ភ្លៀងខ្លាំងមួយមេម្សិលមិញ បន្សល់ទុករឿងកក្រើក ៣យ៉ាង
- 2016-06-09 16:40:24
- ចំនួនមតិ 0 | ចំនួនចែករំលែក 0
ភ្លៀងខ្លាំងមួយមេម្សិលមិញ បន្សល់ទុករឿងកក្រើក ៣យ៉ាង
ចន្លោះមិនឃើញ
ចាប់ពីម៉ោងប្រមាណជិត ១រសៀលម្សិលមិញនេះ ទឹកភ្លៀងបានធ្លាក់យ៉ាងខ្លាំងនៅក្នុងរាជធានីភ្នំពេញ និងតំបន់នានា ដែលធ្វើឲ្យមានព័ត៌មានចាប់អារម្មណ៍ជាច្រើនលេចឡើង ដូចជាការបាក់ស្រុតដីនៅជិតពហុកីឡដ្ឋានជាតិ ការរលំដើមឈើសង្កត់ឡាននៅសាកលវិទ្យាល័យភូមិន្ទភ្នំពេញ ព្រមទាំងការលិចទូកនៅកំពង់ចម្លងកោះកែវ។
១. ហេតុការណ៍បាក់ស្រុតដីជិតពហុកីឡដ្ឋានជាតិ
វេលាម៉ោងប្រមាណជាង១ ខណៈដែលភ្លៀងកំពុងធ្លាក់ខ្លាំង ដីចំណីផ្លូវនៅជាប់ការដ្ឋានសំណង់មួយក្បែរពហុកីឡដ្ឋានជាតិ បានស្រុតចុះក្រោមអំណាចទឹកហូរ។ រថយន្តបីគ្រឿង ម៉ាក CRV ២គ្រឿង និងកាមេរីបាឡែនមួយគ្រឿង បានចតចោលនៅកន្លែងកើតហេតុ ប៉ុន្តែគ្មានមនុស្សនៅក្នុងនោះទេ ព្រោះជារថយន្តដាក់លក់។ ក្រោយកើតហេតុភ្លាមៗ គេបានប្រើរថយន្តស្ទូចឡានទាំង៣ និងចាប់ផ្ដើមជួសជុលភ្លាមៗ។
ទស្សនាវីដេអូ៖
២. ហេតុការណ៍រលំដើមឈើសង្កត់ឡាននៅ RUPP
នៅម៉ោងប្រហែលគ្នានេះ ក៏មានហេតុការណ៍បាក់រលំដើមឈើធំមួយនៅក្រោយអគារ DMC សាកលវិទ្យាល័យភូមិន្ទភ្នំពេញ ដោយសង្កត់រថយន្ត ២គ្រឿងខូចខាតធ្ងន់ធ្ងរជាងគេ ប៉ុន្តែមិនមានប៉ះពាល់ដល់មនុស្សឡើយ។ បន្ទាប់ពីភ្លៀងរាំង ក្រុមសន្តិសុខបាននាំគ្នា អាកាត់ដើមឈើនោះចេញ ដើម្បីទាញយករថយន្តទៅជួសជុល។
ទស្សនាវីដេអូ៖
៣. ហេតុការណ៍លិចទូកនៅកំពង់ចម្លងកោះកែវ
នៅម៉ោងប្រហែល ១:៣០នាទី ទូកចម្លងកោះកែវ ជ្រោយដង ស្ថិតនៅភូមិកោះកែវក្រោម ឃុំកោះកែវ ស្រុកល្វាឯម ខេត្តកណ្ដាល បានដឹកអ្នកដំណើរឆ្លងទន្លេទៅចំណុចភូមិជ្រោយដង ឃុំសំរោងធំ ស្រុកកៀនស្វាយ ដែលមានអ្នកធ្វើដំណើរសរុប ០៨នាក់ ស្រី៦នាក់។
រៀបចេញដំណើរមេឃងងឹតរលឹមតិចៗ ហើយទូកថយចេញពីច្រាំងបានប្រហែល ៣០ម៉ែត្រ ស្រាប់តែធ្លាក់ភ្លៀងខ្យល់ខ្លាំងបក់មកដល់ បង្កឲ្យមានរលកធំៗបោកមកលើទូកក្រឡាប់លិចតែម្ដង។ ភ្លាមនោះ អ្នកដំណើរបានហែរួចខ្លួនចំនួន ០៦នាក់។ ក្នុងចំណោមអ្នកបាត់ខ្លួន ២នាក់ រកឃើញសាកសពម្នាក់ បាត់ខ្លួនក្មេងស្រីម្នាក់ សមត្ថកិច្ចកំពុងតាមរក៕
ចំពោះសម្ភារៈដែលបាត់បង់មាន៖
១. ម៉ូតូ C១២៥ ស៊េរី ២០១៥ ចំនួន ១គ្រឿង ២. ម៉ូតូ C១២៥ ស៊េរី ២០១២ ចំនួន១គ្រឿង ៣. ម៉ូតូ គុបជ្រុង C៩០ ១គ្រឿង ៤. ម៉ូតូ C១២៥ស៊េរី ២០១៣ ចំនួន១គ្រឿង ៥. ទូរសព្ទ ចំនួន០៥ រឿង ៦. ប្រាក់ ៧០០ដុល្លារនិងប្រាក់ ៥២០០០០ រៀល និងឯកសារមួយចំនួន ។
អត្ថបទ៖ គង់ វិសាល