អែតវីន ចាប់ផ្ដើមថត MV បទចម្រៀងក្រោយជាប់ជាតារាញញឹមស្រស់នៅហុងកុង

2014-10-29 21:23:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្មចម្រៀងក្នុងស្រុកមួយចំនួនចាប់មានការចាប់អារម្មណ៍ហៅ អែតវីន ឲ្យទៅចូលរួមថតMVបទចម្រៀងជាហូរហែ បន្ទាប់ពីសមាជិកក្រុមបង្ហាញម៉ូដ Sun Supper Model រូបនេះ ជាប់ជយលាភីពានរង្វាន់តារាញញឹមស្រស់ពីកម្មវិធី"Mr Asia Contest 2014” នៅទីក្រុងហុងកុង។

អែតវីន នឹងបង្ហាញមុខជាតួសំខាន់លើកដំបូងនៅក្នុងបទ"Sexy Am Shy” របស់កញ្ញា សាសា ក្នុងផលិតកម្ម Town។ ទោះបីជាយ៉ាងណា បទចម្រៀងនេះ នៅមិនទាន់បានថតនៅឡើយទេ ជាដំបូងត្រូវរង់ចាំតារាចម្រៀងស្រីខាងលើ ហាត់រាំឲ្យបានស្ទាត់ជាមុនសិន ទើបពេលថតមិនសូវមានការខុសឆ្គង។

ម្ចាស់ជយលាភីញញឹមស្រស់រូបនេះ ហាក់មានជំនឿចិត្តចំពោះការថតMVបទចម្រៀងជាលើកដំបូង ដោយអះអាងថា គ្រាន់តែដើរតួជាបុរសសិចស៊ីមានសាច់ដុំមាំ ហើយអ្នកដឹកនាំជ្រើសរើសឲ្យសម្ដែងក្នុងបទចម្រៀងនេះ គឺដោយសារតែរូបគេមានរាងកាយមាំមួនដូច្នេះដែរ។

តារាបង្ហាញម៉ូដខាងលើ បានប្រាប់ Sabay បន្ថែមទៀតថា មានផលិតកម្មមួយចំនួនទៀត បានទាក់ទងរូបគេឲ្យសម្ដែងក្នុងបទចម្រៀងរបស់ពូកគេ មួយរយៈចុងក្រោយនេះ។ រូបគេបានយល់ព្រមចំពោះសំណើនេះរួចហើយ ក្នុងលក្ខខណ្ឌទៅរួច ដែលមិនប៉ះពាល់ដល់ការសិក្សារបស់គេ។ នៅមិនទាន់បានដឹង ភាគីផលិតកម្មទាំងនោះ តម្រូវឲ្យតារាសាច់ដុំញញឹមស្រស់រូបនេះសម្ដែងបទអ្វីនៅឡើយទេ។

អែតវីន ជាបេក្ខភាពចំណាត់ថ្នាក់លេខ១ ផ្នែកខាងតារាបង្ហាញម៉ូដបុរសនៅកម្ពុជាក្នុងកម្មវិធី"Mr Asia Contest Cambodia” ។ តារាបង្ហាញម៉ូដរូបនេះតែម្នាក់គត់ ដែលបានមានឱកាសទៅចូលរួមក្នុងការប្រកួតក្នុងកម្មវិធី"Mr Asia Contest ” បង្កើតឡើងក្នុងគោលបំណងលើកស្ទួយវិស័យសិល្បៈក្នុងតំបន់អាស៊ី និងបានបញ្ចប់ទៅកាលពីពេលថ្មីនេះ ហើយជាលទ្ធផលតំណាងកម្ពុជាជាប់ជាតារាញញឹមស្រស់ សម្រាប់ការចូលរួមជាលើកដំបូងនេះ៕

អានអត្ថបទ៖ ណូម័រ ត្រៀមធ្វើជំនួញតាមonline ដែរ!

អត្ថបទ៖ សំ ជំនាញ

រូបថត៖ សាមីខ្លួន អែតវីន