តាំង ម៉េង៖ "ខ្ញុំនឹងដាក់ពាក្យម្តងហើយម្តងទៀត ឲ្យជាប់ការងារនៅ Facebook ឬ Google ”

2016-08-04 14:00:35
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតនិស្សិតផ្នែក IT នៅវិទ្យាស្ថានបច្ចេកវិទ្យាកម្ពុជា (ITC) ប្រាថ្នាចង់ទៅធ្វើការនៅក្រុមហ៊ុនបច្ចេកវិទ្យាយក្ស Facebook ឬ Google ខណៈបច្ចុប្បន្នកំពុងសន្សំបទពិសោធន៍ការងារផ្នែក Android Developer នៅប្រទេសសិង្ហបុរី។

ក្រោយរៀនផ្នែកព័ត៌មានវិទ្យានៅវិទ្យាស្ថាន ITC បានមួយឆ្នាំ ម៉េងបានទទួលអាហារូបករណ៍សិក្សាថ្នាក់បរិញ្ញាបត្រផ្នែកវិស្វករកុំព្យូទ័រនៅសាកលវិទ្យាល័យបច្ចេកវិទ្យា Nanyang សិង្ហបុរីក្នុងឆ្នាំ ២០១០។ ពេលចប់ថ្នាក់បរិញ្ញាបត្រ វិស្វករកុំព្យូទ័រ នៅឆ្នាំ ២០១៤ គេក៏បានចូលបម្រើការងារក្នុងក្រុមហ៊ុនបច្ចេកវិទ្យាល្បីមួយនៅសិង្ហបុរីរហូតដល់បច្ចុប្បន្ន។

ដោយមើលឃើញពីសក្ដានុពលនិងឱកាសក្នុងការអភិវឌ្ឍខ្លួនលើវិស័យ ICT ក្នុងក្រុមហ៊ុន Facebook និង Google យុវជនរូបនេះបានខិតខំសន្សំបទពិសោធន៍ផ្នែកបង្កើតកម្មវិធីពីប្រទេសសិង្ហបុរី ដើម្បីមានសមត្ថភាពគ្រប់គ្រាន់អាចដាក់ពាក្យធ្វើការនៅក្រុមហ៊ុនទាំងនោះបាន។

តាមពិតទៅ តាំង ម៉េង សារភាពថា កន្លងមករូបគេបានធ្លាប់បានដាក់ពាក្យធ្វើការនៅក្រុមហ៊ុនបច្ចេកវិទ្យាទាំងពីរនេះរួចមកហើយ តែមិនបានផ្លែផ្កាអ្វីទាល់តែសោះ។ នេះដោយសាររូបគេនៅមិនមានសមត្ថភាពគ្រប់គ្រាន់ សមស្របតាមតម្រូវការរបស់ Facebook និង Google។

យ៉ាងណា អ្នកបង្កើតកម្មវិធីវ័យក្មេងរូបនេះថានឹងប្រឹងប្រែងរៀនសូត្រនិងអភិវឌ្ឍសមត្ថភាពឲ្យកាន់តែខ្លាំងក្លា ដើម្បីអាចធ្វើការនៅក្រុមហ៊ុនណាមួយខាងលើឲ្យបាន ពេលអនាគត។ តាំង ម៉េង ថា រូបគេត្រូវសិក្សាឲ្យបានស៊ីជម្រៅលើប្រព័ន្ធប្រតិបត្តិការ Android ហើយមួយទៀតត្រូវហ្វឹកហាត់សម្រាប់ពេលសម្ភាសន៍។

“ខ្ញុំធ្លាប់បានដាក់ពាក្យធ្វើការនៅក្រុមហ៊ុននេះរួចមកហើយ តែមិនដែលទទួលការឆ្លើយតបអ្វីនោះទេ។ នេះមានន័យថា មិនទាន់មានសមត្ថភាពគ្រប់គ្រាន់។ ប៉ុន្តែខ្ញុំនឹងប្រឹងប្រែងសន្សំបទពិសោធន៍ឲ្យបានយ៉ាងហោច ៣ ឆ្នាំ ហើយដាក់ពាក្យម្តងទៀត។ បើធ្លាក់ ខ្ញុំដាក់ពាក្យទៀត...ដាក់ម្តងហើយម្តងទៀត"។ ដរាបណាខ្ញុំតស៊ូ និងតែងតែអភិវឌ្ឍខ្លួនឯង ឱកាសនឹងមានសម្រាប់ខ្ញុំ"។

តាំង ម៉េង ធ្លាប់បានបង្កើតកម្មវិធី Android ផ្ទាល់ខ្លួននិងសម្រាប់អតិថិជនជាច្រើន រហូតអាចនិយាយថា មានបទពិសោធន៍ច្រើនគួរសមខាងការបង្កើតកម្មវិធីលើ Android។ យ៉ាងណាសមត្ថភាពនៅមិនទាន់ខ្លាំងល្មមអាចធ្វើការនៅ Facebook ឬ Google បាននោះទេ តែ តាំង ម៉េង នៅមិនអស់សង្ឃឹម ហើយបានប្ដេជ្ញាប្រឹងប្រែងបង្កើនសមត្ថភាពខ្លួនឲ្យបានសម្រេចក្តីសុបិននេះ៕

អាន៖ អតីតនិស្សិត IT ក្លាយជាអ្នកជំនួញជោគជ័យទាំងវ័យក្មេង

អត្ថបទ៖ ប៉ែត ផាន់និត

រូបថត៖ ផ្តល់ឲ្យ