មានដី តែខ្វះថវិកា សម្រាប់កសាងចេតិយតម្កល់ធាតុ កវី គង់ ប៊ុនឈឿន
- 2016-10-22 16:39:57
- ចំនួនមតិ 0 | ចំនួនចែករំលែក 0
មានដី តែខ្វះថវិកា សម្រាប់កសាងចេតិយតម្កល់ធាតុ កវី គង់ ប៊ុនឈឿន
ចន្លោះមិនឃើញ
ក្រោយពីព្រះចៅអធិការវត្តពោធិ៍វាល បានផ្ដល់ទីតាំងតម្កល់ធាតុ កវីម្ចាស់ស្ទឹងសង្កែ គង់ ប៊ុនឈឿនជាយូរមកហើយ ប៉ុន្តែរហូតមកទល់ពេលនេះ គឺក្រុមគ្រួសារកវីម្ចាស់ស្ទឹងសង្កែ មានតែគម្រោង នៅមិនទាន់មានផែនការកសាងចេតិយសម្រាប់តម្កល់ធាតុកវី គង់ ប៊ុនឈឿន នៅឡើយ ព្រោះតែខ្វះខាតថវិកា។
ព្រះតេជគុណ សួន ឈឿន ព្រះចៅអធិការវត្តពោធិ៍វាល មានសង្ឃដីកាប្រាប់ក្រុមការងារ "ផ្លូវទៅស្រុក" ថា ព្រះអង្គបានសម្រេចផ្ដល់ទីតាំងដីសម្រាប់តម្កល់អដ្ឋិធាតុនៅខាងក្រោយវត្តមានស្រះទឹកទីត្រជាក់ត្រជាក់ត្រជំល្អណាស់។ ប៉ុន្តែក្រុមគ្រួសារបានមកមើលទីតាំងប្រហែលពីរដងមកហើយ ហើយប្រាប់ថា រង់ចាំដល់រដូវប្រាំង នៅពេលមានលុយគ្រប់ទើបសម្រេចចិត្ត។
សូមស្ដាប់សង្ឃដីកាព្រះតេជគុណ សួន ឈឿន តាមវីដេអូខាងក្រោម៖
ទាក់ទងនឹងបញ្ហានេះ ឯកឧត្ដម មុត ថារី ដែលត្រូវជាកូនប្រសា បានប្រាប់ក្រុមការងារផ្លូវទៅស្រុកតាមទូរសព្ទថា ជាការពិត គឺក្រុមគ្រួសារមានគម្រោងរួចហើយ ប៉ុន្តែនៅខ្វះខាតថវិកាដើម្បីសាងសង់ ព្រោះទីតាំងនោះជាស្រះ ដែលត្រូវចំណាយលុយធ្វើច្រើន ដូច្នេះ អាចខ្ទង់ម៉ឺនដុល្លារ។ ដូច្នេះហើយក្រុមគ្រួសារកំពុងគៀងគរមូលនិធិនៅប្រទេសន័រវែស និងនៅកន្លែងផ្សេងៗទៀត ដូច្នេះ អាចនឹងធ្វើការសម្រេចចិត្តនៅចុងឆ្នាំ ឬដើមឆ្នាំក្រោយ អំពីការធ្វើចេតិយជូនឪពុកក្មេក។
បច្ចុប្បន្ន អដ្ឋិធាតុ កវីគង់ ប៊ុនឈឿន កំពុងតម្កល់នៅផ្ទះរបស់ ឯកឧត្តម មុត ថារី ដែលត្រូវជាកូនប្រសា ដោយតាមគម្រោងគឺរក្សាទុកឲ្យគ្រប់៣ឆ្នាំ ទើបយកមកតម្កល់នៅចេតិយដែលគ្រោងសាងសង់នៅវត្តពោធិ៍វាល៕
អត្ថបទ៖ ប៊ិន ប៊ុណ្ណា