានស្រមោលខ្មោចស្រី ខ្ញុំមើលរូបភ្លាម ខ្ញុំព្រឺក្បាលខ្ញាក ហើយខ្ញុំក៏បានប្រាប់រឿង ដែលខ្ញុំឃើញទាំងប៉ុន្មានដល់ឪពុកម្ដាយខ្ញុំ។ ក្រោយមានរឿងបែបនេះ ពួកយើងក៏សុំគេដូរបន្ទប់ ហើយស្អែលឡើងត្រឡប់មកផ្ទះវិញ ទាំងមិនសប្បាយចិត្ត។

ចាស់ៗច្រើននិយាយថា ពេលយប់ជ្រៅកុំមើលកញ្ចក់ ក្រែងមើលឃើញអ្វីៗមិនល្អ ដូចជាខ្មោចព្រាយបិសាច ចង់បន្លាចយើង។ តើអ្នកជឿអត់? (បទពិសោធន៍របស់ជនជាតិអាមេរិកវ័យ១៧ឆ្នាំ)

ជំនឿឆ្មាខ្មៅកន្លងសព ស្ដាប់ហើយព្រឺក្បាលខ្ញាក! ចុចអាន

ប្រែសម្រួល៖ អ៊ុំ សុភក្តិ

ប្រភព៖ Yourghoststorie