ការពិតពិសេស១០យ៉ាងដែលអ្នកមិនធ្លាប់ដឹងពី James Ma

2016-10-18 19:00:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថិតក្នុងចំណោមតួឯកប្រុសកំពូលៗរបស់ប៉ុស្តិ៍លេខ៣ថៃ James Ma ហាក់កំពុងឡើងកូដខ្លាំងក្នុងឆ្នាំ២០១៦នេះ តាមរយៈរឿង "ស្អប់ព្រោះស្រឡាញ់" ដែលសម្ដែងរួមគ្នាជាមួយតារាឯកស្រី Kimberly។ តាមដានការពិតគួរឲ្យចាប់អារម្មណ៍១០យ៉ាងរបស់កំលោះសង្ហារូបនេះទាំងអស់គ្នា៖

១. ប្រវត្តិ James Ma និងរឿងរ៉ាវពាក់ព័ន្ធគ្រួសារ

James Ma មានឈ្មោះពិតថា James Assarasakorn បច្ចុប្បន្នអាយុ ២២ឆ្នាំ កម្ពស់ ១៨២សង់ទីម៉ែត្រ ជាកូនកាត់ថៃ-ហុងកុង ដោយឪពុកជាជនជាតិថៃ ឯម្ដាយជាជនជាតិហុងកុង និងមានប្អូនស្រីម្នាក់។ កើតក្នុងគ្រួសារអ្នកជំនួញ James បានបញ្ចប់ការសិក្សាថ្នាក់បរិញ្ញាបត្រផ្នែកភាសាអង់គ្លេសសម្រាប់ពាណិជ្ជកម្មពីសាកលវិទ្យាល័យ Assumption បច្ចុប្បន្នកំពុងបន្តថ្នាក់អនុបណ្ឌិតផ្នែកគ្រប់គ្រងពាណិជ្ជកម្ម។

២. ប្រវត្តិចូលសិល្បៈ

James Ma មានឱកាសចូលសិល្បៈក្រោយជួបអ្នកធ្វើការក្នុងវិស័យនេះម្នាក់ដោយចៃដន្យក្នុងផ្សារទំនើបមួយនៅហុងកុង។ ក្រោយមកក៏បានចូលរួមប្រកួតកម្មវិធី The Star 7 និងបានជាប់ជាបេក្ខជនតំណាងភាគកណ្ដាល និងបានទទួលការងារដើរម៉ូដ និងថតម៉ូដជារឿយៗ រហូតបានចុះកិច្ចសន្យាជាមួយប៉ុស្តិ៍លេខ៣ក្នុងឆ្នាំ២០១២។

៣. James Ma ធ្លាប់វះកាត់កែសម្ផស្ស?

បើទោះជាមានពាក្យចចាមអារ៉ាមថា មុខមាត់ស្រស់សង្ហាបានមកពីការវះកាត់ James Ma បានបដិសេធយ៉ាងច្បាស់ថា ខ្លួនមិនធ្លាប់ឆ្លងកាត់មុខកាំបិតអ្វីឡើយ ហើយក៏គ្មានគម្រោងនឹងវះកាត់ដែរ។

៤. Aum ជាមនុស្សស្រីក្នុងក្ដីស្រមៃ

សម្រាប់មនុស្សស្រីក្នុងក្ដីស្រមៃ James Ma ធ្លាប់បានបង្ហើបថាខ្លួនមើលអត្តចរិតជាសំខាន់ ដោយបានលើកឧទាហរណ៍ច្បាស់ៗថា ជាមនុស្សស្រីដូចតារារៀមច្បង Aum Patcharapa ដែលមានសមត្ថភាពពូកែ រឹងមាំ អាចមើលថែខ្លួនឯងបាន។

៥. James Ma បុរសស្រឡាញ់ឆ្មា

ឆ្មាគឺជាសត្វចិញ្ចឹមដែល James Ma ស្រឡាញ់ចូលចិត្តបំផុត ហើយតារារូបនេះតែងបង្ហាញកាយវិការ Cute Cute ជារឿយៗជាមួយឆ្មា។ លើសពីនេះ James ក៏ជាអ្នកតំណាងផ្សព្វផ្សាយចំណីឆ្មាផងដែរ។

៦. James Ma និងកីឡា

James Ma ចូលចិត្តលេងបាល់តាំងពីតូច ហើយថ្មីៗនេះបានមានឱកាសហ្វឹកហាត់កីឡាថ្មីមួយទៀតយ៉ាងជំនាញគឺកីឡាវាយកូនគោល។

៧. James Ma ចូលរួមកម្មវិធីផ្សេងៗតិចបំផុត

បើទោះជាមានឈ្មោះល្បី James Ma ហាក់ទទួលបានការអញ្ជើញចូលរួមកម្មវិធីផ្សព្វផ្សាយផ្សេងៗតិចជាងគេ ដោយមូលហេតុសាមីខ្លួនបានបង្ហើបថាដោយសាររវល់ការសិក្សា និងថតរឿង។

៨. រឿងភាគថ្មីបំផុតរបស់ James Ma

ក្រោយចប់រឿង "ស្អប់ព្រោះស្រឡាញ់" ដែលចាប់ដៃគូជាមួយ Kimberly តារាប្រុសរូបនេះនឹងមានរឿងថ្មីជាមួយតារាសម្ដែង Mint Chalida ក្នុងរឿង "លំហូរបេះដូង" និងជាមួយ Margie Rasri ក្នុងរឿង "អាគម" ដែលនឹងចាប់ផ្ដើមបញ្ចាំងនៅឆ្នាំក្រោយ។

៩. “ស្អប់ព្រោះស្រឡាញ់" ជារឿងភាគសម័យដំបូងរបស់ James Ma

ក្រោយសម្ដែងរឿងភាគបុរាណ និងសម័យមុនៗបានប៉ុន្មានរឿង James Ma បានទទួលតំណែងក្នុងរឿងភាគសម័យដំបូងជាតួគ្រូពេទ្យក្នុងរឿង "ស្អប់ព្រោះស្រឡាញ់" និងជារឿងដំបូងដែលធ្វើឲ្យតារារូបនេះទទួលបានប្រជាប្រិយភាពខ្លាំងបំផុតរហូតទទួលរហស្សនាមថា "ស្វាមីប្រចាំប្រទេស"។

១០. James Ma មិនលេង Instagram ទេ

ខុសពីតារាថៃល្បីៗភាគច្រើនដែលប្រើបណ្ដាញ Instagram ដើម្បីចែករំលែកសកម្មភាពផ្សេងដល់អ្នកគាំទ្របានឃើញ James Ma មិនបានប្រើបណ្ដាញសង្គមនេះឡើយ ហើយ Twitter ក៏មិនមានដែរ មានតែគណនី Facebook ផ្ទាល់ខ្លួនមួយ ដែលយូរទើបបង្ហោះរូបម្ដង ៕