“កំណប់បះសក់" ដាក់សម្ពោធ មិនញញើតភាពយន្តថៃ

2014-10-28 17:27:24
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកដឹកនាំរឿង "កំណប់បះសក់" ភាពយន្តបែបកំប្លែង បានអះអាងថា បើទោះនេះជាស្នាដៃដំបូងរបស់ផលិតកម្ម X Seven ក៏ពិតមែន ប៉ុន្តែលោកហាក់មិនមានការព្រួយបារម្ភឡើយ ពីការមកដល់ជាថ្មីនៃភាពយន្តថៃ ដែលត្រូវបានបើកទ្វារឲ្យចរាចរណ៍ឡើងវិញកាលពីខែមុននេះ។

លោក សន ចាន់តារារិទ្ធ អ្នកដឹកនាំរឿង "កំណប់បះសក់" ថ្លែងក្នុងពិធីបើកសម្ពោធដាក់បញ្ចាំងភាពយន្តរបស់ខ្លួនយប់មិញ ដោយចំពេលភាពយន្តថៃចាប់ដាក់បញ្ចាំងឡើងវិញលើកញ្ចក់ទូរទស្សន៍ក្នុងស្រុក។ “ភាពយន្តថៃ គេល្អមែនហើយ ប៉ុន្តែសម្រាប់ខ្ញុំ មិនជាបញ្ហាឡើយ រឿងដែលត្រូវគិតគឺភាពយន្តក្នុងស្រុកយើងទៅវិញ។ ខ្ញុំក៏អត់មានព្រួយបារម្ភដែរជាមួយភាពយន្តក្នុងស្រុក គឺយើងគ្រាន់តែពង្រឹងគុណភាពទៅគឺបានហើយ"។

ឯកឧត្តម ជា ច័ន្ទបរិបូរណ៍ រដ្ឋលេខាក្រសួងព័ត៌មានដែលចូលរួមជាកិត្តិយសយប់មិញ ក៏ថ្លែងដែរថា យើងអាចខ្លាច ប៉ុន្តែមិនត្រូវខ្លាចដូចជាសត្វត្រដេវវិច ដែលដេកយកជើងទ្រមេឃនោះទេ ប៉ុន្តែត្រូវកែប្រែការភ័យខ្លាចនោះ ទៅជាគន្លឹះអភិវឌ្ឍន៍ខ្លួនដើម្បីគេចពីភាពភ័យខ្លាចនេះ នោះយើងនឹងរឹងមាំ។ "សូមឲ្យផលិតករ សិល្បករយើងបើកចិត្តទូលាយ និងត្រូវចេះស្វែងរកការបណ្ដុះបណ្ដាលនានាដើម្បីលើកកម្ពស់ខ្លួនឯង ខ្ញុំចង់សង្កត់ធ្ងន់ថា សូមកុំឲ្យភាពគ្រប់គ្រាន់និយម"។ ឯកឧត្តមបន្ថែម។

វិលមក លោក ប៉ាន់ ខែមប៊ុនថន ប្រធានផលិតកម្មវិធីនៅទូរទស្សន៍អប្សរាវិញ ថ្លែងដូចគ្នាថា នេះជាឱកាសដ៏ល្អសម្រាប់ ផលិតករ សិល្បករ កែប្រែសមត្ថភាពហើយ ដូច្នេះមិនត្រូវមានការព្រួយបារម្ភនោះឡើយ ព្រោះមានតែការប្រកួតប្រជែងប៉ុណ្ណោះដែលអាចឲ្យយើងដើរទៅមុខបាន។

ទន្ទឹមគ្នានេះ លោក ប៊ុនថន នៅបានស្នើសុំការគាំទ្រចំពោះភាពយន្តបែបកំប្លែង "កំណប់បះសក់" ដែលបានសម្ពោធដាក់បញ្ចាំងនៅយប់មិញនេះដែរ។ លោក ថា "កំណប់បះសក់" គឺជានេះជាស្នាដៃសុទ្ធសាធរបស់ខ្មែរ ដូច្នេះដើម្បីឈានដល់កម្រិតអាចប្រកួតប្រកួតជាមួយគេបាន គឺផ្ដើមចេញពីការគាំទ្ររបស់ទស្សនិកជនក្នុងស្រុក ផ្សំនឹងការផលិតប្រកបដោយគុណភាពផង។

លោក ប៉ាន់ ខែមប៊ុនថន ប្រធានផលិតកម្មវិធីនៅទូរទស្សន៍អប្សរា

ភាពយន្តបែបកំប្លែងរឿង “កំណប់បះសក់" គឺជាវណ្ណកម្មដំបូងរបស់ផលិតកម្ម X Seven ដែលបានចំណាយពេលផលិតរហូតរួចរាល់អស់ពេលជាច្រើនខែ។ លោក បុត្រ រំដួលរង្សី ជាតួឯកប្រុស ព្រមទាំងជាចាងហ្វាងផលិតកម្ម និងជាអ្នកដឹកនាំរឿងថ្លែងថា បើទោះជាផលិតកម្មរបស់លោកថ្មីថ្មោង ប៉ុន្តែអ្នកធ្វើការលើការផលិតសុទ្ធជាចាស់ទុំក្នុងវិស័យភាពយន្ត។ យ៉ាងណាក៏ដោយ លោកជឿថា នៅមានចន្លោះប្រហោងខ្លះ ដូច្នេះសុំការយោគយល់ និងគាំទ្រលើកទឹកចិត្តពីប្រិយមិត្ត។

លោក បុត្រ រំដួលរង្សី ចាងហ្វាងផលិតកម្ម X Seven ព្រមជាអ្នកដឹកនាំ និងជាតួឯកប្រុស

លោក រង្សី អះអាងថា បន្ទាប់ពី "កំណប់បះសក់" នេះ លោកគ្រោងនឹងផលិតរឿងថ្មីមួយទៀតក្នុងពេលឆាប់ៗ ដោយចំណាយទុនធំ។ បន្ទាប់ពីសម្ពោធយប់មិញ ភាពយន្តកំប្លែងសើចសប្បាយមួយនឹងដាក់បញ្ចាំងផ្លូវការនៅដើមខែវិច្ឆិកា២០១៤នេះ នៅរោងភាពយន្ត Major Cineplex By Cellcard, Platinum Cineplex និង Legend (សាខា City Mall, TK និងស្ទឹងមានជ័យ)៕