៣ចំណុចចាប់ផ្ដើមរបស់ មឿន សុខហ៊ុច នេះអាចល្បីដូច Buakaw អត់?

2016-09-01 17:18:56
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករប្រដាល់ល្បីឈ្មោះរបស់ថៃ Buakaw ជាអ្នកប្រដាល់មួយរូបដែលត្រូវបានគេស្គាល់សឹងពេញពិភពលោកក្នុងនាមជាកីឡាករប្រដាល់ថៃ ខណៈអ្នកប្រដាល់កម្ពុជា មឿន សុខហ៊ុច របស់កម្ពុជាកំពុងទទួលបានការចាប់អារម្មណ៍បណ្ដើរៗ បន្ទាប់ពីកីឡាករកម្ពុជារូបនេះ ឈ្នះខ្សែក្រវាត់ប្រាក់ពីព្រឹត្តិការណ៍ Max Muay Thai ។ ចុះប្រសិនបើ មឿន សុខហ៊ុច មាន៣ចំណុចនេះ តើគេអាចល្បីខ្លាំងដូចអ្នកប្រដាល់ថៃ Buakaw បានអត់?

ភាពល្បីរន្ទឺរបស់ Buakaw បានធ្វើឲ្យអ្នកប្រដាល់ជាច្រើនទូទាំងពិភពលោកចង់យកត្រាប់តាម និងចង់ល្បីខ្លាំងដូចកីឡាករថៃរូបនេះ។ ថ្ងៃនេះ Sabay សូមលើកយក៣ចំណុចរបស់របស់អ្នកប្រដាល់កម្ពុជា មឿន សុខហ៊ុច ដែលអាចធ្វើគេល្បីខ្លាំងដូចអ្នកប្រដាល់ថៃខាងលើ។

១- គោលដៅជីវិត៖ អ្នកប្រដាល់ មឿន សុចហ៊ុច ធ្លាប់បានឲ្យដឹងថា រូបគេចង់ល្បីខ្លាំងដូចអ្នកប្រដាល់ជើងខ្លាំងរបស់ថៃ Buakaw ។ របៀបវ៉ៃរបស់អ្នកប្រដាល់ថៃរូបនេះ ត្រូវបានអ្នកប្រដាល់កម្ពុជាកម្ពុជារូបនេះហាត់រៀនតាម ដូចជាការប្រកួតវាយសម្រុកមិនថយក្រោយជាដើម។

មួយរយៈពេលចុងក្រោយ បន្ទាប់ពីទទួលដំណឹងថា អាចទៅប្រកួតក្នុងកម្មវិធីដ៏ធំរបស់ថៃ សុខហ៊ុច បានប្រឹងប្រែងហ្វឹកហាត់យ៉ាងខ្លាំង ទើបអាចធ្វើឲ្យអ្នកស្នេហាវិស័យប្រដាល់ជាច្រើនស្គាល់ និងអាចបង្កើតប្រវត្តិសាស្ត្រដ៏ល្អមួយនេះជូនកម្ពុជា។ ទោះជាយ៉ាងណា សុខហ៊ុច បានបញ្ជាក់ថា នឹងប្រឹងប្រែងឲ្យបានខ្លាំងជាងការត្រៀមខ្លួនប្រកួត Max Muay Thai លើកមុន ដើម្បីត្រៀមខ្លួនឲ្យបានល្អចូលវាយដណ្ដើមខ្សែក្រវាត់មាស។

២-លទ្ធភាពគ្រប់គ្រាន់ក្នុងការហ្វឹកហាត់៖ កាលពីពេលថ្មីៗនេះ អ្នកប្រដាល់កម្ពុជា មឿន សុខហ៊ុច បានក្លាយជាប្អូនធម៌របស់លោកឧកញ៉ា ស្រី ចាន់ថន ហើយលោកឧកញ៉ាបានអះអាងថា នឹងជួយផ្គត់ផ្គង់ឧបត្ថម្ភថែមទៀតរាល់ពេលដែលកីឡាកររូបនេះជួបបញ្ហាតម្រូវការនានា ។ ការទទួលកីឡាករ សុខហ៊ុច ធ្វើជាប្អូនធម៏របស់ឧកញ៉ារូបនេះ អាចជាចំណែកមួយជួយឲ្យរូបគេមានលទ្ធភាពហ្វឹកហាត់គ្រប់គ្រាន់ ដើម្បីពង្រឹងខ្លួនឲ្យបានកាន់តែខ្លាំង។

៣-ឱកាសល្អដើម្បីធ្វើខ្លួនឲ្យមានភាពល្បីខ្លាំងនៅលើពិភពលោកដូច Buakaw ៖ មឿន សុខហ៊ុច កំពុងត្រៀមខ្លួន ដើម្បីចូលរួមប្រកួតដណ្ដើមខ្សែក្រវាត់មាសរបស់កម្មវិធី Max Muay Thai នាខែធ្នូ ចុងឆ្នាំនេះ។ ការចូលរួមរបស់គេអាច និយាយបានថា ជាឱកាសដ៏កម្រ សម្រាប់អ្នកប្រដាល់កម្ពុជា ហើយប្រសិនបើគេអាចធ្វើបានល្អ ដណ្ដើមបានខ្សែក្រវាត់មាសនោះទៀតនោះ ពិតណាស់ពិភពលោក នឹងទទួលស្គាល់រូបគេជាអ្នកប្រដាល់ជើងខ្លាំងមួយរូប ដែលកំពុងធ្វើដំណើរទៅរកចំណុចកំពូលដូចជាអ្នកប្រដាល់ថៃ Buakaw ។

មឿន សុខហ៊ុច ជាសិស្សគុនខ្មែររបស់ក្លឹបពុធសេរីវង្សព្រែកតាទែន ដែលបានចូលរួមប្រកួតព្រឹត្តិការណ៍ Max Muay Thai កាលពីថ្ងៃ២៨ ខែសីហា ឆ្នាំ២០១៦ ដោយប្រកួតមារ៉ាតុនឈ្នះកីឡាករទួរគីនាវគ្គជម្រុះ និងឈ្នះកីឡាករស៊ុយអែត Ammon Decker វគ្គផ្ដាច់ព្រ័ត្រដើម្បីបានខ្សែក្រវាត់ប្រាក់៕

ចុះតើប្រិយមិត្តយល់ថា ចំណុចចាប់ផ្ដើមរបស់ មឿន សុខហ៊ុច នេះអាចធ្វើឲ្យគេក្លាយជាកីឡាករល្បីខ្លាំងបានអត់?

អត្ថបទ៖ ស្រី សុវណ្ណដារ៉ា រូបថត៖ Max Muay Thai