និស្សិតឆ្នើម IT រៀនពីរមហាវិទ្យាល័យ ខ្លាំងរហូតក្លាយជាគ្រូ Java

2016-07-04 18:41:10
ចំនួនមតិ 0 | ចំនួនចែករំលែក 0

ចន្លោះមិនឃើញ

លន់ សុវត្ថាណា ជានិស្សិតជំនាញ IT មួយរូបដែលទទួលបានជោគជ័យលើការសិក្សា ដោយទទួលបានឱកាសបន្តការសិក្សាជំនាញព័ត៌មានវិទ្យា ពីរមហាវិទ្យាល័យ។ អ្វីដែលធ្វើឲ្យយុវជនរូបនេះកាន់តែមានមោទនភាព គឺរូបគេបានក្លាយជាគ្រូបណ្ដុះបណ្ដាលភាសា Java នៅមជ្ឈមណ្ឌលបណ្តុះបណ្តាលជំនាញ IT លេចធ្លោមួយក្នុងស្រុក។

យុវជន សុវត្ថាណា មានស្រុកកំណើតនៅកៀនស្វាយ ខេត្តកណ្ដាល ដែលមានឪពុកម្ដាយជាកសិករ។ យុវជនរូបនេះ ធ្លាប់ទទួលបាននិទេ្ទសល្អ (B) ប្រចាំវិទ្យាល័យព្រែកឯង ក្នុងសម័យប្រឡងសញ្ញាប័ត្រមធ្យមសិក្សាទុតិយភូមិ ក្នុងឆ្នាំ ២០១២ និងទទួលបានអាហារូបករណ៍ជំនាញព័ត៌មានវិទ្យាពីសាកលវិទ្យាល័យន័រតុន។

រហូតដល់ឆ្នាំ ២០១៥ យុវជនសម្បុរសរាងស្ដើងរូបនេះ ក៏ទទួលបានអាហារូបករណ៍សិក្សាជំនាញព័ត៌មានវិទ្យាមួយទៀត នៅមជ្ឈមណ្ឌល Korea Software HRD និងធ្លាប់បានបង្កើតកម្មវិធីប្រព័ន្ធគ្រប់គ្រងពិន្ទុ និងព័ត៌មានរបស់និស្សិត។

ដោយសារតែសមត្ថភាព ការប្រឹងប្រែង និងភាពប៉ិនប្រសប់ផ្នែក Java សុវត្ថាណា បានក្លាយជាគ្រូបណ្ដុះបណ្ដាលដល់និស្សិតជំនាន់ក្រោយបន្តទៀតនៅមជ្ឈមណ្ឌល Korea Software HRD ដើម្បីជួយពង្រឹងសមត្ថភាពលើមុខជំនាញបច្ចេកវិទ្យាព័ត៌មានវិទ្យា ឲ្យកាន់តែខ្លាំងក្លាបន្ថែមទៀត។

សុវត្ថាណា មានមហិច្ឆតាចង់អភិវឌ្ឍវិស័យអប់រំនៅកម្ពុជា ប្ដូរទៅជាការសិក្សាតាមបែបអេឡិចត្រូនិក ឬ E-Learning ដូចទៅនឹងប្រទេសជឿនលឿនដទៃទៀត តាមរយៈការជួយបណ្ដុះបណ្ដាលធនធានមនុស្សផ្នែកបច្ចេកវិទ្យាឲ្យបានច្រើន៕