Starbucks សម្ពោធសាខាថ្មីកក្រើកពេញផ្សារ AEON
- 2016-05-26 00:18:07
- ចំនួនមតិ 0 | ចំនួនចែករំលែក 0
Starbucks សម្ពោធសាខាថ្មីកក្រើកពេញផ្សារ AEON
ចន្លោះមិនឃើញ
Starbucks ជាហាងកាហ្វេដ៏ល្បីមានដើមកំណើតនៅសហរដ្ឋអាមេរិច ដែលប្រជាពលរដ្ឋខ្មែរជាច្រើនទន្ទឹងរង់ចាំជាយូរមកហើយនោះបានបើកសម្ពោធសាខាថ្មី នៅខាងមុខផ្សាទំនើបអ៊ីអនជាន់ផ្ទាល់ដី កាលពីព្រឹមមិញនេះ។
សម្ពោធលក់ថ្ងៃដំបូងនៅសាខាថ្មី អតិថិជនជាច្រើនរយនាក់ ដែលភាគច្រើនជាយុវវ័យបានតម្រង់ជួរយ៉ាងវែងនិងរង់ចាំជាច្រើនម៉ោងដើម្បីបានភ្លក់រសជាតិកាហ្វដ៏ល្បីឈ្មោះនេះ។
លោក ប៉ លីម ប្រធានគ្រប់គ្រងទូទៅ នៃ Starbucks កម្ពុជាបានឲ្យដឹងថា សាខាថ្មីចំកណ្តាលរាជធានីភ្នំពេញនេះរំពឹងថានឹងអាចចែករំលែកបទពិសោធន៍ថ្មីក្នុងទីផ្សារកាហ្វេកម្ពុជាកាន់តែខ្លាំង «អតិថិជនដែលមកទទួលទានកាហ្វេនៅ Starbucks នឹងទទួលបានរសជាតិឈ្ងុយឆ្ងាញ់ រួមទាំងបរិយាកាសកាន់តែល្អក្នុងការផ្សារភ្ជាប់ទំនាក់ទំនង ដែលយើងរំពឹងថានឹងក្លាយជាផ្ទះទីបី របស់អតិថិជនគ្រប់គ្នា បន្ទាប់ពីនៅជាមួយគ្រួសារនិងកន្លែងធ្វើការ»។
ប្អូនស្រី យូរី ដែលបានមករង់ចាំដំបូងគេបង្អស់ទទួលបានលេខរៀងទី១ ក្នុងជួរដ៏វែង បានឲ្យដឹងថា ប្អូនបានមកអង្គុយរង់ចាំតាំងពីម៉ោង៨ព្រឹកម្ល៉េះ។ ប្អូនបានឮកាហ្វេ Starbucks នេះល្បីយូរមកហើយ ប្អូនចង់ដឹងថាឆ្ងាញ់កម្រិតណា ហើយអ្វីដែលពិសេសនោះមកចាំមុនគេ ដើម្បីបានកែវទឹកស្រស់ស្អាតរបស់ Starbucks ដែលប្អូនចង់បានជាទីបំផុត។
ចំណែកប្អូនស្រី សុជាតា ដែលកំពុងរង់ចាំនៅលេខរៀងទី១១ បាននិយាយថា ប្អូនបានមកតម្រង់ជួរនៅម៉ោងប្រមាណ៩ព្រឹក។ ប្អូនធ្លាប់ញ៉ាំ Starbucks រួចហើយនៅបរទេស ហើយជក់ចិត្ត ពេលដឹងថា Starbucks មានបើកនៅភ្នំពេញប្អូនក៏ប្រញាប់បបួលមិត្តភ័ក្តមកសាកម្តងទៀត។
Starbucks បានចាប់ផ្តើមបើកលក់ជាផ្លូវការសម្រាប់អតិថិជនដំបូងបង្អស់នៅម៉ោង ១២ថ្ងៃត្រង់ទៅក្នុងថ្ងៃសម្ពោធនេះ ដោយអតិថិជន២០០នាក់ដំបូងនឹងទទួលបានកែវទឹករូបនិមិត្តសញ្ញា Starbucks ដ៏ស្រស់ស្អាតមួយនិងការលក់បញ្ចុះតម្លៃផ្សេងៗទៀត។
ហាងកាហ្វេ Starbucks មានពីរសាខា គឺនៅស្ថានីយចេញដំណើរព្រលានយន្តហោះអន្តរជាតិភ្នំពេញ និងផ្សារទំនើបអ៊ីអន ហើយគ្រោងនឹងបើកសាខាទីបីនៅក្នុងសង្កាត់បឹងកេងកង១ នៅចុងឆ្នាំនេះ៕
អត្ថបទៈ លីដា