ពីអ្នកលក់ស៊ុត ក្លាយអ្នកជូតស្បែកជើងល្បី លុយហូរចូលម៉ឺនដុល្លារ

2014-10-31 23:34:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពីអ្នកលក់ស៊ុតមាន់តោកយ៉ាក តែពេលនេះបុរសវ័យ៤០ឆ្នាំ Lere Mgayiya បានក្លាយជាម្ចាស់ក្រុមហ៊ុនខាត់ស្បែកជើង Lere's Shoe Shine ល្បីឈ្មោះមួយនៅអាហ្វ្រិកខាងត្បូង។

“យើងជាក្រុមហ៊ុនខាត់ស្បែកជើងដ៏ធំនៅអាហ្វ្រិក។ ក្នុងទីក្រុង Johannesburg ពួកយើងខាត់ស្បែកជើង៣៥០គូក្នុងមួយថ្ងៃ ហើយប្រហែល១២០គូ ក្នុងទីក្រុង Cape Town និង ១២០ទៀតក្នុងទីក្រុង Durban"។

ប្រវត្តិការងារ មុនក្លាយជាក្រុមហ៊ុនជូតស្បែកជើងយក្សនៅអាហ្វ្រិក លោក Mgayiya បានចាប់ផ្ដើមការងារ ជាអ្នកចែកចាយនាមប័ណ្ណ ឱ្យបណ្ដាក្រុមហ៊ុនជើងហោះ South African Airways។ រយៈពេល៥ឆ្នាំក្រោយ លោកត្រូវគេតែងតាំងជាអ្នកគ្រប់គ្រង។

ធ្វើការបានបន្តិច Mgayiya បានសុំឈប់ ហើយចូលរួមធ្វើជំនួញ ដឹកជញ្ជូនបសុសត្វជាលក្ខណៈគ្រួសារ។ លោកនិយាយពីការងារថា៖" ខ្ញុំចូលចិត្តចេញទៅជួបចរចាជាមួយកសិករ។ ខ្ញុំចូលចិត្តរៀបចំគម្រោងផ្ទាល់ខ្លួនរបស់ខ្ញុំ និងអ្វីដែលខ្ញុំទទួលបាន"។

ជំនួញជាលក្ខណៈគ្រួសារ មិនងាយស្រួលទេ និងត្រូវបរាជ័យ។ លោកបានខ្ចីលុយឪពុកមា ដើម្បីរកស៊ីបន្ត តែត្រូវរលាយ ហើយការងារជំនួញនេះ ក៏ធ្លាក់លើឪពុកមាដែលជាម្ចាស់កម្ចី។ មួយឆ្នាំក្រោយមក លោកក៏បានក្លាយជាមនុស្ស អត់ការងារធ្វើ។

ទោះបីឪពុកមាយកជំនួញ តែលោក Mgayiya នៅតែរក្សាទំនាក់ទំនង ជាមួយអតិថិជន (កសិករ) ហើយបានចាប់ផ្ដើមគម្រោងជាថ្មី (លក់ស៊ុតមាន់ឱ្យសភាអាហ្វ្រិក)។ ស៊ុតមួយប្រអប់ លោកលក់បានតែ៦ដុល្លារប៉ុណ្ណោះ។ ប្រាក់នេះមិនអាចឱ្យលោក រកស៊ីជំនួញលក់ស៊ុតបានទេ ព្រោះត្រូវការលុយច្រើន ដើម្បីចាក់សាំងឡាន និងការចំណាយផ្សេងៗទៀត។

ពេកនោះលោក បានចូលរួមកម្មវិធី Sandlam Money Game សម្រាប់សហគ្រិន និងឈ្នះប្រាក់បាន ៣១០០ដុល្លារអាមេរិក ក្នុងរយៈពេលពីរថ្ងៃ។

លោកយកលុយនេះ ទៅវិនិយោគក្នុងក្រុមហ៊ុនដាំកូនឈើមួយ តែ៦ខែក្រោយមកអ្វីៗ ប្រែក្លាយជាល្វីងជូរចត់ ហើយលោកធ្លាក់ខ្លួនក្រជាថ្មី។

ដោយត្រូវការប្រាក់ចំណូលទៀងទាត់ បុរសរូបនេះក៏ចាប់ផ្ដើមការងារជូតស្បែងជើង៖ " ខ្ញុំបានសម្រេចចិត្តបើកជំនួញជូតស្បែកជើង នៅព្រលានយន្តហោះ Cape Town "។

ការងារជូតស្បែកជើងអំឡុងឆ្នាំ២០០២-២០០៣

មុនផ្ដើមការងារជូតស្បែកជើង Mgayiya បានបញ្ចាំទូទឹកកក ដើម្បីយកលុយទិញឧបករណ៍ជំនួញ ប៉ុន្តែថ្ងៃដំបូងលោក និងបុគ្គលិករបស់លោកម្នាក់ ទទួលបរាជ័យ។

អ្នកទាំងពីរធ្វើការម៉ោង៥ព្រឹកដល់ម៉ោង៩យប់ លើកលែងថ្ងៃអាទិត្យ។ ក្រោយមកការងារមួយនេះ មានគេស្គាល់បណ្ដើរៗ។ ៥ខែក្រោយបុគ្គលិកការងារ មានចំនួន៥នាក់ ហើយជំនួញចេះតែរីកឡើង រហូតក្លាយជាក្រុមហ៊ុនជូតស្បែកជើងយក្ស និងមានបុគ្គលិកច្រើននៅអាហ្វ្រិក។

ក្រុមហ៊ុនខាងលើមានបុគ្គលិក៤៥នាក់ នៅតាមប្រលានយន្តហោះសំខាន់ៗបី ហើយលោកថៅកែ Mgayiya កំពុងសំឡឹងមើលដៃគូ នៅអាមេរិក អង់គ្លេស និងនៅអាហ្វ្រិកបន្ថែមទៀត។ ក្រុមហ៊ុននេះ ទទួលបានប្រាក់ចំណូលជាង២២ម៉ឺនដុល្លារក្នុងមួយឆ្នាំុ៕

ចុចអានអត្ថបទ អ្នកសុំទានកំពូលស្អាតបំផុតលើលោក មិនឃើញមិនជឿ!

អានអត្ថបទជីវិតជោគជ័យផ្សេងទៀត

ប្រែសម្រួល៖ អ៊ុំ សុភក្តិ

ប្រភព៖ CNN