"នារីវេទមន្ត" ត្រង់ប្លង់សិចស៊ីដែលកាត់ចោល អាចនឹងបញ្ចូលវិញ
- 2016-10-06 16:16:58
- ចំនួនមតិ 0 | ចំនួនចែករំលែក 0
"នារីវេទមន្ត" ត្រង់ប្លង់សិចស៊ីដែលកាត់ចោល អាចនឹងបញ្ចូលវិញ
ចន្លោះមិនឃើញ
ប្រធានគ្រប់គ្រងផលិតកម្ម Rock យឹម សុសត្យា មានប្រសាសន៍ក្នុងឱកាសសម្ពោធរឿង "នារីវេទមន្ត" កាលពី ល្ងាចមិញថា ឈុតស្រើបស្រាលមួយចំនួនដែលបានកាត់ចោល អាចនឹងបញ្ចូលឡើងវិញ ប្រសិនបើយកទៅបញ្ចាំងនៅស្រុកក្រៅ។
លោក យឹម សុសត្យា ប្រធានគ្រប់គ្រងផលិតកម្ម Rock
ប្រធានគ្រប់គ្រងខាងលើ បញ្ជាក់៖ "ដើម្បីកុំឲ្យប៉ះពាល់ប្រពៃណី និងវប្បធម៌ខ្មែរ ខ្ញុំ និងក្រុមការងារត្រូវតែកាត់ចោល ប៉ុន្តែបើសិនយកទៅបញ្ចាំងនៅបរទេស អាចនឹងបញ្ចូលវិញ អាស្រ័យទៅលើពេលវេលាកំណត់ដែលរោងភាពយន្តនៅក្រៅស្រុកគេកំណត់"។
លោក យឹម សុសត្យា បន្តឲ្យដឹងទៀតថាក្រោយពីឆ្លងកាត់ក្រសួងពត៌មាន និងក្រសួងវប្បធម៌រួចមក ឈុតស្រើបស្រាលទាំងនោះមិនបានកាត់ចោលច្រើនឡើយ គ្រាន់តែធ្វើការបង្រួមនាទីឲ្យខ្លីជាងមុន ជាក់ស្តែងត្រង់ឈុតតួស្រី ឌុច លីដា ត្រូវគេរំលោភនៅលើដើមឈើ អាក្រាតកាយពេលរត់ចូលព្រៃ និងគេងនៅលើវាលខ្សាច់។
ជួបជាមួយតួឯកស្រីក្នុងរឿង "នារីវេទមន្ត" ឌុច លីដា ប្រាប់ថា នាងមានការព្រួយបារម្ភ និងទទួលបានការរិះគន់ពីបណ្តាអ្នកគាំទ្រច្រើនគួរសមដែរ។ តែក្នុងនោះ ក៏មានអ្នកគាំទ្រមួយចំនួនបានយល់អំពីអ្វីដែលហៅថា សិល្បៈ ដូច្នេះ រាល់ឈុតឆាកសិចស៊ី និងស្រើបស្រាល ក្នុងសាច់រឿង លីដា អះអាងថាសុទ្ធតែថតបែបសិល្បៈ និងលាយឡំជាមួយបច្ចេកទេសថតទាំងអស់។
ភាពយន្តខ្នាតធំ "នារីវេទមន្ត" របស់ផលិតកម្ម Rock ចាប់សម្ពោធកាលពីល្ងាចមិញ នៅរោងភាពយន្ត Major Cineplex by Cellcard ដែលមានការចូលរួមពីសិល្បករជាច្រើនដូចជា ឌុច លីដា អ៊ូ ដារ៉ា សាហ្វីន ភីលីព សែម ឆវី ដួង ម៉ានិច វណ្ណឌី ពិសិដ្ឋ និងតារាកិត្តិយសជាច្រើនដួងទៀត។ រឿងនេះនឹងចាក់បញ្ចាំងជាផ្លូវការនៅថ្ងៃទី ០៧ ខែតុលា គ្រប់រោងកុននៅរាជធានីភ្នំពេញ៕
លោក Jimmy Henderson អ្នកដឹកនាំរឿង " នារីវេទមន្ត"
អត្ថបទ៖ ថា ម៉ាលីដា