ដឹងតម្លៃម៉ូតូ Café ពេញនិយមមួយទឹក សល់ប៉ុន្មានអត់?

2016-08-17 17:02:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ម៉ូតូប្រភេទ Cafe ជាម៉ូតូដែលពេញនិយមនៅប្រទេសប៉ែកអ៊ឺរ៉ុប។ យុវវ័យ ឬ មនុស្សវ័យកណ្ដាលក្នុងស្រុកមួយចំនួន បច្ចុប្បន្នក៏ពេញម៉ូតូប្រភេទនេះ។ ដោយឡែកតម្លៃមួយទឹករបស់វាក៏ថ្លៃគួរសមដែរខ្ទង់ ១ ៧០០ ទៅ ២ ៣០០ ដុល្លារអាស្រ័យលើគុណភាពម៉ូតូ។

លោក ស្រ៊ុីន សុខធឿន ដែលជាអ្នកចាត់ការទូទៅក្នុងហាងលក់ម៉ូតូ Café ម្ដុំផ្សារថ្មីបានប្រាប់ឱ្យដឹងថា តម្លៃម៉ូតូប្រភេទនេះមួយទឹកខ្ទង់ ១៧០០ ទៅ ២ ៣០០ ដុល្លារ អាស្រ័យលើគុណភាពម៉ូតូ ហើយបើអ្្នកនិយមលេងម៉ូតូ យកទៅកែថែមដាក់លេងស៊ីមាំង លេងដៃចង្កូត លេងកង់ លេងស្ដុប ភ្លើងស៊ីញូឬជួសជុលថែមទៀត អាចចំណាយលើសតម្លៃនេះបន្តិច ពោលគឺខ្ទង់ ៣០០ ទៅ ៥០០ ដុល្លារ។

ចំណែកលោក ណារិទ្ធ ដែលកំពុងប្រើប្រាស់ម៉ូតូ Café ម៉ូឌែល Café racer បានប្រាប់ថា លោកទិញម៉ូតូនេះមួយទឹកត ពីគេក្នុងតម្លៃ ១ ៨០០ ដុល្លារ និងបានយកទៅកែកុន ជួសជុលថែមបន្តិចបន្ដួចអស់ប្រហែលជា ២០០ ដុល្លារ។

លោក សុខធឿនបានបន្ថែមថា ភាគច្រើនម៉ូតូប្រភេទនេះមួយទឹក ព្រោះមិនទាន់មានដៃគូពង្រីកទីផ្សារចែកចាយមកដល់អ្នកប្រើប្រាស់ក្នុងស្រុក។ ប៉ុន្តែបច្ចុប្បន្នក្រុមហ៊ុន Stallions បាននាំចូលម៉ូតូថ្មីប្រភេទនេះផ្ទាល់ពីប្រទេសថៃតែម្ដង ដើម្បីផ្គត់ផ្គង់តម្រូវការប្រើប្រាស់សម្រាប់អ្នកនិយមម៉ូតូប្រភេទ Sport នេះ៕