គេគ្មានសង្សារ តែមិនព្រមស្រលាញ់អ្នក គួរតាមគេទៀតអត់?

2016-05-18 16:28:53
ចំនួនមតិ 0 | ចំនួនចែករំលែក 0

ចន្លោះមិនឃើញ

អាចនិយាយបានថា មនុស្សភាគច្រើន តែងមានបទពិសោធន៍ស្នេហា ហើយអ្នកខ្លះក៏ធ្លាប់ខកចិត្ត ព្រោះតែពួកគេទទួលបានចម្លើយ «No»។ ចំពោះយុវវ័យខ្លះ បើទោះបានចម្លើយអវិជ្ជមានក្ដី ក៏ពួកគេនៅតែតាមស្រលាញ់ ដោយប្រើទស្សនៈថា "តាមគេស្អិត គេគង់តែបាក់ចិត្តស្រលាញ់ទេ"។ ចុះបើគេមិនស្រលាញ់ តើគួរតាមចែចូវគេទៀតទេ ឬត្រូវសម្លាប់ចិត្តស្រលាញ់ចោល ទៅស្វែងរកមនុស្សដែលស្រលាញ់ខ្លួនវិញ?

លោក ច័ន្ទមុនី អាជីវករមួយរូប បានបញ្ចេញទស្សនៈថា បើសិនជានារីម្នាក់នោះ មិនទាន់មានគូកំណាន់ចិត្តទេ អ្នកគួរតាមស្រលាញ់ និងព្យាយាមធ្វើយ៉ាងណា ឱ្យនារីម្នាក់នោះយល់ពីចិត្ត និងទង្វើរបស់អ្នក។ ប៉ុន្តែអ្វីដែលសំខាន់ ត្រូវយល់សិនថា នាងមានចរិតម៉េច? ជាមនុស្សរបៀបណា? ចូលចិត្តអ្វី?

លោក បញ្ជាក់ថា៖ "ខ្ញុំមិនជឿថា មិនបានផលទេ ប៉ុន្តែបើខំហើយអត់បានផល គួរបញ្ឈប់វាទៅ!”។

ចំណែកកញ្ញា សុជាតិ គណនេយ្យករ នៅអង្គការក្រៅរដ្ឋាភិបាលមួយ បានលើកឡើងថា បើគេនោះមិនស្រលាញ់អ្នក អ្នកគួរបន្តស្រលាញ់គេទៀត បើអ្នកគិតថា បុរសឬនារីនោះ ជាមនុស្សតែម្នាក់ ដែលអាចឆក់យកបេះដូងអ្នកបាន។ ប៉ុន្តែវាជាស្នេហាឆ្កួតបំផុត ដែលក្ដីស្រលាញ់មានតែម្ខាង ប្រៀបបីដូចជា «ច្រៀងឱ្យថ្មស្ដាប់»។

បើរឿងនេះមានលើសុជាតិវិញ សុជាតិ យល់ថា នាងនៅតែស្រលាញ់ បើទោះបុរសម្នាក់នោះ បានរស់នៅជាមួយអ្នកដែលគេស្រលាញ់។

"ខ្ញុំនៅតែស្រលាញ់គេ ប៉ុន្តែមិនបានន័យថា ឱ្យយើងស្រលាញ់គេ និងរង់ចាំគេទេ។ យើងសប្បាយចិត្ត ពេលយើងឃើញគេ មានក្ដីសុខជាមួយមនុស្សគេស្រលាញ់។ ប៉ុណ្ណឹងខ្ញុំអស់ចិត្តហើយ!"។

កញ្ញាបន្ថែមថា ស្នេហាមិនអាចបង្ខំបានទេ ព្រោះមនុស្សម្នាក់ៗ មានសិទ្ធិជ្រើសរើស អ្នកដែលគេស្រលាញ់។

ចំណែកលោក សីហា បុគ្គលិកក្នុងក្រុមហ៊ុនឯកជនមួយ ក្នុងទីក្រុងភ្នំពេញ បានរៀបរាប់ថា បើសិនបុរស-នារីណាម្នាក់ មានសង្សារហើយនោះ អ្នកគួរបញ្ឈប់ការស្រលាញ់ទៅ ព្រោះបើព្យាយាមតាមទៀត គេអាចនឹងស្អប់ក៏ថាបាន។

តាមឬមិនតាម វាអាស្រ័យលើបុគ្គលម្នាក់ៗ ប៉ុន្តែសម្រាប់យុវជន សីហា វិញយល់ឃើញថា បើករណីនេះកើតលើរូបលោក លោកនឹងមិនបោះបង់ចិត្តស្រលាញ់ឡើយ ហើយនឹងព្យាយាម ធ្វើអ្វីល្អៗជាមួយនាង និងបើកចិត្តឱ្យទូលាយជានិច្ច។

មនុស្សមានអត្តចរិតផ្សេងគ្នា តែ សីហា ថា ៖ "ចំពោះខ្ញុំ ខ្ញុំនឹងព្យាយាមធ្វើល្អជាមួយគេ បារម្ភពីគេ តែមិនបាច់ប្រាប់ថា ស្រលាញ់គេទេ។ បើចិត្តឱ្យទូលាយ ថ្ងៃណាមួយ គេនឹងយល់ពីយើង"។

ចុះអ្នកវិញយល់ម៉េចដែរ?

ចុចអាន៖ នាងសំណាងណាស់ ព្រោះមានអ្នកមានចិត្តស្មោះ ដណ្ដឹងធ្វើប្រពន្ធ

ចុចអាន៖ ស្រីៗយល់បែបណាដែរ ពេលឃើញមិត្តប្រុស និង ស្វាមីដាក់ស្រោមតាមខ្លួន?

អត្ថបទ៖ អ៊ុំ សុភក្តិ