សង្គ្រាមលោកលើកទី៣ នឹងអាចកើតមានឡើងដោយសារជម្លោះដែនទឹក?

2014-09-19 14:30:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិភពលោកកំពុងជួបប្រទះបញ្ហាជាច្រើន ដែលក្នុងនោះក៏មានបញ្ហាដែនអធិបតេយ្យភាពដ៏ក្ដៅគគុកផងដែរ។ ជម្លោះដែនទឹកក្នុងសមុទ្រចិនខាងត្បូងនៅតែបន្តយ៉ាងរ៉ាំរ៉ៃ ខណៈបញ្ហាដ៏ទៃទៀតបានកើតឡើងបន្តបន្ទាប់ ដូចជា វិបត្តិរុស្ស៊ី - អ៊ុយក្រែន បញ្ហាក្រុមឥស្លាមជ្រុលនិយម ISIS និងបញ្ហាស្កុតឡែនចង់ផ្ដាច់ខ្លួនចេញពីចក្រភពអង់គ្លេសជាដើម។ ដោយសារតែបែបនេះហើយទើបសាស្ត្រាចារ្យមួយរូបនាសាកលវិទ្យាល័យយោធារបស់ប្រទេសចិន People's Liberation Army National Defense University បានចេញមុខមកអះអាងថា សង្គ្រាមលោកលើកទីបី អាចនឹងកើតឡើងនាថ្ងៃខាងមុខ។

ចុចអាន៖ ស្កុតឡែនបោះឆ្នោតផ្ដាច់ខ្លួនពីអង់គ្លេស បានឬអត់ស្អែកនេះ?

ទាហានចិនកំពុងហ្វឹកហាត់

នៅក្នុងការចុះផ្សាយរបស់កាសែត Global Times សាស្ត្រាចារ្យដែលមានឈ្មោះថា Han Xudong នោះ បានឲ្យដឹងថាប្រទេសជាតិជាច្រើនកំពុងជាប់ពាក់ព័ន្ធនឹងទម្រង់ថ្មីនៃសង្គ្រាមលោក។ លោកបាននិយាយថា៖ "ចំនួនអ្នកចូលរួមពាក់ព័ន្ធនឹងជម្លោះដែនទឹក បានកើនឡើងច្រើនមិនធ្លាប់មានពីមុន។ វាជាជម្លោះដែលរីករាលដាលយ៉ាងក្ដៅគគុក។ សង្រ្គាមលោកលើកទី៣ ទំនងជាអាចកើតមានឡើង ហើយវាជាសង្គ្រាមដែលធ្វើឡើងដើម្បីវាយដណ្ដើមសិទ្ធិកាន់កាប់ដែនទឹក"។

ចុចអាន៖ រឿងសំខាន់៩យ៉ាង ពិភពលោកកំពុងផ្ដោតអារម្មណ៍ខ្លាំង

ប្រទេសចិន កំពុងជាប់ពាក់ព័ន្ធនឹងបញ្ហាជម្លោះដែនទឹកក្នុងសមុទ្រចិនភាគខាងត្បូង ជាមួយនឹងប្រទេសវៀតណាម ហ្វីលីពីន ប្រ៊ុយណេ តៃវ៉ាន់ និងម៉ាឡេស៊ី។ មិនត្រឹមតែប៉ុណ្ណោះទេ ប្រទេសនេះ ក៏មានជម្លោះជាមួយជប៉ុនផងដែរ។ ចិនបានអះអាងថាកោះ Diaoyu ស្ថិតក្នុងដែនអធិបតេយ្យរបស់ខ្លួន ខណៈជប៉ុនដែលបានហៅកោះនោះថា Senkaku ក៏អះអាងថាស្ថិតក្នុងដែនទឹករបស់ខ្លួនដែរ។

ដោយសារតែគូប្រជែងក្នុងជម្លោះដែនសមុទ្រមានកាន់តែខ្លាំង និងតឹងតែង កងយោធាចិនបានអភិវឌ្ឍន៍ខ្លួនយ៉ាងខ្លាំង ដើម្បីធ្វើយ៉ាងណាអាចការពារសិទ្ធិកាន់កាប់។ លោកសាស្ត្រាចារ្យដដែលបានបន្ថែមថាកម្លាំងយោធាដ៏ខ្លាំងរបស់ចិន នឹងត្រូវពង្រឹងបន្ថែម ដោយសារតែកងកម្លាំងយោធាខ្លាំងៗដូចជាអាមេរិក កំពុងបង្កើនការចាប់អារម្មណ៍លើតំបន់អាស៊ីប៉ាស៊ីហ្វិក។

កោះ Thitu ផ្នែកមួយនៃប្រជុំកោះ Spratly ដែលចិន និងហ្វីលីពីន កំពុងដណ្ដើមគ្នា

នេះមិនមែនជាលើកទីមួយទេដែលប្រព័ន្ធផ្សព្វផ្សាយរដ្ឋរបស់ចិន បាននិយាយអំពីបញ្ហាសង្គ្រាមដែលទាក់ទងនឹងចិន។ កាលពីឆ្នាំមុន កាសែតគាំទ្ររដ្ឋាភិបាល Weweipo បានចេញផ្សាយអត្ថបទមួយដែលពិពណ៌នាថា ចិននឹងត្រូវប្រឈមមុខនឹងសង្រ្គាមចំនួន៦ ក្នុងរយៈពេល៥០ឆ្នាំបន្ទាប់។

កាសែតនោះបានប៉ាន់ស្មានថា សង្រ្គាមដណ្ដើមកោះក្នុងដែនសមុទ្រចិនខាងត្បូង នឹងអាចបន្តពីឆ្នាំ២០២៥ ដល់ឆ្នាំ២០៣០ ដោយសារតែចិនមានបំណងចង់គ្រប់គ្រងកោះមួយចំនួនទៀត ដូចជាប្រជុំកោះ Spratly (ប្រទេសមួយចំនួនទៀតក៏ចាត់ទុកថាជាកោះរបស់ខ្លួន) និងតំបន់ថ្មប៉ប្រះទឹក Scarborough (ប្រទេសហ្វីលីពីនក៏ចាត់ទុកថាជារបស់ខ្លួន)។ កាសែតដដែលក៏បានរំពឹងដែរថាជម្លោះដណ្ដើមកោះ Diaoyu / Senkaku នឹងក្លាយជាសង្គ្រាមនៅឆ្នាំ ២០៤០។

ចុចអាន៖ ព្រះមហាក្សត្រអាស៊ាន ២អង្គ ជាកំពូលស្ដេចមានជាងគេលើលោក

ប្រែសម្រួល៖ ទ្រី រ៉ាវី

ប្រភព៖ Business Insider