មួយក្បាច់របស់រដ្ឋមន្រ្តីក្រសួងអប់រំ ជួយដល់កីឡាករជម្រើសជាតិ ធ្លាក់បាក់ឌុប

2014-11-05 17:05:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានបទប្រឡងបាក់ឌុបនៅមិនទាន់សាបរលាបនៅឡើងទេ ក្នុងចំណោមបេក្ខជនទាំងអស់ ជាពិសេសកីឡាករមួយចំនួនដែលប្រឡងធ្លាក់ បានចេញមុខស្នើសុំទៅឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំយុវជននិងកីឡា ផ្ទាល់ក្នុងបំណងបានជាប់ដោយស្វ័យប្រវត្តិ បន្ទាប់ពីប្រឡងបាក់ឌុបធ្លាក់ជាលើកទី២។

ការស្នើរសុំនេះ បានធ្វើឡើងក្នុងពិធីសំណេះសំណាលរបស់ឯកឧត្តមរដ្ឋមន្រ្តីជាមួយក្រុមកីឡាករជម្រើសជាតិប្រមាណជា ៣០០ នាក់ នៅព្រឹកថ្ងៃទី ៤ វិច្ឆិកា ម្សិលមិញ ក្នុងវិមានពហុកីឡដ្ឋានជាតិ។

កីឡាការិនី ឈឿង លីណា មកពីកីឡាតេក្វាន់ដូ តំណាងឱ្យកីឡាករទាំងអស់ដែលធ្លាក់បាក់ឌុបបានឡើងស្នើរសុំដល់រដ្ឋមន្រ្តី ដោយលើឡើងថា រវាងការហាត់កីឡា និង ការសិក្សា ពួកគាត់មិនអាចប្រឹងឱ្យពូកែទាំង២ បាននោះទេ អាចមានម្ខាងខ្លាំងម្ខាងខ្សោយ។ ចំណែកការសិក្សាវិញ ទោះជាប្រឡងលើកទី២ ហើយក៏មិនបានជាប់ដែរ។

ជាចម្លើយចេញពីមាត់ភ្លាមៗ ឯកឧត្តមរដ្ឋមន្រ្តីថា៖ «...បើខ្ញុំប្រឡងឱ្យកើតខ្ញុំទៅប្រឡងជំនួសភ្លាម... តែវាជារឿងខុសច្បាប់។ ខ្ញុំអាចជួយតាមលទ្ធភាពដែលអាចធ្វើទៅរួចតែប៉ុណ្ណោះ គឺជួយរកមហាវិទ្យាល័យសម្រាប់បរិញ្ញាប័ត្ររងដល់អ្នកទាំងអស់គ្នា»។

ឯកឧត្តម ហង់ ជួនណារ៉ុន បានឱ្យកត់ឈ្មោះកីឡាករជម្រើសជាតិទាំងអស់ដែលធ្លាក់បាក់ឌុប និង មុខវិជ្ជាដែលចង់សិក្សា ជូនលោក ដើម្បីលោកស្នើរសុំសាកលវិទ្យាល័យមួយចំនួន តាមលទ្ធភាព៕

អត្ថបទពាក់ព័ន្ធ៖ ៣ យ៉ាងដែលរដ្ឋមន្ត្រី ត្រូវដោះស្រាយរឿងកីឡាជាតិ នៅពេលខាងមុខ

អត្ថបទ៖ ម៉ឺន រស្មី