ចិនក្ដៅក្រហាយព្រោះលី តឺហួរបានត្រឹមតួកំប៉ិកកំប៉ុកក្នុងរឿង "The Great Wall”

2016-08-02 18:14:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ទស្សនិកជនចិនមានអារម្មណ៍ថាខ្លួនត្រូវគេឆបោកក្រោយពេលតួអង្គរបស់តារាសម្ដែង Andy Lau ក្នុងរឿង "The Great Wall" ត្រូវបានទម្លាយជាផ្លូវការមុននេះ។

មុននេះបន្តិច បណ្ដាញព័ត៌មាន Tan Yan បានឲ្យដឹងថាអ្នកគាំទ្រវិស័យភាពយន្តចិនកំពុងផ្ទុះកំហឹងជាខ្លាំងមុនថ្ងៃភាពយន្ត "The Great Wall” ចាក់បញ្ចាំង។ កាលពីចុងសប្ដាហ៍មុននេះ តួអង្គរបស់រឿង "The Great Wall” ត្រូវបានបង្ហាញនៅលើគេហទំព័រផ្លូវការរបស់រឿងនេះ។ ទស្សនិកជនមានអារម្មណ៍ថាខ្លួនត្រូវក្រុមការងារឆបោកនៅពេលឃើញតួរបស់ តារាសម្ដែង លី តឺហួរ។

ក្នុងសន្និសីទកាលពីខែមិថុនា Zhang Zimou អ្នកដឹកនាំរឿងនេះបានឲ្យដឹងថា តារាហូលីវូដ Matt Damon គឺជាមេទ័ពរបស់អឺរ៉ុបរីឯតួរឿង "ស្ដេចល្បែង" គឺជាមេទ័ពរបស់ចិន ពោលគឺ លី តឺហួរគឺជាតួឯកទី២ក្រោយតែ Matt Damon។ យ៉ាងណាក៏ដោយ នៅពេលប្រកាសជាផ្លូវការមុននេះ តារាវ័យ៥៤ឆ្នាំបែរជាឈរឈ្មោះនៅលំដាប់ទី៥ ក្រោយ Matt Damon, Pedro Pascal, Jing Tian និង Willem Dafoe ទៅវិញ។

អ្នកប្រើអ៊ីនធឺណិតចិនកំពុងកោះហៅគ្នាបោះបង់ចោលរឿងនេះដោយមូលហេតុ២នោះគឺ ក្រុមការងារចង់ឲ្យ Matt Damon ក្លាយជាអ្នកសង្គ្រោះមហាកំពែងចិនដែលជារឿងមិនអាចទទួលយកបាន។រីឯមូលហេតុមួយទៀតនោះគឺ Andy Lau ត្រូវបានគេគាបសង្កត់កំឡុងពេលថតរឿង។

“នៅក្នុងសន្និសីទមុននោះ ពួកគេសុទ្ធតែបាននិយាយថា Andy Lau គឺជាតួឯកទី២តែឥលូវអ្វីៗបានផ្លាស់ប្ដូរអស់ហើយ។ លី តឺហួរក្លាយជាតួបន្ទាប់បន្សំវិញ។ ព័ត៌មានមិនច្បាស់លាស់របស់ក្រុមការងារបង្ហាញឲ្យឃើញពីខ្វះការគោរពដល់ទស្សនិកជន" មតិរបស់ទស្សនិកជនចិនមួយរូប៕