កសិករចិនចំណាយពេលពីរខែ ធ្វើកប៉ាល់មុជទឹកបាន១គ្រឿង
- 2016-04-29 16:49:14
- ចំនួនមតិ 0 | ចំនួនចែករំលែក 0
កសិករចិនចំណាយពេលពីរខែ ធ្វើកប៉ាល់មុជទឹកបាន១គ្រឿង
ចន្លោះមិនឃើញ
កសិករចិនវ័យ៥១ឆ្នាំម្នាក់បានច្នៃបង្កើតចេញជាកូនកប៉ាល់មុជទឹកមួយគ្រឿងចំណាយអស់ ៥ពាន់យាន់ (៧៧២ដុល្លារ) ធ្វើឲ្យសារព័ត៌មានជាច្រើនចាប់អារម្មណ៍ចុះផ្សាយ។
តាមសារព័ត៌មាន People Dailyលោក Zhang Shengwu មកពីក្រុង Maanshan ខេត្ត Anhui ភាគខាងកើតប្រទេសចិន បានចំណាយពេលពីរខែដើម្បីបង្កើតកូនកប៉ាល់នោះឡើង។ កប៉ាល់មុជទឹកដែលអាចផ្ទុកមនុស្ស១នាក់បានរបស់លោក Zhang មានប្រវែង៦ម៉ែត្រ ដោយមានភ្ជាប់បំពង់ទុយយោតូចទៅលើផ្ទៃទឹកដើម្បីផ្ដល់អុកស៊ីហ្សែនក្នុងបន្ទប់កប៉ាល់ខាងក្នុងពេលមុជទឹក។
បើតាមលោក Zhang បានឲ្យដឹងថាលោកមិនអាចបើកកប៉ាល់របស់លោកមុជទឹកបានយូរទេ ដោយសារតែបន្ទប់កប៉ាល់តូចចង្អៀតនិងមិនអាចផ្ទុកបំពង់ខ្យល់បានគ្រប់គ្រាន់។ ចំពោះល្បឿនកប៉ាល់មុជទឹករបស់លោកគឺអាចធ្វើដំណើរបានល្បឿន១១គីឡូម៉ែត្រក្នុងម៉ោង។ នេះបើតាមសារព័ត៌មាន China.com។
ចំពោះការបង្កើតខាងលើ លោក Zhang បានទទួលប័ណ្ណប៉ាតង់ពីការិយាល័យកម្មសិទ្ធិបញ្ញានៃប្រទេសចិនផងដែរ។ ចំពោះលោក Zhang ផ្ទាល់លោកបានឲ្យដឹងថាលោកនឹងមានគម្រោងអភិវឌ្ឍធ្វើទូកសង្គ្រោះនាពេលខាងមុខផងដែរ៕
ចុចអាន៖ កប៉ាល់ទេសចរណ៍យក្សទាំង១០ដែលទំនើបនិងមានតម្លៃថ្លៃខ្ទង់ពាន់លានដុល្លារ
ប្រែសម្រួល៖ មាន រតនា ប្រភព៖ people Daily