វិសាខបូជា មានឥទ្ធិពលធំជាងហែអ្នកតាចិន និងបុណ្យនានានៅកម្ពុជា

2016-05-19 18:45:18
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនាំពាក្យនៃក្រសួងធម្មការនិងសាសនា អះអាងថា វិសាខបូជា ជាបុណ្យសាសនាធំមួយដែលសាសនាដទៃនៅកម្ពុជាពុំមានឥទ្ធិពលស្មើនោះឡើយ។

មានការហូរចូលសាសនាជាច្រើនមកកម្ពុជា ហើយកន្លងមកគេឃើញបុណ្យគ្រឹស្តសាសនាបានគ្របដណ្ដប់ចិត្តគំនិតយុវវ័យ និងពិធីហែអ្នកតាចិនមានក្បួនដង្ហែព្រោងព្រាតស្ទើរស្ទះផ្លូវគ្រប់កន្លែង។ ទោះយ៉ាងណា លោក សេង សុមុនី អនុរដ្ឋលេខាធិការនិងជាអ្នកនាំពាក្យនៃក្រសួងធម្មការនិងសាសនា ចាត់ទុកថា បុណ្យវិសាខបូជាមានឥទ្ធិពលធំជាង។

លោក ថា៖ "នេះគ្រាន់ជាមើលឃើញមួយជ្រុងតូច។ ជាក់ស្ដែងវិសាខបូជាមានឥទ្ធិពលធំជាងបុណ្យទាំងនោះ" ។ បុណ្យហែអ្នកតាឬគ្រឹស្តសាសនាធ្វើឡើងតែក្នុងរាជធានីភ្នំពេញឬតំបន់ណាមួយប៉ុណ្ណោះ។ ចំណែកវិសាខបូជាប្រារព្ធឡើងទូទាំងប្រទេសគ្រប់វត្តអារាម ព្រមទាំងមានថ្នាក់ដឹកនាំជាតិចូលរួមទៀតផង។

លើសពីនេះ ប្រការសំខាន់មួយទៀតគឺអង្គការសហប្រជាជាតិបានទទួលស្គាល់វិសាខបូជា ជាពិធីបុណ្យអន្តរជាតិមួយដែលគេអាចប្រារព្ធធ្វើនៅតាមការិយាល័យទាំងឡាយរបស់អង្គការ សហប្រជាជាតិនៅលើពិភពលោក។

លោកបានច្រានចោលដែលថាព្រះពុទ្ធសាសនាបានធ្លាក់ចុះ ហើយបុណ្យទាក់ទងនឹងព្រះពុទ្ធសាសនាដែលជាសាសនារដ្ឋហាក់មិនសូវមានការចាប់អារម្មណ៍ច្រើន។

សូមទស្សនាវីដេអូខាងក្រោម៖

វិសាខបូជាឬពិសាខបូជា ជាពិធីបុណ្យដែលពុទ្ធសាសនិកចាត់ទុកថាមានសារសំខាន់បំផុតមួយក្នុងចំណោមបុណ្យដទៃទៀតនៃព្រះពុទ្ធសាសនា។ បុណ្យនេះតែងប្រារព្ធឡើងក្នុងថ្ងៃ ១៥កើត ខែពិសាខ ។

សម្រាប់ស្អែកនេះ លោក សុមុនី ប្រាប់ថានឹងមានការដង្ហែព្រះសិរីរិកធាតុពីរាជធានីភ្នំពេញទៅភ្នំឧដុង្គ រួមទាំងមានពិធីរាប់បាត្រដោយចូលរួមពីពុទ្ធសាសនិកជនជាច្រើន៕

អត្ថបទ៖ លឹម សុនា