ត្រាច់ចររុញរទេះមួយថ្ងៃ ១៥ម៉ោង ដើម្បីប្រាក់ ២ម៉ឺនរៀល

2016-05-19 20:53:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ម៉ោង ១០យប់ ជាវេលាសមល្មមសម្រាប់គ្រប់គ្នាចូលនិន្ទ្រាបិទទ្វារផ្ទះរៀងៗខ្លួន ប៉ុន្តែបុរសចំណាស់ម្នាក់នៅតែបន្តត្រាច់ចររុញរទេះ លក់ការ៉េមកីទាំងវ័យ ៦៥ឆ្នាំ។ មិនមែនជារឿងចម្លែកអ្វីឡើយ ព្រោះជាទម្លាប់ទៅហើយ ដែលអ៊ំប្រុស សាន់ សេង ត្រូវរុញរទេះបែបនេះក្នុងមួយថ្ងៃប្រហែល ១៥ម៉ោង ដើម្បីប្ដូរប្រាក់កម្រៃ ២ម៉ឺនរៀលប៉ុណ្ណោះ។

លោក សាន់ សេង មានស្រុកកំណើតនៅភូមិស្គរទូង ឃុំភ្នំកុង ស្រុកអង្គរជ័យ ខេត្តកំពត។ ដោយសារជីវភាពក្រីក្រពិបាកត្រដររស់នៅស្រុកស្រែចម្ការតទៅទៀត អ៊ំប្រុស សេង ក៏សម្រេចចិត្តត្រាច់ចរមកភ្នំពេញកាលពី ១០ឆ្នាំមុន និងបន្តរបរលក់ការ៉េមដែលជាអាជីពប្រចាំជីវិតជាង ២០ឆ្នាំមកហើយ។

កំពុងបន្លឺសំឡេងកណ្ដឹងលក់ការ៉េមតាមផ្លូវ នៅវេលាម៉ោង ១០យប់ អ៊ំប្រុស សេង បានងាកមកប្រាប់ Sabay ថា៖ "មកពីក្រីក្រអូន... គ្មានអីសោះ បាតដៃទទេ គឺឡើងមកលក់តែម្នាក់ឯង ហើយមួយថ្ងៃផាត់ហើយបានតែ ២ម៉ឺន ២ម៉ឺនជាងអីហ្នឹង... ហ្នឹងបើអស់ បើសល់អត់ចំណេញទេ ជំពាក់ថៅកែ"។

និយាយពីរបរដ៏យ៉ាប់យឺននេះ អ៊ំប្រុស សេង បានរៀបរាប់ទាំងទឹកមុខស្រពាប់ស្រពោនថា ការ៉េមព្រឹកឡើងត្រូវយកពីថៅកែ ចេញទៅលក់នៅតាមមាត់ទន្លេម្ដុំអរិយក្សត្រតាំងពីព្រលឹមម៉ោង ៧ព្រឹក រួចរុញរទេះដើរលក់ហូរហែរហូតម៉ោងប្រហែល ១០យប់ ទើបត្រលប់ទៅកន្លែងដើមវិញនៅម្ដុំសំណង់១២។ ពេលយប់ អ៊ំប្រុសស្នាក់នៅជាមួយអ្នកលក់ការ៉េមផ្សេងទៀត ដែលជាកន្លែងផ្ដល់ដោយថៅកែ។

តាមពិត លោក សាន់ សេង ក៏មានប្រពន្ធ ថែមទាំងមានកូនប្រុសពេញកម្លាំង ២នាក់ទៀត ប៉ុន្តែមិនអាចជួយអ្វីបានឡើយ ព្រោះសុទ្ធតែធ្វើការមួយថ្ងៃដើម្បីមួយថ្ងៃដូចគ្នា។ កូនប្រុសច្បង អាយុ ២០ឆ្នាំ បានរៀនចប់បាក់ឌុប មកធ្វើការនៅភ្នំពេញ តែអភ័ព្វគ្រោះថ្នាក់ចរាចរណ៍បាក់ជើង ទៅសម្រាកព្យាបាលនៅផ្ទះជាមួយម្ដាយវិញ។ ចំណែកកូនប្រុសទី២ អាយុ ១៨ឆ្នាំ កំពុងធ្វើការសំណង់នៅស្រុកកំណើតបានត្រឹមមួយចម្អែតក្រពះប៉ុណ្ណោះ៕