បើនិស្ស័យនាំឱ្យយើងស្គាស់គ្នា សូមនាំឱ្យយើងបាននៅជាមួយគ្នាផង

2016-08-26 20:57:52
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃទី២៥ ខែធ្នូ ឆ្នាំ២០១៥ ត្រូវជាថ្ងៃ Christmas ពេលនោះមិត្តរួមការងាររបស់ខ្ញុំ ព្រមទាំងខ្ញុំបានទៅញ៉ាំអីជុំគ្នានៅហាងសាច់អាំងមួយកន្លែង។ បន្ទាប់ពីញ៉ាំអីរួច ពួកយើងទាំងអស់គ្នាក៏រៀងស្រវឹងដែរ ហើយយើងក៏បានបន្តជួបជុំគ្នាទៀតនៅ KTV មួយកន្លែង។

ខ្ញុំចង់ប្រាប់ថានេះជាលើកទីមួយហើយដែរខ្ញុំចូល KTV។ ពេលទៅដល់ខ្ញុំដូចជាភ័យណាស់ ព្រោះពេលដែលនិយាយគ្នាខ្ញុំស្មានតែគេចូល KTV ច្រៀងធម្មតា ព្រោះខ្ញុំជាបុគ្គលិកថ្មីអត់ដែលបានដើរជាមួយមិត្តរួមការងារពីមុនមកទេ។

ពេលចូលទៅដល់ក្នុងបន្ទប់ មេការក៏បាននាំស្រីៗ ដើម្បីឱ្យយើងរើសសម្រាប់កំដរផឹកស្រា និងច្រៀងលេងកម្សាន្ត។ គេគ្រប់គ្នាបានរើសយកគូរកំដរគ្រប់គ្នាអស់ហើយ ដោយឡែកតែខ្ញុំមិនទាន់បានរើសទេ ដោយខ្ញុំរៀងភ័យៗ ព្រោះទើបចូលលើកដំបូង។

គេគ្រប់គ្នាឃើញបែបនេះក៏បានតឿនខ្ញុំឱ្យរើសមួយទៅៗ បើបានចូលទៅហើយ! ពេលនោះខ្ញុំក៏យល់ព្រម ប៉ុន្តែខ្ញុំមិនបានរើសខ្លួនឯងទេ មានមិត្តរួមការងារខ្ញុំម្នាក់បានរើសឱ្យខ្ញុំ បើតាមខ្ញុំនៅចាំ នាងមានសំលៀកបំពាក់ក្រហម។

ពេលនាងអង្គុយក្បែរខ្ញុំ ខ្ញុំកាន់តែមានអារម្មណ៍រឹតតែភ័យ ប៉ុន្តែខ្ញុំគិតតែពីផឹកស្រាតែប៉ុណ្ណោះ។ រៀងយូរបន្តិច ខ្ញុំក្រឡេកមើលជុំវិញខ្លួនឃើញមិត្តរួមការងាររបស់ខ្ញុំស្និទ្ធស្នាលជាមួយនារីទាំងនោះ ប៉ុន្តែខ្ញុំនៅតែមិនហ៊ាននិយាយជាមួយនាងគឺគិតតែពីផឹកស្រាបន្ត។

តែពេលផឹកយូរទៅខ្ញុំក៏ស្រវឹងខ្លាំង ហើយក៏ហ៊ាននិយាយជាមួយនាងដោយសួរឈ្មោះនាងជាមុន។ យូរៗទៅយើងក៏រាងស្និទ្ធស្នាលជាមួយគ្នាបន្តិច ហើយក៏បានបកស្រាយចម្រៀងជាមួយគ្នា។ វាធ្វើឱ្យខ្មុំមានអារម្មណ៍កាន់តែស្និទ្ធស្នាលជាមួយនាង។

លុះវេលាកាន់តែយប់ជ្រៅទៅ ក៏ជិតដល់ម៉ោងដែលយើងត្រូវចេញមកវិញ... ពេលចូលដំបូងខ្ញុំមានអារម្មណ៍ថាពេលវេលាដើរយឺតណាស់ ព្រោះខ្ញុំប្រញាប់ចេញមកវិញ! តែផ្ទុយទៅវិញពេលនោះ ខ្ញុំមានអារម្មណ៍ថាពេលវេលាដើរលឿនណាស់ ជិតដល់ពេលដែលខ្ញុំត្រូវបែកជាមួយនាងហើយ តែខ្ញុំក៏បានបើក Facebook របស់ខ្ញុំ ហើយឱ្យនាងស្វែងរកឈ្មោះនាងដើម្បី Add Friend មកខ្ញុំ តែខ្ញុំមិនបានមើលថា Facebook របស់នាងឈ្មោះអ្វីនោះទេ។

ដល់ពេលវេលា យើងក៏បានត្រលប់មកផ្ទះរៀងៗខ្លួន។ លុះព្រឹកឡើង ពេលខ្ញុំបើក Facebook ខ្ញុំក៏បានឃើញនាង Add Friend មកខ្ញុំ។ ពេលខ្ញុំមើលឈ្មោះ Facebook របស់នាង និងរូបថតរបស់នាង ស្រាប់តែមានអារម្មណ៍ថាដូចជាធ្លាប់ឃើញ។ ពេលនោះខ្ញុំគិតបន្តិចស្រាប់តែនឹកឃើញ អូ៎! …តាមពិតខ្ញុំបានឃើញ Facebook របស់នាងកាលពីប៉ុន្មានថ្ងៃមុនពេលដែរខ្ញុំបានបើក Facebook គឺឃើញនៅកន្លែង People You May Knowពេលនោះខ្ញុំក៏បានចូលមើល Profile របស់នាងដែរតែមិនបាន Add Friend ទៅនោះទេ។

បន្ទាប់មកខ្ញុំមិនបាន Confirm Facebook របស់នាងទេព្រោះខ្ញុំគិតថាមិនគួរទៅពាក់ព័ន្ធជាមួយនារីធ្វើការបែបនេះ។ ប៉ុន្តែប៉ុន្មានថ្ងៃក្រោយខ្ញុំស្រាប់តែនឹកនាង ខ្ញុំចេះតែគិតថា តើវាជានិស្ស័យឬ? ព្រោះមុនពេលបានជួបនាងខ្ញុំបានឃើញ Facebook របស់នាងដោយចៃដន្យ។ ពេលនោះខ្ញុំក៏បាន Add Friend ទៅនាងវិញ។ មិនយូរប៉ុន្មាន នាងក៏confirmខ្ញុំ ហើយខ្ញុំក៏បានChatទៅនាង ខ្ញុំមិននឹកស្មានថានាងនៅចាំខ្ញុំសោះ ហើយនាងបានផ្ញើរូបថតរបស់នាងពីរបី សន្លឹកមកខ្ញុំ។

(រូបតំណាង)

ចាប់ពីពេលនោះមកយើងក៏បាន Chat ជាមួយគ្នា ប៉ុន្តែមិនស្និទ្នស្នាលនឹងគ្នាទេ គឺពេលដែលខ្ញុំមានអារម្មណ៍ថានឹកគេក៏ Chat ទៅលេងគេមុន ហើយពេលខ្លះគេក៏ Chat មកមុន។

លើកក្រោយពេលក្រុមការងាររបស់ខ្ញុំមានពិធីជប់លៀង ហើយទៅ KTV នោះខ្ញុំតែងតែជ្រើសរើសយកនាងមកកំដរ។ យូរៗទៅខ្ញុំក៏មានអារម្មណ៍ថាស្រលាញ់នាង តែក៏មិនបានសារភាពប្រាប់នាងដែរព្រោះក្នុងចិត្តចេះតែគិតថា មិនស្អប់នាងធ្វើការបែបនេះទេ គ្រាន់តែខ្ញុំជាកូនអ្នកក្រហើយការងារសព្វថ្ងៃមានប្រាក់ខែតិចតួចមិនអាចចិញ្ចិមនាងបានឡើយ។ តែបើខ្ញុំមានលុយមែន ខ្ញុំនឹងឱ្យនាងឈប់ធ្វើការបែបនេះហើយនឹងដណ្តឹងនាងធ្វើជាប្រពន្ធ។ ប៉ុន្តែខុសពីអ្វីដែលខ្ញុំគិត ព្រោះខ្ញុំជាកូនអ្នកក្រដូចច្នេះហើយ ខ្ញុំគ្រាន់តែមានទំនាក់ទំនងធម្មតាជាមួយនាងប៉ុណ្ណោះ។

ហើយខ្ញុំនៅតែបន្ត Chat ទៅនាងនៅពេលដែលខ្ញុំនឹកនាង រហូតមកដល់ថ្ងៃមួយ នាងបានបង្ហោះរូបភាពមួយតាម Facebook ដោយភ្ជាប់ជាមួយពាក្យមួយឃ្លា «នឹកមនុស្សម្នាក់ តែមិនហ៊ានខលទៅគេ!»។ ពេលនោះខ្ញុំបានមើល comment ឃើញមិត្តនាងម្នាក់សួរថា «នឹកពីណាគេ?» គេបានឆ្លើយតបថា «នឹកបង...(ឈ្មោះមនុស្សប្រុសម្នាក់ដែលខ្ញុំមិនស្គាល់)» ក្នុងចិត្តខ្ញុំពេលដំបូងស្មានតែនាងនឹកខ្ញុំ ប៉ុន្តែតាមពិតគឺខុសស្រឡះ! តែមិនអីទេព្រោះខ្ញុំអត់ដឹងថាបងនោះជាអ្នកណាទេ មិនដឹងថាជាបងប្រុសឬជាអ្នកណា។

ប៉ុន្តែពេលនាងបង្ហោះរូបលើកក្រោយៗ tagged ឱ្យតែមនុស្សម្នាក់នោះ ហើយខ្ញុំមើល Comment ជាច្រើនទៅទើបដឹងថាតាមពិតម្នាក់ដែលនាងថានឹកគឺជាសង្សាររបស់នាង។ ពេលនោះខ្ញុំក៏ Chat ទៅសួរនាង តាមពិតបងធាជាសង្សាររបស់នាងមែន ប៉ុន្តែមិនថ្វីទេ ខ្ញុំគិតថាបើគេជ្រើសបានមនុស្សល្អក៏ខ្ញុំសប្បាយចិត្តដែរ។

ប៉ុន្តែខ្ញុំបានសួរនាងទៀតថា តើគេនិងខ្ញុំតើអ្នកស្គាល់អ្នកណាមុន? តាមពិតគេស្គាល់ខ្ញុំមុន ហើយម្នាក់ប្រុសនោះក៏ធ្លាប់ជាភ្ញៀវរបស់នាងដូចខ្ញុំដែរ។ ខ្ញុំក៏បានធ្វើជានិយាយលេងថា «ខំតែស្រឡាញ់! តាមពិតយើងមានសង្សារហើយ!»។ តែនាងបានឆ្លើយថា គេមិនដឹងថាខ្ញុំស្រលាញ់គេទេ បើគេដឹងគេនឹងស្រលាញ់ខ្ញុំ គឺមិនស្រលាញ់នោះទេ។ ឱព្រះអើយ! ខ្ញុំពិតជាស្តាយក្រោយខ្លាំងណាស់ក្រោយពីបានឮនាងនិយាយបែបនេះ តែណ្ហើយអ្វីៗហួសពេលហើយ។

នៅពេលដែលមិត្តភក្តិរបស់ខ្ញុំបែកពីសង្សាររបស់គេ ខ្ញុំតែងតែប្រាប់គេថា ម៉េចបានឱ្យតែបែកពីសង្សារហើយ គឺឈប់មានទំនាក់ទំនងសោះតែម្តង ធ្វើជាមិត្តភក្តិឬធ្វើជាបងប្អូនមិនបានអី? ទោះលែងជាសង្សារក៏មានអនុស្សារីយ៍នឹងគ្នាយូរហើយដែលធ្លាប់សាងជាមួយគ្នា។ មិត្តភក្តិខ្ញុំមិនបានតបតអ្វីទេ ហើយខ្ញុំក៏គិតថាខ្ញុំនិយាយត្រូវដែរ។ បន្តពីរឿងខ្ញុំនិងនាងវិញ... បន្ទាប់ពីដឹងថានាងមានសង្សារហើយ ខ្ញុំក៏បង្វែរការស្រលាញ់របស់ខ្ញុំទៅលើនាង គិតជាប្អូនស្រីវិញហើយក៏សុំនាងរាប់អានជាប្អូនស្រី។ មិនយូរប៉ុន្មាននាងនិងសង្សារនាងបានឈ្លោះគ្នាឈានដល់ការចែកផ្លូវគ្នា នាងក៏បានខលមកខ្ញុំដែលជាបងប្រុសនាង រ៉ាយរាប់ទុក្ខសោកប្រាប់ខ្ញុំ។ ពុទ្ធោអើយ! ខ្ញុំយល់ខុសហើយមិត្តភ័ក្ដិ តាមពិតឯងគិតត្រូវហើយ ដែលក្រោយពេលបែកគ្នាឯងផ្តាច់ទំនាក់ទំនងចោលតែម្ដង គឺឯងឈឺចាប់រយៈពេលខ្លឺ ក៏ប៉ុន្តែខ្ញុំវិញសំលាញ់អើយ! ពេលឃើញនាងល្អូកល្អិននិងគ្នាខ្ញុំមានអាម្មណ៍ឈឺចាប់ណាស់ ហើយពេលនេះនាងឈ្លោះគ្នាជាមួយសង្សារនាង ខ្ញុំរឹតតែមានអារម្មណ៍កាន់តែឈឺចាប់ជំនួសនាងថែមទៀត។ តើខ្ញុំត្រូវធ្វើយ៉ាងណា ទើបលុបបាត់ការឈឺចាប់នេះ?

ជាចុងក្រោយខ្ញុំសូមផ្តាំទៅដល់ប្រុសៗទាំងអស់ថា នារីដែលបំរើការនៅ KTV គេក៏មានបេះដូងដែរ បើយើងមិនស្រលាញ់គេស្មោះទេ សូមកុំបោកប្រាស់នាង ដើម្បីការសប្បាយរបស់យើងឱ្យសោះ។

ម្យ៉ាងវិញទៀតគ្មានអ្នកណាចង់ធ្វើការចឹងទេ តែដោយសារបញ្ហាជីវភាពគ្រួសារគេ គឺគេត្រូវចិញ្ចិមម្តាយគេ ចិញ្ចឹមប្អូនគេ ឱ្យប្អូនគេបានទៅរៀនសូត្រ។ ទោះបីគេមិនបានរៀនសូត្រខ្ពង់ខ្ពស់ យើងគួរតែស្ងប់ស្ងែង នឹងកោតសរសើរ។ សុំទោស! ខ្ញុំមិនមានបំណងចង់ជំរុញឱ្យមានការងារនេះកើនឡើងទេ បើអាចជៀសបានគួរតែរកការងារណាដែរល្អជាងនេះរឹតតែប្រសើរ។ ទន្ទឹមនឹងនេះសូមប្រិយមិត្តអ្នកអានស្វែងយល់នឹងយកពីចំណុចអប់រំដែលខ្ញុំចង់ចែករំលែកបានហើយ ក្រៅពីនេះគឺខ្ញុំចង់ឱ្យនារីម្នាក់នោះដឹងពីអាម្មណ៍ខ្ញុំដែលនាងមិនធ្លាប់ដឹង។

ជាចុងក្រោយ ខ្ញុំមានពាក្យខ្លះចង់ប្រាប់នាង៖ ខ្ញុំនៅតែស្រលាញ់នាង បើសិនជានាងនៅតែស្រលាញ់ខ្ញុំ ហើយបើអាចឈប់ពីការងារនោះបានជាការល្អ ខ្ញុំសន្យាថានឹងពង្រឹងសមត្ថភាព ដើម្បីមានការងារល្អនិងប្រាក់ខែខ្ពស់ដើម្បីអនាគតយើង។

ហេតុអ្វីសុខៗអូនខឹងបង?

អត្ថបទ៖ ប្រិយមិត្តSabay

រូបថត៖ បរទេស

មានរឿងរ៉ាវចង់ចែករំលែកសូមផ្ញើទៅកាន់ e-mail: kong.chanvanneng@sabay.com

ឬទូរសព្ទទៅកាន់លេខ ០១០ ៧០០ ៧២៧

ចុចអានអត្ថបទ មនុស្សដែលខ្ញុំចងចាំ ទាំងអស់ដើម្បីដឹងពីរបៀបនៃការសរសេរផ្សេងៗគ្នា