អន្លង់ព្រីងជាប់ព្រំដែនវៀតណាម ជម្រកសុខដុមសត្វក្រៀលកម្ររាប់រយក្បាល

2016-10-28 22:20:42
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅមិនឆ្ងាយពីព្រំដែនវៀតណាម អន្លង់ព្រីងបានក្លាយជាដែនជម្រកសត្វក្រៀលកម្ររាប់រយក្បាលមកតាំងទីលំនៅរស់នៅយ៉ាងសុខដុម និងបានទាក់ទាញភ្ញៀវទេសចរមកកម្សាន្តជាបន្តបន្ទាប់ ជាពិសេសភ្ញៀវទេសចរបរទេស។

លោក វ៉ាន់ បូរ៉ា ប្រធានសហគមន៍ទេសចរណ៍អន្លង់ព្រីងបានឲ្យដឹងថា សត្វក្រៀលបានចាប់ផ្ដើមមករស់នៅនៅតំបន់អន្លង់ព្រីងនៅឆ្នាំ ២០០០ ដោយដំបូងមានតែពីរទៅបីក្បាលរហូតឆ្នាំ ២០១៦ ចំនួនបានកើនឡើងដល់រាប់រយក្បាល។

លោកថា ភូមិសាស្ត្រតំបន់អន្លង់ព្រីងជាតំបន់ដីសើម សំបូរចំណីទើបទាក់ទាញសត្វក្រៀលមកពីតំបន់នានាមកបង្កបង្កើតកូនចៅរស់នៅកាន់តែច្រើន។ ណាមួយដោយសារមានការអភិរក្សមិនឲ្យមានការបរបាញ់ ឬដាក់ថ្នាំបំពុលដើម្បីថែរក្សាសត្វកម្រនេះឲ្យគង់វង្សសម្រាប់ក្មេងជំនាន់ក្រោយបានស្គាល់។

លោកវង់ ហាន សមាជិកក្រុមទេសចរណ៍នៅតំបន់ទេសចរណ៍អន្លង់ព្រីងបានឲ្យដឹងថា សហគមន៍បានខិតខំផ្សព្វផ្សាយតាមរយៈការចុះតាមសិក្ខាសាលា ការពង្រីកបណ្តាញផ្សព្វផ្សាយតាមអង្គការ និងក្រុមហ៊ុនទេសចរណ៍ ក៏ដូចជាការធ្វើខិត្តប័ណ្ណដើម្បីបង្ហាញពីសក្តានុពលនៃតំបន់ទេសចរណ៍អន្លង់ព្រីង។

លោកថា កន្លងទៅភ្ញៀវទេសចរក្នុងស្រុកមិនសូវមកកម្សាន្តច្រើនទេ ភាគច្រើនភ្ញៀវទេសចរវៀតណាម និងភ្ញៀវមកពីតំបន់អឺរ៉ុបមួយចំនួន។ ដើម្បីផ្តល់ភាពងាយស្រួលភ្ញៀវមកកម្សាន្ត សហគមន៍មានរៀបចំសេវាកម្មដូចជាផ្ទះស្នាក់នៅ ក្រុមធ្វើម្ហូបអាហារ និងមានមគ្គុទ្ទេសក៍រង់ចាំផ្តល់សេវានាំភ្ញៀវដើរទស្សនាតំបន់សត្វក្រៀល និងតំបន់កម្សាន្តដែលនៅជុំវិញ។

ដើម្បីទស្សនាប្រភេទសត្វកម្រស្ទើរផុតពូជលើពិភពលោកនេះ ភ្ញៀវទេសចរអាចមកចាប់ពីខែវិច្ឆិកា ដល់ខែឧសភា ជារយៈពេលដែលសត្វក្រៀលរាប់រយក្បាលបានចាប់ផ្តើមបម្លាស់ទីពីបឹងទន្លេសាបនិងតំបន់ដទៃទៀតមករស់នៅយ៉ាងកកកុញនៅតំបន់អន្លង់ព្រីង។