ប្រកាសពីអង្គភាពគ្រប់គ្រងសិទ្ធិរួម ដើម្បីគាំទ្រស្នាដៃអ្នកនិពន្ធ ម្ចាស់កម្មសិទ្ធិ និងសិទ្ធិប្រហាក់ប្រហែល
- 2016-08-17 23:26:44
- ចំនួនមតិ 0 | ចំនួនចែករំលែក 0
ប្រកាសពីអង្គភាពគ្រប់គ្រងសិទ្ធិរួម ដើម្បីគាំទ្រស្នាដៃអ្នកនិពន្ធ ម្ចាស់កម្មសិទ្ធិ និងសិទ្ធិប្រហាក់ប្រហែល
ចន្លោះមិនឃើញ
អង្គភាពគ្រប់គ្រងសិទ្ធិរួម បានចាប់ផ្ដើមបង្កើតឡើងតាំងពីឆ្នាំ ២០០៨ ប៉ុន្តែតែខែកក្កដាមុននេះប៉ុណ្ណោះ ក្រសួងបានចេញប្រកាស អោយបង្កើតរចនាសម្ព័ន្ធផ្លូវការ ហើយត្រូវបានលើកយកមកពិភាក្សាឈានទៅរកការបង្កើតជារូបរាងអង្គភាពដែលគាំពារលើម្ចាស់សិទ្ធិ ឬម្ចាស់ស្នាដៃខាងលើ។
ឯកឧត្តម សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ តំណាងជំទាវរដ្ឋមន្ត្រី បានមានប្រសាន៍ថា ដល់ពេលហើយ ដែលយើងត្រូវបង្កើតឲ្យមានអង្គភាពគ្រប់គ្រងសិទ្ធិរួម ដើម្បីការពារ និងរកប្រយោជន៍ពីស្នាដៃរបស់ខ្លួន ក៏ដូចជាលើកកម្ពស់ស្នាដៃបង្កើតថ្មីៗក្នុងវិស័យសិល្បៈរបស់កម្ពុជា។ ដូច្នេះហើយ ឯកឧត្តម ស្នើអ្នកនិពន្ធ ឬម្ចាស់ស្នាដៃទាំងអស់ស្វែងយល់ និងចូលរួមជាមួយអង្គភាពមួយនេះ។
អង្គភាពគ្រប់គ្រងសិទ្ធិរួម ជាអង្គភាពតំណាងឲ្យអ្នកនិពន្ធ ម្ចាស់សិទ្ធិ ឬម្ចាស់សិទ្ធិប្រហាក់ប្រហែល ដែលនឹងធ្វើការលើការជួយ គាំពារស្នាដៃអ្នកនិពន្ធ ម្ចាស់កម្មសិទ្ធិ និងសិទ្ធិប្រហាក់ប្រហែល ក្នុងនោះមានការពារ រកទីផ្សារ និងរកលាភការជូនផង តាមរយៈផ្ដល់អាជ្ញាបណ្ណឲ្យប្រើប្រាស់ស្នាដៃតាមប្រភេទខុសៗគ្នា។
តាម លោក ឆាយ យោធិន អនុប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល លើកឡើងថា នៅតំបន់អាស៊ានមានតែកម្ពុជា និងភូមា ប៉ុណ្ណោះដែលមិនទាន់មានអង្គភាពគ្រប់គ្រងសិទ្ធិរួម ខណៈ ថៃ ឡាវ និងវៀតណាមជាដើម គេមានហើយ ហើយគេអាចរកលាភការពីស្នាដៃមរតកដើម ជាច្រើនលានដុល្លារក្នុង១ឆ្នាំៗ។
និយាយពី "សិទ្ធិ" នេះ តាមលោក យោធិន គឺត្រូវបានបែកចែកជាពីរទី១សិទ្ធិបេតិកភណ្ឌ និងសិទ្ធិសីលធម៌។លោកបន្តថា សិទ្ធិបេតិកភណ្ឌ ឬសិទ្ធិសេដ្ឋកិច្ច គឺរាល់អ្នកប្រើប្រាស់ស្នាដៃ យកស្នាដៃណាមួយដែលមានការទទួលស្គាល់ដោយអង្គភាពគ្រប់គ្រងសិទ្ធិរួម ត្រូវបែកចែកលាភការទៅអ្នកនិពន្ធ ម្ចាស់សិទ្ធិជាដើម តាមលក្ខខណ្ឌតម្រូវការនៃការចរចាទិញសិទ្ធិស្នាដៃនីមួយៗទៅប្រើ។
"សិទ្ធិនេះ នឹងត្រូវផ្ដល់ជូនទៅអ្នកនិពន្ធ ម្ចាស់សិទ្ធិ ឬសិទ្ធិប្រហាក់ប្រហែលដល់អាយុកាល៥០ឆ្នាំបន្ទាប់ពីអ្នកទាំងនោះ ធ្វើមរណកាល"។ ដោយឡែកសិទ្ធិសីលធម៌វិញ គឺជាសិទ្ធិដែលទាមទារការទទួលស្គាល់របស់ម្ចាស់សិទ្ធិ ឬអ្នកនិពន្ធ មានន័យថា អ្នកប្រើប្រាស់ស្នាដៃនឹងត្រូវតម្រូវឲ្យដាក់ឈ្មោះអ្នកនិពន្ធ ឬម្ចាស់សិទ្ធិជាដើម ហើយថា សិទ្ធិប្រភេទនេះ មិនមានអាយុកាលទេ។
ដូចគ្នានេះដែរ លោក ចំរើន ចំរ៉ុង ប្រធានការិយាល័យទទួលបន្ទុកអង្គភាពគ្រប់គ្រងសិទ្ធិរួម បានមានប្រសាសន៍ថា អង្គភាពមួយនេះ នឹងធ្វើការជាអ្នកការពារស្នាដៃ ជួយរកទីផ្សារអោយស្នាដៃ និងរកលាភការឲ្យម្ចាស់ស្នាដៃផង។ ប៉ុន្តែយ៉ាងណា លុះត្រាណា អ្នកនិពន្ធ ម្ចាស់សិទ្ធិ ឬសិទ្ធិប្រហាក់ប្រហែល យកស្នាដៃរបស់ខ្លួនមកចុះនៅអង្គភាពគ្រប់គ្រងសិទ្ធិរួមប៉ុណ្ណោះ។
ដូច្នេះហើយ លោកស្នើឲ្យអ្នកនិពន្ធតាំងឡាយ ជជែកគ្នា ថាតើត្រូវការការពារស្នាដៃរបស់ខ្លួនបែបនោះ ក៏ដូចជាត្រូវការអង្គភាពគ្រប់គ្រងសិទ្ធិរួមនេះឬអត់។ យ៉ាងណាលោកថា ដល់ពេលហើយ ដែលយើងត្រូវមានអង្គភាពមួយនេះ។ បែបនេះ លោកថា ប្រសិនបើអ្នកនិពន្ធមូលមតិគ្នា អាចរកក្រសួង ដើម្បីជួយសម្របសម្រួលបង្កើតអង្គភាពមួយនេះ ឲ្យចេញរូបរាងឡើង។
យ៉ាងណាក៏ដោយ នៅមានភាពស្រពិចស្រពិលខ្លះអំពីការ ប្រព័ន្ធប្រមូលលាភការជូនទៅម្ចាស់សិទ្ធិ ឬអ្នកនិពន្ធជាដើម ដែលលោកឡើងដោយអ្នកនិពន្ធ ប៉ុល ពិសី រួមជាមួយវាគ្មិនមួយចំនួនទៀត។ បញ្ហានេះ ឯកឧត្តម សោមសុគន្ធ បានមានប្រសាសន៍ថា យើងអាចធ្វើទៅបានតាមរយៈបច្ចេកវិទ្យា។ "កាលពីមុនយើងអត់ដឹងថា ធ្វើម៉េច តែឥឡូវបច្ចេកវិទ្យាធ្វើបាន ឧទាហរណ៍ថា បទរបស់លោក ស៊ិន ស៊ីសាមុត ត្រូវបានយកទៅច្រៀងម្ដងនៅកន្លែងខារ៉ាអូខេមួយ អីចឹងម្ចាស់បទនឹងទទួលបាន១សេន ជាឧទាហរណ៍...អីចឹងបច្ចេកវិទ្យាធ្វើបាន ខ្ញុំសួរគេរួចហើយ"។
មានម្ចាស់ស្នាដៃ អ្នកនិពន្ធ ប្រមាណជាង១០០នាក់បានចូលរួមសិក្ខាសាលាព្រឹកមិញ។ ចំនួននេះ គឺបាត់ស្ទើរពាក់កណ្ដាលធៀបនឹងលិខិតដែលអញ្ជើញមានដល់ជាង ២០០នាក់។ មន្ត្រីក្រសួងវប្បធម៌មួយរូប បានបង្ហើបថា នេះជាបញ្ហា។ មន្ត្រីថ្លែងថា "ពេលមានបញ្ហាឆ្លើយដាក់ក្រសួង តែពេលមិនកម្មវិធីបណ្ដុះបណ្ដាល ឬក៏សិក្ខាសាលាអីចឹងជាដើម ហៅម៉ោ អត់ដែលម៉ោទេ ពិបាកអីចឹង!"៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
