និស្សិតឆ្នើមសរសេរកម្មវិធីទូរសព្ទ ប្រាថ្នាចង់ធ្វើការនៅបរទេស

2016-07-19 14:30:53
ចំនួនមតិ 0 | ចំនួនចែករំលែក 0

ចន្លោះមិនឃើញ

លី សុខណា ជានិស្សិតផ្នែកវិទ្យាសាស្ត្រកុំព្យូទ័រ ដែលទទួលបានជោគជ័យក្នុងការប្រកួតប្រជែងសរសេរកម្មវិធីដាក់លើទូរសព្ទ។ យុវជនរូបនេះមានមោទនភាពសម្រាប់ការសម្រេចបានសមិទ្ធផលក្នុងការសិក្សា។ សុខណា បានកំណត់គោលដៅក្នុងការអភិវឌ្ឍខ្លួនក្លាយជាអ្នកអភិវឌ្ឍកម្មវិធីមួយរូប ជាពិសេសមហិច្ឆតាដែលយុវជនរូបនេះចង់មានឱកាសអាចទៅដកស្រង់បទពិសោធន៍ការងារនៅក្រៅប្រទេស។

យុវជន លី សុខណា ជាកូនប្រុសពៅក្នុងគ្រួសារដែលមានបងប្អូន ៧ នាក់។ សុខណា បានបញ្ចប់ការសិក្សាថ្នាក់មធ្យមសិក្សាទុតិយភូមិក្នុងឆ្នាំសិក្សា ២០១២-២០១៣ នៅវិទ្យាល័យសម្ដេចឪ ក្នុងក្រុងសិរីសោភ័ណ ខេត្តបន្ទាយមានជ័យ និងបានមកបន្តការសិក្សាថ្នាក់បរិញ្ញាប័ត្រជំនាញវិទ្យាសាស្ត្រកុំព្យូទ័រនៅសាកលវិទ្យាល័យ ភូមិន្ទភ្នំពេញ។

ក្នុងឆ្នាំ ២០១៤ យុវជន សុខណា បានចូលរួមការប្រកួតប្រជែងកម្មវិធី App Contest សម្រាប់ដាក់នៅលើ iOS និង Android ដោយទទួលបានជយលាភីលេខ ១ តាមរយៈការសរសេរ Concept កម្មវិធីមួយមានឈ្មោះថា "CamAds” ដែលអាចទិញទំនិញតាមអនឡាញ។

ដោយការស្រលាញ់ចូលចិត្ត ការប្រឹងប្រែងរួម ទាំងភាពប៉ិនប្រសប់លើជំនាញសរសេរកម្មវិធី សុខណា ក៏ទទួលបានជយលាភីលេខមួយម្ដងទៀតក្នុងឆ្នាំ ២០១៥ ការប្រកួតប្រជែងកម្មវិធី Hackaton ដោយបានបង្កើតកម្មវិធីឈ្មោះ “Smart Remote”។

ការទទួលបានជោគជ័យទាំងបទពិសោធន៍នៅក្មេងខ្ចី យុវជនរូបនេះប្រាប់ថា ចង់តថ្នាក់អនុបណ្ឌិតនៅក្រៅប្រទេសលើការសិក្សាជំនាញសរសេរកម្មវិធីដើម្បីអាចពង្រឹងសមត្ថភាពឲ្យកាន់តែខ្លាំងក្លាបន្ថែមទៀត។ នៅថ្ងៃអនាគតក៏មានមហិច្ឆតា ចង់ស្វែងរកបទពិសោធន៍ការងារនៅក្រុមហ៊ុនបច្ចេកវិទ្យាធំៗលើពិភពលោក ដែលជាបំណងប្រាថ្នាដែលគេចង់សម្រេចឲ្យបាន។

ក្នុងនាមជាយុវជនរៀមច្បង យុវជន សុខណា ចង់ឱ្យនិស្សិតជំនាន់ក្រោយដែលមានបំណងចង់ក្លាយជាអ្នកសរសេរកម្មវិធីលើទូរសព្ទ ត្រូវសម្រួចជំនាញខ្លួនឱ្យបានច្បាស់លាស់ ដោយដាក់ជាសំណួរសួរខ្លួនឯងដែលចង់ក្លាយជាអ្នកអភិវឌ្ឍកម្មវិធីមួយរូប។ ស្រលាញ់អ្វី ត្រូវព្យាយាមធ្វើឱ្យអស់ពីសមត្ថភាព។ បើសិនមានកម្មវិធីបច្ចេកវិទ្យា គួរចូលរួមដើម្បីបានសិក្សាបទពិសោធន៍ពីអ្នកដទៃដើម្បីអាចប្រើជាប្រយោជន៍អភិវឌ្ឍខ្លួនឯង។

ចុចអាន៖ និស្សិតឆ្នើម IT រៀនពីរមហាវិទ្យាល័យ ខ្លាំងរហូតក្លាយជាគ្រូ Java

អត្ថបទ៖ រក្សា