មុខងារពិសេសៗចំនួន ៥ លើ iOS 10 ដែល Apple ទើបប្រកាស

2016-06-14 16:11:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងរយៈពេលពីរម៉ោងនៃព្រឹត្តិការ WWDC ដែលប្រារព្ធឡើងកាលពីយប់មិញនេះ ក្រុមហ៊ុន Apple បានបង្ហាញនូវសមិទ្ធផលថ្មីៗជាច្រើន រួមទាំងប្រព័ន្ធប្រតិបត្តិការ iOS ជំនាន់ទី ១០ ដែលមានបន្ថែមមុខងារថ្មីៗនិងពិសេសជាច្រើន។

១. ផ្ទាំង Lockscreen ថ្មី

ជាយូរមកហើយការបើកកម្មវិធីកាមេរ៉ាលើផ្ទាំង Lockscreen គឺត្រូវអូសពីក្រោមឡើងលើ ប៉ុន្តែជាមួយផ្ទាំង Lockscreen ថ្មីបានផ្លាស់ប្ដូរ ដោយគ្រាន់តែអូសផ្ទាំង Lockscreen ទៅខាងស្ដាំ នឹងបើកកម្មវិធីកាមេរ៉ាឡើងជាមិនខាន។

២. លើកទូរសព្ទឡើងដើម្បីដាស់

ជាមួយ iOS 10 អ្នកប្រើប្រាស់ iPhone ទាំងឡាយនឹងអាចដាស់ iPhone របស់ពួកគេបានដោយគ្រាន់តែលើកទូរសព្ទ (ចាប់កាន់ទូរសព្ទឡើង)។

៣. ប្រើប្រាស់ 3D Touch លើផ្ទាំង Lockscreen

បច្ចេកវិទ្យា 3D Touch នឹងកាន់តែមានភាពអស្ចារ្យដោយអាចប្រើប្រាស់នៅលើផ្ទាំង Lockscreen បាន។ ឧទាហរណ៍ថា 3D Touch លើសារមួយវានឹងបង្ហាញផ្ទាំងតូចមួយឡើង ដែលអាចឲ្យអ្នកឆ្លើយតបភ្លាមៗបាន។

៤. កម្មវិធី Music រចនារូបរាងថ្មី

Apple បានរចនារូបរាងថ្មីទៅលើកម្មវិធី Music លើប្រព័ន្ធប្រតិបត្តិការ iOS 10 ដោយសារតែកម្មវិធី Music លើប្រព័ន្ធប្រតិបត្តិការជំនាន់ចាស់ហាក់មានភាពរញ៉េរញ៉ៃសម្រាប់អ្នកប្រើប្រាស់មួយចំនួន។

៥. កម្មវិធី Photos កាន់តែឆ្លាតជាងមុន

កម្មវិធី Photos លើ iOS 10 កាន់តែឆ្លាតជាងមុនដោយសារវាអាចចំណាំមុខមនុស្ស, វត្ថុ, ទីកន្លែង និងអ្វីផ្សេងៗទៀត ដើម្បីងាយស្រួលស្វែងរកពេលក្រោយ។

ប្រាំចំណុចខាងលើនេះគ្រាន់តែជាការបន្ថែមថ្មីខ្លះៗ ដែល Sabay លើកយកមកបង្ហាញក្នុងចំណោមការបន្ថែមថ្មីៗជាច្រើនទៀតមានលើប្រព័ន្ធប្រតិបត្តិការ iOS 10។ ប្រព័ន្ធប្រតិបត្តិការចុងក្រោយនេះដែរនឹងមានដាក់ឲ្យប្រើប្រាស់ជាផ្លូវការនៅអំឡុង ខែកញ្ញា-ខែធ្នូ៕

ចុចអាន៖ iOS 10 អាចលុបកម្មវិធីស៊ី Space ឥតប្រយោជន៍ ដំឡើងស្រាប់ក្នុងម៉ាស៊ីន

ប្រែសម្រួល៖ ហៃ សុខហេង ប្រភព៖ PhoneArena