ព័ត៌មានទើបបញ្ចេញ "សិស្សប្អូនសំណព្វចិត្ត" រកចំណូលបានខ្ពស់ហួសការរំពឹងទុក

2016-09-15 14:11:44
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមរយៈបទសម្ភាសន៍ពិសេសជាមួយអ្នកនិពន្ធផ្ទាល់រឿង "សិស្សប្អូនសំណព្វចិត្ត" រកចំណូលបានខ្ពស់ជាង ២០ម៉ឺនដុល្លារ ហួសការរំពឹង ក្រោយចាក់បញ្ចាំងប្រមាណ១ខែ។

កាលដើមឆ្នាំ២០១៦ ភាពយន្តខ្មែរ "សិស្សប្អូនសំណព្វចិត្ត" ឬ "My Junior My Crush" របស់ផលិតកម្ម Rock បានអង្រួនចិត្តយុវវ័យ ក្នុងនោះបើតាមព័ត៌មានរោងភាពយន្ត Major Cineplex by Cellcardរឿងនេះ ឈរលើកំពូលតារាងក្នុងនាមជាភាពយន្តមានអ្នកទស្សនាច្រើនជាងគេ ដោយវ៉ាដាច់ភាពយន្តបរទេសគ្រានោះ "Dead Pool" និង "ស្អឹងមិនដី" របស់ប្រទេសថៃផង។

ចំណាត់ថ្នាក់នេះ ក្រោយពេលចាក់បញ្ចាំង១សប្ដាហ៍ដំបូង។ លោក សៅ សុខនី នាយកប្រតិបត្តិរោងភាពយន្ត ប្រាប់ថា ជារឿងកម្រណាស់សម្រាប់ភាពយន្តក្នុងស្រុកដែលបានចំណាត់ថ្នាក់បែបនេះ។ ដោយសារទទួលបានការចាប់អារម្មណ៍ច្រើនដូច្នេះ "សិស្សប្អូនសំណព្វចិត្ត" រកចំណូលបានជាង ២០ម៉ឺនដុល្លារអាមេរិក នេះបើតួលេខបញ្ចេញដោយកញ្ញា ស៊ា រស្មី អ្នកនិពន្ធខ្សែភាពយន្តខាងលើ។

កញ្ញា ស៊ា រស្មី អ្នកនិពន្ធរឿង "សិស្សប្អូនសំណព្វចិត្ត"

កញ្ញា បន្តថា តួលេខចំណូលនេះ សរុបក្រោយស្នាដៃភាពយន្តទី២នេះរបស់កញ្ញា បញ្ចប់ការចាក់បញ្ចាំងនៅគ្រប់រោងភាពយន្តទំនើបៗនៅរាជធានី និងខេត្តមានសក្ដានុពលមួយចំនួន។ "និយាយតែរោងនៅភ្នំពេញយើង គឺអាចចាក់បញ្ចាំងដល់ទៅ១ខែឯណោះបង ដែលជាលើកទី១សម្រាប់ភាពយន្តក្នុងផលិតកម្មយើង ហើយយើងរកបានជាង ២០ម៉ឺនដុល្លារឯណោះ"។

ក្រោយជោគជ័យលើស្នាដៃទី២ អ្នកនិពន្ធវ័យ ២៦ឆ្នាំរូបនេះ ប្រាប់ថា នាងក៏បានត្រៀមស្នាដៃទី៣រួចហើយ ដោយទើបក្រុងពាលីចេញថតសប្ដាហ៍មុន និងចេញថតថ្ងៃនេះ គឺរឿង "ខូចចិត្តអាជីព" ដែលអ្នកនិពន្ធរូបនេះ អះអាងថា កាន់តែប្រសើរជាស្នាដៃទី២ទៅទៀត៕

ទស្សនា និងស្ដាប់លម្អិត វីដេអូសម្ភាសន៍ ស៊ា រស្មី ជាមួយ Sabay