ស្ពានកញ្ចក់វែងបំផុតលើលោកឲ្យតេស្តសុទ្ធតែញញួរ និងរថយន្តបើកកិន

2016-06-27 22:36:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ពានកញ្ចក់ដ៏វែង និងខ្ពស់ជាងគេបំផុតនៅលើពិភពលោកក្នុងប្រទេសចិន បានបើកដៃឲ្យអ្នកចូលទស្សនាជាច្រើននាក់ តេស្តមើលពីភាពស្វិត រឹងមាំរបស់កញ្ចក់ មុនដាក់ដំណើរការឲ្យសាធារណជនចូលលេង។

ការតេស្តសាកល្បងគឺ ក្រុមអ្នកជំនាញបានផ្ដល់ញញួរដែកឲ្យពួកគេវាយបំបែកកញ្ចក់តាមកម្លាំងខ្លួនមានជាច្រើនញញួរ និងមានរថយន្តម៉ាក SUV មួយគ្រឿងបើកកិនពីលើថែមទៀត។ តែលទ្ធផល ពិតជាធ្វើឲ្យគ្រប់គ្នាជឿទុកចិត្ត ពីភាពស្វិតរបស់កញ្ចក់ ព្រោះកម្លាំងញញួរមិនអាចបំបែកកញ្ចក់ឲ្យឃ្លាតពីគ្នាបានឡើយ ថែមទាំងទម្ងន់រថយន្ត២តោន ដែលមានមនុស្សជិះខាងក្នុងជាច្រើននាក់ ក៏មិនអាចធ្វើឲ្យកញ្ចក់បែកបានដែរ។

ស្ពានកញ្ចក់ដែលធ្វើឲ្យគ្រប់គ្នាឃើញបុកពោះនេះ មានប្រវែង ៤៣០ម៉ែត្រ និងកម្ពស់ ៣០០ម៉ែត្រ ស្ថិតនៅទីក្រុង Zhangjiajie ខេត្តហ៊ូណាន។

កាលពីប៉ុន្មានសប្ដាហ៍មុន គេធ្លាប់បានអញ្ជើញអ្នកកាសែត BBC ម្នាក់ឲ្យប្រើញញួរវាយកម្ទេចដែរ តែមហាជនទូទៅមិនទាន់អស់ចិត្ត ហើយលើកនេះគេបានអញ្ជើញមនុស្ស ៣០នាក់កាន់ញញួរទម្ងន់ ៥,៥គីឡូទៅតេស្ដម្ដង។ ប៉ុន្តែលទ្ធផលមិនខុសពីលើកមុនឡើយ បានត្រឹមប្រេះតែមិនបែក។

ស្ពាននេះអាចទទួលអ្នកចូលទស្សនាយ៉ាងតិច ៨០០នាក់ដើរជាន់ ក្នុងពេលតែមួយ។ ក្រោយតេស្ដរួចរាល់ គេគ្រោងនឹងបើកបម្រើសាធារណជននៅពេលឆាប់ៗខាងនេះហើយ៕